قىتايدىڭ جالپى ىشكى ءونىمى 80 تريلليون يۋاننان اسىپ ءتۇستى
بۇل جايىندا قىتاي حالىق رەسپۋبليكاسى ستاتيستيكا باسقارماسىنىڭ باسشىسى نين جيچجە مالىمدەدى. الەمدەگى ەكىنشى ءىرى ەكونوميكانىڭ ءوسىمى سوڭعى التى جىلدا بولماعان كورسەتكىشكە جەتۋىنە نە سەبەپ؟
نۇربەك بەكەن، ءتىلشى:
- قىتايدىڭ مەملەكەتتىك ستاتيستيكا باسقارماسى ەلدىڭ باستى تابىسىن جاريا ەتتى. جالپى ىشكى ءونىم العاش رەت 80 تريلليون يۋاننان اسىپ تۇسكەن. وسىلايشا، 13 تريلليون ا ق ش دوللارىنا جۋىقتادى. بۇل كورسەتكىش 2016 -جىلمەن سالىستىرعاندا 0,2 پايىزعا ارتىق. ساراپشىلاردىڭ ايتۋىنشا، سوڭعى 6 جىلدا قىتاي ەكونوميكاسىندا مۇنداي كورسەتكىش بايقالماعان.
گۋن تسزيۋن، حالىقارالىق بيزنەس جانە ەكونوميكا ۋنيۆەرسيتەتىنىڭ پروفەسسورى:
- حالىقارالىق نارىق جاندانىپ كەلەدى. سولتۇستىك امەريكا نارىعىنىڭ ءوسىمى 3 پايىزعا جاقىنداپ قالدى. بۇل - ءبىز كوپتەن كۇتكەن جاعىمدى جاڭالىق. قىتاي بىلتىر ەكسپورت پەن يمپورتتا دا جاقسى كورسەتكىشتەرگە جەتتى. مەنىڭشە، جاھاندىق ەكونوميكا ازداپ بولسىن وڭالىپ كەلەدى.
دەگەنمەن 2016 -جىل قىتاي ەكونوميكاسى ءۇشىن وڭاي بولعان جوق. ىشكى نارىقتىڭ تۇراقسىزدىعى، قارجى سالاسىنداعى قيىندىقتار مەن باسقا دا سەبەپتەرگە بايلانىستى ەل دامۋىنىڭ كورسەتكىشى سوڭعى 26 جىلدا بولماعان جاعدايعا دەيىن تومەندەدى. ال بىلتىر ەكونوميكانى باسقارۋدىڭ تيىمدىلىگى ارتىپ، سالىق جۇيەسىنە جاڭا وزگەرىستەر ەنگىزىلدى.
ساراپشىلار قىتاي ەكونوميكاسىنىڭ وسىمىنە «ءبىر بەلدەۋ، ءبىر جول» جوباسىنىڭ جۇزەگە اسۋى سەرپىن بەرگەنىن ايتادى. ناتيجەسىندە ەلدىڭ وڭتۇستىگى مەن سولتۇستىك- باتىس ولكەلەرى اراسىنداعى ىشكى ساۋدا جاندانعان. ازىق- تۇلىك، ەت، اۋىزسۋ، ەلەكترونيكا مەن ءۇي قۇرال جابدىقتارىن تۇتىنۋدىڭ جوعارعى كورسەتكىشىنەن وسىنى بايقاۋعا بولادى.
نۇربەك بەكەن، ءتىلشى:
- سونىمەن قاتار ەلدىڭ ينفراقۇرىلىمى مەن ەنەرگەتيكاسىنا سالىنعان ينۆەستيتسيالار وڭ ناتيجەسىن بەرە باستادى. 2018 -جىلى الەمدەگى ەكىنشى ءىرى ەكونوميكانىڭ ءوسىمى 6,5 پايىزدى ەڭسەرەدى دەگەن بولجام بار.
اۆتورلارى: نۇربەك بەكەن، جاڭ ءسۇي
www.24.kz
