قادىردىڭ 80 جىلدىعىنا وراي رەسپۋبليكالىق «ولمەس ولەڭ» ءمۇشايراسى جاريالاندى

ورال. قازاقپارات - ب ق و اكىمدىگى، وبلىستىق مادەنيەت، مۇراعاتتار جانە قۇجاتتاما باسقارماسىنىڭ قولداۋىمەن وبلىستىق حالىق شىعارماشىلىعى ورتالىعى قازاقستاننىڭ حالىق جازۋشىسى، مەملەكەتتىك سىيلىقتىڭ لاۋرەاتى قادىر مىرزا ءاليدىڭ 80 جىلدىق مەرەيتويىنا وراي «ولمەس ولەڭ» اتتى رەسپۋبليكالىق جىر ءمۇشايراسىن ءمۇشايراسىن جاريالادى.

ولەڭ بايگەسى قازاق پوەزياسىنىڭ الىپ بايتەرەگى قادىردىڭ شىعارماشىلىق اسىل قازىناسىن ۇلىقتاۋ، اقىننىڭ رۋحىن كوتەرۋ، ءومىرى مەن شىعارماشىلىعىن ناسيحاتتاۋ، ءتىل مادەنيەتىن كوتەرۋ، حالىق اراسىنان شىققان ەرەكشە تالانتتاردى تانۋ ماقساتىندا ۇيىمداستىرىلىپ وتىر.

ءمۇشايراعا 18-35 جاس ارالىعىنداعى اقىندار قاتىسادى. ولار ءمۇشايراعا بۇرىن ەش جەردە جاريالانباعان ءۇش ولەڭىن جىبەرەدى.

اتاپ ايتقاندا، «قازاقتىڭ قادىرى» /اقىنعا ارناۋ/. ەل، جەر تاريحى تۋرالى. ەركىن تاقىرىپ. ولەڭدەر 15 شۋماقتان اسپاۋى كەرەك.

ولەڭدەرىن A4 فورماتتى قاعازدا كومپيۋتەردە تەرىپ، 2 دانا (ەلەكتروندى جانە قاعاز) تۇرىندە بۇركەنشىك اتپەن ۇيىمداستىرۋشىلارعا ۇسىنادى. قوسىمشا بولەك كونۆەرتكە شىعارماشىلىق مىنەزدەمە؛ جەكە كۋالىگىنىڭ كوشىرمەسى؛ 9x14 ءتۇرلى-ءتۇستى فوتوسۋرەتى؛ ءۇي جانە ۇيالى تەلەفوندارى؛ شىعارمالارى (2 دانا) سالىنادى. ءمۇشايرا جابىق تۇردە وتەدى.

ۇمىتكەرلەردىڭ شىعارمالارىن قازىلار القاسى انىقتاپ، جۇلدەگەرلەردى بەلگىلەيدى. ۇيىمداستىرۋ كوميتەتى ءمۇشايراعا قاتىسۋ تاپسىرىستارىن 2015 -جىلدىڭ 15 -مامىرىنا دەيىن قابىلدايدى. تاپسىرىلعان قۇجاتتار قايتارىلۋعا جاتپايدى. ال ىرىكتەۋدەن وتكەن شىعارمالار بايقاۋعا قاتىستىرىلىپ، كىتاپشاعا ەنگىزىلەدى.

باس جۇلدە - (بىرەۋ) - 100 مىڭ تەڭگە،

 I ورىن - (بىرەۋ) - 75 مىڭ تەڭگە،

  Ⅱورىن - (ەكەۋ) - 50 مىڭ تەڭگە،

  Ⅲورىن - (ۇشەۋ) - 40 مىڭ تەڭگە،

ىنتالاندىرۋ سىيلىعى - (بەسەۋ) - 20 مىڭ تەڭگە. قازىلار القاسىنىڭ شەشىمى تۇپكىلىكتى جانە قايتا قاراۋعا جاتپايدى. قازىلار القاسى قوسىمشا جۇلدەلەر تاعايىنداۋعا، جۇلدەلەردى ءبولىپ بەرۋگە نەمەسە بەرمەۋگە قۇقىلى.

اقىن ءمۇشايراعا ۇسىنعان شىعارمالارىن جاتقا بىلۋگە ءتيىس. جۇلدەگەر اقىندار ورال قالاسىندا وتەتىن قورىتىندى شاراعا ارنايى شاقىرىلادى، ولەڭدەرىن ساحنادا وقيدى.

ءمۇشايراعا بايلانىستى انىقتامالار مەن قوسىمشا مالىمەتتەردى مىنا مەكەنجاي ارقىلى بىلۋگە بولادى:

ورال قالاسى ق. امانجولوۆ كوشەسى، 53-ءۇي، وبلىستىق حالىق شىعارماشىلىعى ورتالىعى. بايلانىس تەلەفوندارى: 8/7112/ 24-21-69 فاكس: 51-07-72, е-mail: [e-mail].