الماتى زوولوگيالىق پاركى 80 جىلدىعىن اتاپ وتۋدە - فوتو
وسى كۇنى كەلۋشىلەرگە كونسەرتتىك باعدارلاما، ءتۇرلى كورمەلەر، شەبەرلىك سىنىپتارى، كونكۋرستار، اڭدارعا اشىق جەم بەرۋ ۇيىمداستىرىلدى. كىرە بەرىستە بالالاردى ءتۇرلى اڭدار كوستيۋمدەرىن كيگەن انيماتورلار قارسى الۋدا. الماتى قالاسىنىڭ اكىمى باۋىرجان بايبەك 80 -جىلدان بەرى جۇمىس ىستەپ كەلە جاتقان زوولوگيالىق پارك ۇجىمى مەن قالالىقتاردى قۇتتىقتادى، الماتى زوولوگيالىق پاركىنىڭ ەلىمىزدەگى ەڭ كونە پاركتەردىڭ ءبىرى ەكەنىن، العاشقى كەلۋشىلەرىن سوناۋ 1937 -جىلى قارسى العانىن اتاپ ءوتتى.
ونىڭ العاشقى ەكسپوزيتسيالارى 7 گەكتارعا ورنالاسقان ەدى، كەيىن بىرتىندەپ اۋماعى ۇلعايا باستاپ، 22 گەكتارعا دەيىن جەتتى، العاشقى جىلدارى كوللەكتسيادا نەبارى اڭ مەن جانۋارلاردىڭ ونعا جۋىق ءتۇرى بولسا، قازىر مۇندا ولاردىڭ سانى 4 مىڭنان اسادى.
«80 -جىلدىڭ ىشىندە زووپارك الماتىلىقتار مەن وڭتۇستىك استانا قوناقتارى ءۇشىن ءجيى كەلەتىن سۇيىكتى دەمالىس ورنىنا اينالدى. ءبىزدى مۇندا اتا- انامىز الىپ كەلەتىن، ءبىز باقىتتى ەدىك. 30-40 جىلدان سوڭ سىزدەردىڭ بالالارىڭىز وزدەرىنىڭ بالالارىن الىپ كەلىپ، مەنى اتا- انام وسىندا الىپ كەلگەن ەدى دەيتىن بولادى. قازىر مەگاپوليستە اۋقىمدى اباتتاندىرۋ جۇمىستارى جۇرۋدە، ونىمەن قالانىڭ تاريحي ورتالىعىنىڭ ۇشتەن ءبىرى قامتىلعان، كوشەلەر عانا ەمەس، ۇيلەردىڭ سىرتقى كەلبەتى دە كورىكتەنۋدە، جۇمىس «قالا ادامدار ءۇشىن» پرينتسيپى بويىنشا جۇزەگە اسۋدا. بۇل وڭ ىستەن زووپارك تە سىرت قالعان جوق. ونى جاڭارتۋ ءۇشىن نەمىس ارحيتەكتورى پيتەر رازباحتىڭ شەبەرلىك- جوسپارى جاسالدى، كەزىندە ول ديۋسسەلدورفتاعى، بەرليندەگى، تەگەرانداعى، دۋبايداعى، تۋريندەگى زووپاركتەردىڭ جوباسىن جاساعان»، - دەدى الماتى قالاسىنىڭ اكىمى.
ول جوبا نەگىزىندە زووپاركتىڭ گەوگرافيالىق ايماق ءپرينتسيپى بويىنشا 90- پايىزعا جاڭاراتىنىن، قۇرىلىمى تولىق وزگەرەتىنىن، اڭداردى اشىق تابيعاتتا قورەكتىندىرۋ ءپرينتسيپىنىڭ جۇزەگە اساتىنىن ايتتى. زوولوگيالىق پارك ديرەكتورى ەرجان ەركىنبايەۆ بۇگىنگى كۇنى مۇندا اڭداردىڭ ولىمىنە جول بەرمەۋ ءۇشىن ناقتىلى شارالاردىڭ جۇرگىزىلىپ جاتقانىن، ولاردى ازىقتاندىرۋ راتسيونىنىڭ قايتا جاسالعانىن، ازىق ساپاسىنىڭ باقىلاۋدا ەكەنىن، ۆولەرلەردىڭ قايتا جاسالعانىن، جاپپاي اباتتاندىرۋ جۇمىستارىنىڭ ءجۇرىپ جاتقانىن ايتتى.
«مىسالى، اق جانە گيمالاي ايۋلارىنىڭ قازىر كەڭ باسسەيندەرى بار، ءشوبى مەن اعاشى بار اۋلا پايدا بولدى. اكۆاريۋم، امۋر تيگرىنىڭ ورنى جاڭعىرتىلۋدا، ەكزوتيكالىق قۇستار ۆولەرلەرى جاڭارۋدا. وسىنىڭ بارلىعى اكىمدىكتىڭ، بىزگە نيەت بىلدىرگەن دوستارىمىز بەن دەمەۋشىلەردىڭ قولداۋ ارقاسىندا ىسكە استى. زووپاركتى قارجىلاندىرۋ دا ەداۋىر ءوستى. ەگەر 2016 -جىلى جەرگىلىكتى بيۋدجەتتەن 409 ميلليون تەڭگە بولىنسە، بيىلعى قارجى 500 ميلليون تەڭگەنى قۇرايدى. سونىمەن قاتار، زووپاركتىڭ ءوز تابىسى 300 ميلليون تەڭگە جۋىق، دەمەۋشىلىك كومەك - 140 ميلليوننان استام. زووپاركتىڭ جاقسى جاققا قاراي وزگەرۋى كەلۋشىلەر قاتارىن دا كوبەيتتى، ولاردىڭ قاتارى 20 پايىزعا ءوستى»، - دەدى ە. ەركىنبايەۆ. الماتى اكىمى زووپارك قىزمەتكەرلەرىن ەسكەرتكىش ديپلومدارمەن، سىيلىقتارمەن ماراپاتتادى. ولاردىڭ كەيبىرەۋلەرى مۇندا 20 جىل بويى جۇمىس ىستەگەن ەكەن، قيىن كەزەڭدەرگە قاراماستان سۇيىكتى ىستەرىن تاستاماعان.