قازاق ۇلتتىق ۋنيۆەرسيتەتىنىڭ 80 جىلدىعى - بۇكىل قازاق حالقىنىڭ تويى - ءابىلفايىز ىدىرىسوۆ

الماتى. قااقپارات - قازاق ۇلتتىق ۋنيۆەرسيتەتىنىڭ 80 -جىلدىعى - بۇكىل قازاق حالقىنىڭ تويى. بۇل تۋرالى بۇگىن ءال- فارابي اتىنداعى قازاق ۇلتتىق ۋنيۆەرسيتەتىندە وتكەن «قاريالار - التىن قازىنا» اتتى سالتاناتتى جيىندا تاريح عىلىمدارىنىڭ دوكتورى، پروفەسسور ءابىلفايىز ىدىرىسوۆ ءمالىم ەتتى.

ونىڭ ايتۋىنشا، قازاق ءبىلىمىنىڭ قارا شاڭىراعى اتانعان قازاق ۇلتتىق ۋنيۆەرسيتەتىنىڭ 80 جىلدىعى تەك ۋنيۆەرسيتەت ۇجىمى مەن ستۋدەنتتەرىنىڭ عانا ەمەس، بۇكىل قازاق حالقىنىڭ تويى.

«بۇل ۋنيۆەرسيتەتتەن كىمدەر شىقپادى. بۇل ۋنيۆەرسيتەتتە كىمدەر ىستەمەدى. مۇندا كەمەڭگەر جازۋشى مۇحتار اۋەزوۆ، كورنەكتى تاريحشى بەكماحانوۆ سەكىلدى ۇلى تۇلعالار جۇمىس ىستەدى. 80 جىلدىڭ ىشىندە ۋنيۆەرسيتەتتە 12 ادام رەكتور بولىپتى. بۇل اركىمنىڭ ماڭدايىنا بىتە بەرمەيتىن باق. مەن سولاردىڭ 10 ىن تىكەلەي بىلەمىن. بىرەۋىن ءجاي عانا بىلسەم، ەندى بىرەۋىن اعا رەتىندە بىلەمىن. قالعاندارىن زامانداس رەتىندە بىلەمىن. ال ۋنيۆەرسيتەتتىڭ مەرەيتويىمەن بارشا جۇرتشىلىقتى شىن جۇرەكتەن قۇتتىقتايمىن» - دەدى ءوز سوزىندە وسى قارا شاڭىراقتا 60 جىل ۇستازدىق ەتكەن تاريح عىلىمدارىنىڭ دوكتورى، پروفەسسور، قازاقستاننىڭ ەڭبەك سىڭىرگەن مادەنيەت قايراتكەرى ءابىلفايىز ىدىرىسوۆ. (ءابىلفايىز ىدىرىسوۆ- قازاقستاننىڭ سىرتقى ىستەر ءمينيسترى ەرلان ىدىرىسوۆتىڭ اكەسى)

ال وسى ۋنيۆەرسيتەتتە سوناۋ 1955 - جىلدان كۇنى بۇگىنگە دەيىن بەلسەنە قىزمەت اتقارىپ كەلە جاتقان مايتالمان ۇستاز، زاڭ عىلىمدارىنىڭ دوكتورى، پروفەسسور، ەلىمىزدىڭ تالاي ءىرى- ءىرى زاڭ جوبالارىن جاساۋعا بەلسەنە اتسالىسقان، بۇگىندە 84 جاسقا اياق باسقان زاڭگەر عالىم سۇلتان سارتايەۆ تا ءوز قۋانىشىن جاسىرمادى:

 «80 جىلدىڭ ىشىندە بۇل قاسيەتتى قارا شاڭىراق ەلىمىزگە قاجەتتى سان مىڭداعان مامانداردى تاربيەلەپ شىعاردى. ويتكەنى ءبىزدىڭ باستى ماقساتىمىز، قازاقستانعا قاجەتتى كادرلاردى دايارلاۋ بولدى. قازىر قازاقستاننىڭ قاي بۇرىشىنا بارساڭىز دا ءبىزدىڭ ۋنيۆەرسيتەتتى بىتىرگەن ازاماتتاردىڭ جۇمىس ىستەپ جۇرگەنىن كورەسىز. سونى كورگەندە قۋانامىز. ولار دا قۋانادى: «و، بۇل كىسىلەر ءبىزدىڭ وقىتۋشىلارىمىز بولعان» ، - دەسىپ جاتادى. مەن بۇگىن سولاردى دا وسى ۋنيۆەرسيتەتتىڭ 80 جىلدىعىمەن قۇتتىقتايمىن» ، - دەدى ءوز سوزىندە سۇلتان سارتايەۆ.

 ەستەرىڭىزگە سالا كەتەيىك، بۇگىن ءال- فارابي اتىنداعى قازۇۋ- دىڭ 80 جىلدىق مەرەيتويىنا ارنالعان ونكۇندىك اياسىندا وسى قارا شاڭىراقتىڭ ارداگەرلەرىنە قۇرمەت كورسەتەۋگە ارنالعان سالتاناتتى جيىن ءوتتى. جيىن بارىسىندا ۋنيۆەرسيتەتتىڭ 80 جىلدىق مەرەيتويى قارساڭىندا جەتكەن تابىستارى تۋرالى ارنايى فيلم كورسەتىلدى. سونىمەن قاتار، جيىن سوڭىندا ارداگەرلەر «ءال- فارابي اتىنداعى قازۇۋ- دىڭ 80 جىلدىق» مەرەيتويلىق مەدالىمەن ماراپاتتالدى. ودان باسقا، قادىرلى ۇستازدار ۋنيۆەرسيتەتتەگى جاڭا ينفراقۇرىلىمدىق نىساندارمەن، اتاپ ايتقاندا ستۋدەنتتەرگە قىزمەت كورسەتۋدىڭ جاڭا ۇلگىسى بولىپ تابىلاتىن «كەرەمەت» جاستار رەسۋرستىق ورتالىعىنىڭ جۇمىسىمەن جانە «ءال- فارابي» مۇراجايىمەن تانىستى.

اۆتور: جاپپاربەرگەن ايبوتا