قازاقستانداعى تۇرمەلەردىڭ 80 پايىزدان استامى ەسكىرگەن - مارات احمەتجانوۆ
بۇل تۋرالى ق ر باس پروكۋرورىنىڭ ورىنباسارى مارات احمەتجانوۆ قىلمىستىق اتقارۋ جۇيەسىن رەفورمالاۋعا ارنالعان فورۋمدا ايتتى، دەپ حابارلايدى قازاقپارات ءتىلشىسى.
مارات احمەتجانوۆ ەلدەگى قىلمىستىق اتقارۋ جۇيەسىندەگى رەفورمالار كوبىنەسە زاڭنامالىق تۇرعىدا جۇزەگە اسىپ جاتقانىن اتادى. ونىڭ پىكىرىنشە، ەلدەگى قىلمىستىق زاڭناما بارىنشا گۋمانيزاتسيالانىپ جاتقانىمەن، سوتتالعانداردى تۇرمەدە ۇستاۋ شارتتارى ءالى دە جاقسارتۋدى تالاپ ەتەدى.
«2018 -جىلى قىلمىستىق اتقارۋ مەكەمەلەرىندە وتىرعانداردىڭ سانى 5000 عا ازايعان بولاتىن. دەگەنمەن، ەلدەگى جالپى قىلمىس سانى 7 پايىزعا عانا كەمىگەن. تۇرمەدەگى سوتتالعانداردىڭ جاعدايى ءمىنسىز دەپ ايتۋعا كەلمەيدى. باس پروكۋراتۋرا مەن قوعامدىق ۇيىمدارعا وتە كوپ شاعىمدار ءتۇسىپ جاتىر. اسىرەسە قىلمىستىق اتقارۋ مەكەمەلەرىنىڭ قىزمەتكەرلەرىنىڭ رۇقسات ەتىلمەگەن تاسىلمەن جۇمىس ىستەۋىنە شاعىم كوپ. بۇل جەردە قاداعالاۋشى پروكۋرورلاردىڭ ەنجارلىعى بار ەكەنىن دە ايتۋ كەرەك. تۇرمە ينفراقۇرىلىمىنىڭ 80 پايىزدان استامى ەسكىرىپ كەتكەنى جاعدايدى ودان سايىن ۋشىقتىرىپ وتىر»، - دەدى باس پروكۋراتۋرا وكىلى.
باس پروكۋروردىڭ ورىنباسارى ەلدەگى قىلمىستىق اتقارۋ جۇيەسىنىڭ جۇمىسىندا اشىقتىقتى قامتاماسىز ەتۋ كەرەكتىگىن دە اتاپ ءوتتى.
«قىلمىستىق اتقارۋ كودەكسىنىڭ ءوزىن جەتىلدىرۋ كەرەك. قازىر ول زاڭ ەمەس، سىلتەمە سياقتى. تۇرمە اكىمشىلىگى مەن سوتتالعاندار اراسىنداعى قاتىناس ىشكى ىستەر مينيسترلىگىنىڭ اكتىلەرىمەن رەتتەلىپ وتىر. ال تۇزەتۋ مەكەمەلەرىنىڭ باسشىلارىنا وتە ۇلكەن قۇزىرەت بەرىلىپ قويعان» - دەدى مارات احمەتجانوۆ.