حالىق جيناعان 807 توننا كومەكتىڭ 200 تونناسى قوستانايعا جەتتى - داۋلەت كارىبەك

بۇل تۋرالى «Amanat» پارتياسىنىڭ حاتشىسى داۋلەت كارىبەك ورتالىق كوممۋنيكاتسيالار قىزمەتىندە وتكەن بريفينگىدە ايتتى، دەپ حابارلايدى قازاقپارات ءتىلشىسى.

«قوستانايداعى ءتىلسىز جاۋمەن كۇرەسىپ جاتقان وتانداستارىمىزدىڭ جاعدايىنا بارشا ەل الاڭداپ وتىر. مەملەكەت باسشىسى قاسىم-جومارت كەمەل ۇلى قوستانايعا بارىپ، ورتتەن زارداپ شەككەن اۋماقتى تىكۇشاقپەن ارالاپ، زارداپ شەككەن ازاماتتارمەن كەزدەسكەنىن كورىپ، ءبىلىپ وتىرسىزدار. ەل باسىنا كۇن تۋعان كەزدە «Amanat» پارتياسى ەلدىڭ پارتياسى رەتىندە، مەملەكەت باسشىسىنىڭ قوعامدىق تىرەگى رەتىندە العاشقى كۇننەن باستاپ جۇمىلا كىرىسىپ، گۋمانيتارلىق كومەك ۇيىمداستىرۋمەن اينالىستى. ەل ازاماتتارىنىڭ ءبارى ءوز اماناتىن ءبىزدىڭ پارتيانىڭ گۋمانيتارلىق بەكەتتەرىنە تابىستاپ، قازىر 807 توننا كومەك جيىلدى. ونىڭ 100-200 تونناعا جۋىعى قوستانايعا جەتكىزىلدى»، - دەدى پارتيا حاتشىسى.

سونداي-اق ول «Amanat» پارتياسى ءورتتىڭ سالدارىن جويۋعا اتسالىساتىنىن جەتكىزدى.

«گۋمانيتارلىق كومەكتىڭ ىشىندە ازىق-تۇلىكتەن بولەك، جەكە گيگيەنالىق قۇرالدار مەن قۇرىلىس ماتەريالدارى دا بار. ويتكەنى ءورت سونگەننەن كەيىن ازاماتتاردىڭ ۇيىنە كىرۋى ماڭىزدى. وعان ءبىزدىڭ پارتيا مۇشەلەرى دە، «جاستار رۋحىنىڭ» ەرىكتىلەرى دە مىندەتتى تۇردە اتسالىسادى»، - دەدى داۋلەت كارىبەك.

ايتا كەتەيىك، بۇگىن مەملەكەت باسشىسى قاسىم-جومارت توقايەۆ قوستاناي وبلىسىنا جۇمىس ساپارىمەن باردى.

ءورت بولعان ەلدى مەكەن تۇرعىندارىمەن كەزدەسكەن پرەزيدەنت زارداپ شەگۋشىلەرگە ۇكىمەت ەكى ايدا بۇرىنعىدان دا جاقسى ۇيلەر سالىپ بەرەتىنىن ايتتى.

وڭىردەگى ءورتتى اۋىزدىقتاۋعا جۇزدەگەن تەحنيكا، مىڭداعان اداممەن بىرگە 7 بىردەي تىكۇشاق تارتىلدى.