قازاقتان شىققان تۇڭعىش ايەل كينومەحانيك بيىل 80 جاسقا تولدى
ونىڭ بىرنەشە سەبەبى بار. قازاقستاندى بىلاي قويعاندا، ورتالىق ازيادا قىزدار اراسىنداعى كينومەحانيكا سالاسىنىڭ العاشقى «قارلىعاشى» اتانعان ول بيىل 80 جاسقا كەلىپ وتىر. وسى مەرەيلى مەرەكەگە وراي جۋىردا «ءراپيا» اتتى كىتاپ جارىق كوردى، دەپ حابارلادى 24.kz.
كىتاپتا ونىڭ ءومىرى مەن ەڭبەك جولى جايلى جان-جاقتى مالىمەتتەر جينالعان. ءراپيا حالىقوۆا اشارشىلىق كەزىندە دۇنيەگە كەلىپ، بالالىق شاعى سوعىس جىلدارىندا وتكەن. جاستايىنان قيىنشىلىقتى كوپ كورگەن كىشكەنتاي قىزدىڭ ول كەزدەگى ەڭ سۇيىكتى ەرمەگى كينو بولعان ەكەن.
ءراپيا حالىقوۆا، ق ر ەڭبەك سىڭىرگەن مادەنيەت قايراتكەرى:
- ءبىزدىڭ اۋىلىمىزعا وگىز اربامەن كينو اپارىپ قوياتىن. سوندا اپپاراتتى مىناداي جەرگە ورنالاستىرعاندا، مەن ۇستەلدىڭ استىندا وتىرىپ كينو كورەتىنمىن. سودان، مىنە، كينو الەمىنە سولاي ەندىم.
24.kz ارناسىنا بەرگەن سۇحباتىندا مەرەيتويى يەسى الماتىعا بارىپ، كينومەحنيكا ماماندىعىن الماق بولعانىندا ونى سول كەزدەگى جاۋاپتى ماماندار جاقىنداتپاي قويعانىن ايتتى.
ءراپيا حالىقوۆا، ق ر ەڭبەك سىڭىرگەن مادەنيەت قايراتكەرى:
- «ءسىز قازاقسىز، ورىسشا بىلمەيسىز، ءسىزدى ءبىز كينوعا الا المايمىز، ىستەي المايسىز. ايەل ادامعا بۇل جارامايدى، بۇعان ەر ادام كەرەك»، - دەدى. نامىسىم قايرالىپ، اۋىلعا بارىپ ىستەي بەردىم.
ءراپيا اپا كەيىننەن جامبىل قالاسىندا تەحنيكۋمدا وقىپ، كۋالىك الادى. سودان 36 جىل وسى سالادا ەڭبەك ەتىپ، ك س ر و كينوماتوگرافيا سالاسىنىڭ ۇزدىگى بولدى. كوپشىلىكتىڭ قۇرمەتىنە بولەنىپ، «قازاقستانعا ەڭبەگى سىڭگەن مادەنيەت قايراتكەرى» اتاعىنا يە بولدى.
