نيسسادا فرانسۋزدىق ارنايى جاساق قاتەلەسىپ، 80 دەگى قاريانىڭ ءۇيىن بۇزىپ كىرگەن

استانا. قازاقپارات - نيسسادا فرانسۋزدىق ارنايى جاساق قاتەلەسىپ، 80 دەگى قارتتىڭ ءۇيىن بۇزىپ كىرگەن، دەپ حابارلايدى Nice-Matin باسىلىمى.

وقيعا 84 ادامنىڭ ءومىرىن جالماعان نيسسا جاعالاۋىنداعى لاڭكەستىك شابۋىلدى تەرگەۋ بارىسىندا بولعان. پوليتسيا جۇك كولىگىن باسقارعان جىگىتتىڭ بىرنەشە تانىسىن قولعا ءتۇسىرۋ ءۇشىن ارنايى ماقساتتاعى بولىمشەنىڭ كۇشىمەن وپەراتسيا ۇيىمداستىرعان.

تاڭعى 6 شاماسىندا ولار بىتىرامامەن ءۇيدىڭ ەسىگىن قۇلپى تۇراتىن تۇسىنان اتىپ، ارتىنشا بۇزىپ كىرگەن. ودان كەيىن جاتىن بولمەنىڭ ەسىگىن دە ءدال سولاي قيراتىپ اشقان. الايدا الدارىنان بويىن ۇرەي بيلەگەن كارى شال مەن كەمپىر شىققاندا عانا، قاتەلەسكەندەرىن تۇسىنگەن.

«ولار ءۇيدى قيراتىپ تاستادى، ەسىكتى سىندىردى»، - دەيدى 80 جاستاعى وتاعاسى پەر كاپيۋتو. ال زايىبى، 82 جاستاعى فرانسۋاز بولسا، بۇل وقيعاعا قاتتى ىزالى.

ايتا كەتەيىك، ارنايى جاساق ودان سوڭ الگى پاتەردى تاۋىپ، وزدەرىنە كەرەكتى ادامدى قولعا ءتۇسىردى.