قانداستارىمىز شاكارىمنىڭ قولجازباسىن 80 جىل بويى ساقتاپ كەلگەن
قىتايدا تۇراتىن قازاقتاردىڭ اراسىندا اشارشىلىق كەزىندە قۋدالاۋعا ۇشىراپ، شەكارا اسىپ كەتكەندەر كوپ بولعانى بارشاعا ءمالىم. سولاردىڭ ىشىندە شاكارىمنىڭ كەنجە ۇلى زيات تا بار.
ول شەكارا اساردا وزىمەن بىرگە اكەسى شاكارىمنىڭ قولجازبالارىن الىپ وتكەن. كەيىننەن كەڭەس ۇكىمەتى ونى قىتايدان دا تاۋىپ الىپ، كەرى قايتارعان. ءبىراق ۇستالاردان بۇرىن زيات اكەسىنەن قالعان مۇرانى جەرگىلىكتى قانداستارىنا امانات ەتىپ ۇلگەرىپتى. ولار 80 جىل بويى سول مۇرانى ساقتاپ، كەيىن امانات ەتىپ قازاقستانعا جىبەرگەن.
وتىزىنشى جىلدارى زيات شاكارىم ۇلى قۇنانبايدىڭ ۇرپاقتارىمەن بىرگە قىتاي اسىپ، تارباعاتاي، التاي تاۋلارىن پانالاعان. زيات قىتاي جەرىندە ءجۇرىپ تە وقۋ- اعارتۋ جۇمىستارىنا بەلسەندى قاتىسادى. «شىنجاڭ-التاي» گازەتىندە قىزمەت ىستەگەن جىلدارى الاش قوزعالىسىنىڭ بەلسەندىلەرىمەن قويان-قولتىق ارالاسادى. كەيىننەن 1936 - جىلى قىزمەت بابىمەن ۇرىمشىگە قونىس اۋدارادى. سوندا ول تۇڭعىش رەت ءوزىنىڭ قۇپياسىن اشادى.
«كارىم دۇيسەبايەۆ دەگەن كىسى قازاقستاننان قاشىپ كەلگەن. وسى ادامعا زيات: «مەن ۇرىمجىگە كەتىپ بارا جاتىرمىن. ول جاقتا قازاق از. ءسىز قالىڭ قازاقتىڭ اراسىندا وتىرسىز عوي. مىناۋ اكەمنىڭ قولجازباسى ەدى. قۇدايعا امانات، سىزگە امانات!» - دەپ تاپسىرعان ەكەن»، - دەيدى جازۋشى، اقىن كوبەن اسقار ۇلى.
بۇل قۇندى قۇجات كارىمنىڭ قولىندا كوپ تۇرمايدى. ول دا كوپ زيالىنىڭ ىزىمەن ايداۋعا كەتەدى. سەزىكتەنسە كەرەك، ايدالاردان ءبىر اي بۇرىن اسىل مۇرانى ءوزىنىڭ شاكىرتى، قىتاي قازاقتارىنىڭ جازبا ادەبيەتىن قالاۋشىلاردىڭ ءبىرى اسقار تاتاناي ۇلىنا تاپسىرعان. اسقار ول كىتاپشانى كوزىنىڭ قاراشىعىنداي ساقتايدى. ءبىراق ول جازبالار كەيىن جوعالادى. جىلدار سالىپ كىتاپتى اسقاردىڭ ۇلى كوبەن تاۋىپ الىپ اكەسىنە قايتا تابىستايدى.
«اكەمە اكەلىپ بەرگەنىمدە ول ءوزىنىڭ اكەسى تىرىلگەندەي قۋاندى. «اپىراي، جارىقتىعىم-اي، سەن ولمەگەن ەكەنسىڭ عوي»، - دەپ كوزىنە جاس الدى. سودان ساقتاپ كەلدىك»، - دەيدى كوبەن اسقار ۇلى.
«تۇرىك، قازاق، قىرعىز ءھام حاندار شەجىرەسى» مەن ءوزىنىڭ ولەڭدەرى جازىلعان شاكارىم قولجازباسى جارتى عاسىردان استام ۋاقىت وسى جانۇيادا ساقتالىپ كەلدى. بۇگىندە كوبەننىڭ ۇلى ەرلان ونى قازاقستانعا الىپ باردى. قازىر ول قۇندى مۇرانى وتاندىق عالىمدار زەرتتەپ، انىق-قانىعىن تەكسەرۋدە. ال كوبەن اعامىز سان جىلدار ساقتاعان كىتاپتىڭ ناق شاكارىمنىڭ قولجازباسى ەكەنىنە كامىل سەنىمدى.
