باتىس قازاقستاندا قادىر مىرزا ءاليدىڭ 80 جىلدىعىنا ارنالعان شارالار باستالدى - فوتو
ج. مولداعاليەۆ اتىنداعى وبلىستىق عىلىمي-امبەباپ كىتاپحانا ديرەكتورىنىڭ ورىنباسارى سارا كەنجەبايەۆانىڭ حابارلاعانىنداي، اقىننىڭ تۋعان كۇنى - 5- قاڭتاردا وڭىردەگى بارلىق كىتاپحانالاردا ءبىر مەزگىلدە «قازاقتىڭ قادىرىن وقيمىز» اتتى شارا ۇيىمداستىرىلدى. سونىڭ ىشىندە ج. مولداعاليەۆ اتىنداعى وبلىستىق كىتاپحانادا «ولەڭ ءسوزدىڭ زەرگەرى - قادىر اقىن» اتتى شاراعا اقىندار، قازاقستان جازۋشىلار وداعىنىڭ مۇشەلەرى، حالىقارالىق «الاش» ادەبي سىيلىعىنىڭ لاۋرەاتى اقۇشتاپ باقتىگەرەيەۆا، ايتقالي نارىكوۆ، ب ق و مادەنيەت، مۇراعاتتار جانە قۇجاتتاما باسقارماسىنىڭ باسشىسى داۋلەتكەرەي قۇسايىنوۆ، ادەبيەتشى- عالىم، م. وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنىڭ پروفەسسورى سەرىكقالي شاراباسوۆ قاتىسىپ، قازاقتىڭ قادىرى تۋرالى ويلارىن ورتاعا سالدى. ستۋدەنت جاستار مەن بالاباقشا بۇلدىرشىندەرى اقىن ولەڭدەرىن وقىدى. كەلۋشىلەر نازارىنا فوتوسۋرەتشى رافحات حالەلوۆ تۇسىرگەن جانە ب ق و تاريحي-ولكەتانۋ مۋزەيىنەن الىنعان سۋرەتتەر كورمەسى، قادىر مىرزا ءاليدىڭ شىعارماشىلىعىنا ارنالعان «اسىل ءسوزدىڭ الداسپانى» اتتى كەڭ كولەمدى كىتاپ كورمەسى، سلايد-ۆيدەو ۇسىنىلدى.
وبلىستا اقىنعا ارنالعان شارالار جىل بويى وتەتىن بولادى. ماسەلەن، ورال قالالىق اكىمدىگىنىڭ قولداۋىمەن 18-35 جاس ارالىعىنداعىلار اراسىندا وبلىستىق قادىر وقۋلارى بيىل ءتورتىنشى رەت ۇيىمداستىرىلماق. تۋعان جەرى - سىرىم اۋدانىندا وقۋشىلار اراسىندا وبلىستىق قادىر وقۋلارى، اقىن تۋرالى فيلم ءتۇسىرۋ، ءتۇرلى بايقاۋلار مەن كونفەرەنتسيالار، جىر ءمۇشايرالارى، اس بەرىپ، دالا قىزىقتارىن وتكىزۋ كوزدەلۋدە.
ايتا كەتەيىك، بيىل ورال قالاسىندا قادىر اتىنداعى شىعارماشىلىق ورتالىق تا اشىلماقشى.
اۆتور: ەلجان ەرالى
