بيىل وقۋ گرانتتارى كونكۋرسىنا قاتىسقانداردىڭ 80 پايىزى قازاق تىلىندە وقۋعا نيەتتى
بۇل تۋرالى بۇگىن استانا ءبىلىم گرانتتارىن ءبولۋ جونىندەگى رەسپۋبليكالىق كونكۋرستىق كوميسسيانىڭ وتىرىسىندا ق ر ءبىلىم جانە عىلىم ءمينيسترى ەرلان ساعاديەۆ ءمالىم ەتتى.
«اعىمدىق جىلعى وقۋ گرانتتارىن الۋ كونكۋرسىنا 59677 ادام قاتىسۋدا، ولاردىڭ ىشىندە 47342- ءسى - قازاق تىلىندە ءبىلىم الۋعا (80 پايىزعا جۋىعى)، 12335 تالاپكەر ورىس تىلىندە وقۋعا تاپسىردى»، - دەدى مينيستر.
بۇدان كەيىن ە. ساعاديەۆ «ماڭگىلىك ەل جاستارى - يندۋسترياعا!» جوباسى اياسىنداعى كۆوتا بويىنشا وتكىزىلگەن كونكۋرسقا 9797 ادام قاتىسىپ وتىرعاندىعىن جەتكىزدى.
ونىڭ سوزىنە قاراعاندا، جالپى كونكۋرستارعا قاتىسۋشىلار اراسىندا 2208 «التىن بەلگى» يەگەرلەرى؛ 303 كوللەدج تۇلەكتەرى؛ 169 حالىقارالىق جانە رەسپۋبليكالىق وليمپيادالاردىڭ جەڭىمپازدارى؛ 854 حالىقارالىق جانە رەسپۋبليكالىق عىلىمي جارىستاردىڭ جەڭىمپازدارى، 948 حالىقارالىق جانە رەسپۋبليكالىق سپورتتىق جارىستاردىڭ جەڭىمپازدارى؛ 9 پرەزيدەنتتىك وليمپيادانىڭ جەڭىمپازدارى قامتىلعان. ولار گرانتتى الۋدا باسىمدىققا يە بولىپ وتىر.
ءمينيستردىڭ ايتۋىنشا، كونكۋرسقا 1، Ⅱتوپ مۇگەدەكتىگى بار 363 ادام، قازاقستان رەسپۋبليكاسىنىڭ ازاماتتىعى جوق قازاق ۇلتى وكىلدەرىنەن قامتىلعان 1053 ادام، سونداي- اق 492 اتا- اناسىنىڭ قامقورلىعىنان ايىرىلعان بالالار مەن جەتىم بالالار قاتىسۋدا. بۇل ادامدارعا كۆوتالار بەلگىلەنگەن.
بۇدان بۇرىن حابارلانعانداي، بيىل 31702 گرانت ءبولىندى، ونىڭ ىشىندە 2950 ورىن جوعارى وقۋ ورىندارىنىڭ دايىندىق بولىمدەرىندە وقۋعا، 28752 گرانت 1 كۋرسقا قابىلداۋعا قاراستىرىلدى.
ايتا كەتەيىك، اعىمداعى جىلى ۇلتتىق ءبىرىڭعاي تەستىلەۋدەگى ورتاشا بال - 81,2 بال.
اۆتور: رۋسلان عابباسوۆ
