جازۋشى ءابىش كەكىلباي ۇلىنىڭ 80 جىلدىعى حالىقارالىق دەڭگەيدە اتالىپ وتەدى
بۇل تۋرالى وڭىرلىك كوممۋنيكاتسيالار قىزمەتى الاڭىندا وتكەن بريفينگتە ماڭعىستاۋ وبلىسى اكىمىنىڭ ورىنباسارى قانىبەك جۇماشيەۆ ءمالىم ەتتى، دەپ حابارلايدى قازاقپارات.
حالىق جازۋشىسى ءابىش كەكىلباي ۇلىنىڭ 80 جىلدىعىنا ارنالعان شارالار 2019 -جىلى 10-12 -قازان كۇندەرىنە جوسپارلانعان. شارانىڭ ماقساتى - جازۋشى ءا. كەكىلباي ۇلىن حالىقارالىق دەڭگەيدە تانىتىپ، دارىپتەۋ. 10 - قازاندا باستالاتىن شاراعا جازۋشىمەن ارىپتەس بولعان ادەبيەت جانە ونەر قايراتكەرلەرى، شىعارمالارىن بىرنەشە تىلگە اۋدارعان اۋدارماشىلار، سونداي- اق ەۋروپا، جاپونيا، تۇركيا مەملەكەتى مەن كورشىلەس رەسەي ەلىنەن عالىم، زەرتتەۋشىلەر شاقىرىلادى.
«ايتا كەتۋ كەرەك شاراعا ق ر مادەنيەت جانە سپورت ءمينيسترى قولداۋ كورسەتۋدە. شارا بارىسىندا اقتاۋ قالاسىندا ءابىش اتامىزعا ارنالعان مادەني ورتالىق كەشەنىنىڭ الدىندا ورنالاساتىن كورنەكتى ەسكەرتكىشتىڭ جانە وبلىستىق ولكەتانۋ مۋزەيىنىڭ اشىلۋ سالتاناتى، وعان قوسا مادەنيەت، ونەر قايراتكەرلەرىنىڭ حالىقارالىق كونگرەسى وتەدى دەپ جوسپارلانۋدا. مەرەكەلىك شارالار زاڭعار جازۋشىنىڭ تۋعان جەرى وڭدىدا جالعاسىن تاۋىپ، كەيىن شەتپە كەنتىندە رەسپۋبليكالىق دەڭگەيدەگى «ءسوز بەن ساز» باعدارلاماسىمەن تولىعادى. سونداي- اق حالىقارالىق دەڭگەيدەگى تەاترلار قاتىساتىن «ءابىش الەمى» فەستيۆالى جانە قازاقتىڭ ۇلتتىق سپورتتىق ويىندارى دا ۇيىمداستىرىلادى دەپ جوسپارلانۋدا»، - دەدى وبلىس اكىمىنىڭ ورىنباسارى قانىبەك جۇماشيەۆ.
مەرەيتوي اياسىنداعى شارالار جىلدىڭ باسىندا قولعا الىنعان. مەكتەپ وقۋشىلارى اراسىنداعى «ءابىش وقۋلارى»، «جاس اقىندار ءمۇشايراسى» سونداي- اق شىعارما جازۋ سايىستارى وتكىزىلدى. قازىرگى تاڭدا شارانىڭ رەسمي لوگوتيپى ازىرلەنىپ، دايىندىق قارقىندى جۇرگىزىلۋدە. ماڭعىستاۋ وبلىسى اكىمىنىڭ تاپسىرماسىمەن «ءابىش وقۋلارىنىڭ» جەڭىمپازدارىنا، فيليولوگيا جانە جۋرناليستيكا سالاسىندا جاقسى ناتيجە كورسەتىپ جۇرگەن ستۋدەنتتەرگە ءابىش كەكىلبايەۆ اتىنداعى شاكىرتاقى تاعايىندالماق. ءابىش كەكىلباي ۇلىنىڭ 80 جىلدىعىنا ورايلاستىرىلعان شارالار لەگى تەك قانا ماڭعىستاۋ وبلىسىمەن عانا شەكتەلمەي، 6 - جەلتوقسان كۇنى نۇر- سۇلتان قالاسىندا جالعاسادى.
اۆتور: ءلايلىم ءالىم
