شاردارانىڭ 80 پايىز بالىق ءونىمى شەتەلگە ەكسپورتتالادى-فوتو
شىمكەنت. قازاقپارات - وڭتۇستىك قازاقستان وبلىسى شاردارا اۋدانىندا جىلىنا بەس مىڭ توننادان استام بالىق ءونىمىن وندىرۋگە قاۋقارلى 4 بالىق وڭدەۋ زاۋىتى بار. بۇل كاسىپورىندار جىل باسىنان بەرى 1,3 ميلليارد تەڭگە سوماسىنا 1300 توننا بالىق وڭدەپ، ونىڭ 80 پايىزىن رەسەي، گەرمانيا، يزرايل، گرۋزيا جانە وزبەكستان ەلدەرىنە ەكسپورتتادى. قالعان 20 پايىزى ىشكى نارىقتا ساۋدالانۋدا،
دەپ حابارلايدى قازاقپارات ح ا ا ءتىلشىسى.
شاردارا اۋدانىنىڭ الەۋمەتتىك- ەكونوميكالىق احۋالىمەن تانىسۋ ماقساتىندا ارنايى جۇمىس ساپارىمەن بارعان وبلىس اكىمى جانسەيىت تۇيمەبايەۆ بالىق شارۋاشىلىعىمەن اينالىساتىن «حاميت» اۋىل شارۋاشىلىعى وندىرىستىك كووپەراتيۆىندە بولدى.
بالىق وڭدەۋ زاۋىتىنىڭ پروتسەسىمەن تانىسقان ايماق باسشىسى بۇل شارۋاشىلىقتا كووپەراتيۆتەر قۇرۋ ارقىلى ءونىمنىڭ كولەمىن ۇلعايتۋعا بولاتىنىن جەتكىزدى. مۇزداتىلعان، ىستالعان جانە تۇزدالعان بالىق پەن فيلە ونىمدەرىن شىعاراتىن كاسىپورىننىڭ جىلدىق قۋاتتىلىعى 2500 توننانى قۇرايدى. 250 ادامعا جۇمىس تاۋىپ بەرىپ وتىرعان بۇل زاۋىت شەت مەملەكەتتەرگە باسەكەگە قابىلەتتى بالىق ونىمدەرىن شىعارۋمەن تانىمال. ءوڭىر باسشىسى اتالعان كاسىپورىننىڭ سۋ قويماسىندا ورنالاسقان تورلى شارباقتاعى بالىق ءوسىرۋ جۇمىسىمەن دە تانىس بولدى. بۇل قويمادى وتكەن جىلى 39 توننا بالىق قولدان ءوسىرىلىپ شىقسا، بيىل بۇل كورسەتكىش ەكى ەسەگە ۇلعايتىلىپ، ياعني، 80 تونناعا دەيىن جەتكىزىلمەك. جالپى اۋداندا بالىقتى قولدان ءوسىرۋ جانە مولايتۋ شارۋاشىلىعىمەن اينالىساتىن 5 كاسىپورىن بولسا، ولاردا بۇگىندە 300 تونناعا جۋىق بالىق ءوسىرىلىپ جاتىر. سونداي- اق شاردارا اۋدانىندا الداعى ۋاقىتتا بالىق وڭدەۋمەن اينالىساتىن تاعى ەكى شاعىن كاسىپورىن اشۋ جوسپارلانۋدا.
اۆتور: اينۇر اقبايەۆا 
