قاراعاندى وبلىسىندا 80 مەملەكەتتىك قىزمەتكەر سىناق مەرزىمىندە ءجۇر - وبلىس باسشىسى

قاراعاندى. قازاقپارات - قاراعاندى وبلىسىنىڭ بيلىك جۇيەسىندە 83 مەملەكەتتىك قىزمەتكەر سىناق مەرزىمىندە ءجۇر.

 بۇل تۋرالى ايماقتىق ورتالىق كوممۋنيكاتسيالار قىزمەتىنىڭ بريفينگىندە وبلىس باسشىسى نۇرمۇحامبەت ابدىبەكوۆ ءمالىم ەتتى.

«100 ناقتى قادام» ۇلت جوسپارىنىڭ ءبىرىنشى باعىتى مەملەكەتتىك اپپاراتتى كەشەندى جاڭعىرتۋ ماقساتىن كوزدەيدى. بۇل مىندەتتى ورىنداۋ ءۇشىن وتكەن جىلدىڭ سوڭىندا «قازاقستان رەسپۋبليكاسىنىڭ مەملەكەتتىك قىزمەتى تۋرالى» جاڭا زاڭ دا قابىلداندى. وسىلايشا، مەملەكەتتىك قىزمەتكە كەلۋدىڭ رەتى دە وزگەردى. مەملەكەتتىك قىزمەتكە ەندى كەلگەن ازامات ەڭ تومەنگى لاۋازىمعا تاعايىندالادى. 2016 -جىلدىڭ باسىنان بەرى وبلىس بويىنشا 12 كىشى- گىرىم لاۋازىمعا كونكۋرس جاريالاعان بولاتىن. قازىر 83 مەملەكەتتىك قىزمەتكەر سىناق مەرزىمىندە ءجۇر»، - دەيدى وبلىس باسشىسى.

اكىمنىڭ حابارلاۋىنشا، ىشكى كونكۋرستار 57 بوس قىزمەتكە جاريالانعان. قازىر 51 بوس ورىننىڭ كونكۋرسى اياقتالدى، 35 ادام ءتيىستى قىزمەتكە تاعايىندالدى. ن. ابدىبەكوۆ ەرەكشە اتاپ وتكەندەي، ىشكى كونكۋرستاردىڭ بارلىعىن باقىلاۋشىلار قاداعالاعان.

 «ال، زاڭناما بويىنشا بىلىمدەرىن تەكسەرەتىن تەستكە 684 مەملەكەتتىك قىزمەتكەر قاتىسىپ، ونىڭ ىشىندە 318 ادام تەستى ويداعىداي تاپسىردى. 397 ادام جەكە باسىنىڭ جاقسى قاسيەتتەرىن تانىتتى. قاراعاندى وبلىسى «ب» كورپۋسىنىڭ قىزمەتىنە باعا بەرگەن رەسپۋبليكاداعى العاشقى وڭىرلەردىڭ ءبىرى»، - دەپ تولىقتىردى ايماق باسشىسى.

اۆتور: كەنجەكەي توقتامۇرات قىزى