قازاقستانداعى كيىكتەردىڭ سانى 800 مىڭنان استى
كيىكتەر سانى 2 جىل ىشىندە 2 ەسە ءوستى. بۇگىنگى تاڭدا ولاردىڭ سانى سانى 334 مىڭنان 842 مىڭعا دەيىن جەتكەن، دەپ حابارلايدى قازاقپارات ق ر ەكولوگيا مينيسترلىگىنىڭ باسپا ءسوز قىزمەتىنە سىلتەمە جاساپ.
بۇرىن حابارلانعانداي، كيىكتەر سانى سوڭعى رەت 2019 -جىلى تىركەلگەن. 2020 -جىلى كوروناۆيرۋس پاندەمياسىنا بايلانىستى ەسەپ جۇرگىزىلگەن جوق. جاڭا دەرەكتەر ەسەپتى قالپىنا كەلتىرۋ ناتيجەسىندە الىندى. قازاقستاندا كيىكتەردىڭ بەتپاقدالا، ورال جانە ءۇستىرت سەكىلدى 3 پوپۋلياتسياسى مەكەندەيدى. بۇل جانۋارلاردىڭ دۇنيەجۇزىلىك پوپۋلياتسياسىنىڭ 90 پايىزدان استامى ءبىزدىڭ ەلىمىزگە تيەسىلى.
ايتا كەتۋ كەرەك، وتكەن جىلداردا كيىكتەر سانىنىڭ ازايۋىنا بايلانىستى ۇكىمەت ولاردىڭ پوپۋلياتسياسىنىڭ جويىلىپ كەتۋىنە جول بەرمەۋ ءۇشىن كەشەندى شارالار قابىلداۋدا.
ەستەرىڭىزگە سالا كەتەيىك، كيىكتەردىڭ ساقتالۋى ولاردىڭ سانىنىڭ ⅩⅩ عاسىردىڭ 90 -جىلدارىنىڭ سوڭىندا 1 ميلليوننان 2003 -جىلى 21 مىڭ باسقا دەيىن ازايۋى ناتيجەسىندە پروبلەماعا اينالعان.
بۇل جانۋارلار سانىنىڭ ازايۋىنا ءتۇرلى اۋرۋلار مەن براكونەرلىك نەگىزگى سەبەپ بولدى. وسىعان وراي 2005 -جىلى تۇياقتى جانۋارلاردىڭ سيرەك كەزدەسەتىن جانە قۇرىپ كەتۋ قاۋپى تونگەن تۇرلەرى مەن كيىكتەردى ساقتاۋ جونىندەگى العاشقى باعدارلاما قابىلداندى.
تولدەۋ، قىستاۋ جانە كوشى- قون كەزەڭىندە كيىكتەر شوعىرلاناتىن نەگىزگى جەرلەردە ولاردى قورعاۋدىڭ تيىمدىلىگىن ارتتىرۋ ءۇشىن «ىرعىز- تورعاي» (اقتوبە وبلىسى) جانە «التىن دالا» (قوستاناي وبلىسى) مەملەكەتتىك تابيعي رەزەرۆاتتارى قۇرىلدى.
كيىكتەردى زاڭسىز اۋلاعانى ءۇشىن جاۋاپكەرشىلىكتى شارالارىن كۇشەيتۋ ماقساتىندا 2012 -جىلى ۇكىمەت قاۋلىسىمەن كيىكتەردى، ولاردىڭ بولىكتەرى مەن دەريۆاتتارىن قازاقستاننىڭ بۇكىل اۋماعىندا 2020 -جىلعا دەيىن پايدالانۋعا تىيىم سالىندى. بۇل مەرزىم كەيىنىرەك 2023 -جىلعا دەيىن ۇزارتىلدى.
2019 -جىلى براكونەرلىك ءۇشىن 12 جىلعا دەيىنگى مەرزىمگە باس بوستاندىعىنان ايىرۋعا جانە مۇلكىن تاركىلەۋگە دەيىنگى قاتال جازالاردى كوزدەيتىن زاڭنامانى قاتاڭداتۋ بويىنشا شارالار قابىلداندى.
«بۇدان باسقا، ەلىمىزدە جىل سايىن كەڭ اۋقىمدى «اقبوكەن» تابيعاتتى قورعاۋ اكسياسى وتكىزىلەدى. ونىڭ شەڭبەرىندە ەكولوگيا مينيسترلىگى مەن قۇقىق قورعاۋ ورگاندارى تولدەۋ جانە لاكتاتسيا كەزەڭىندە كيىكتەردى قورعاۋدى كۇشەيتۋ، سونداي- اق ەل اۋماعىندا تابيعاتتى قورعاۋ زاڭناماسىن بۇزۋشىلىقتاردىڭ جولىن كەسۋ بويىنشا بىرلەسكەن ءىس- شارالاردى جۇزەگە اسىرادى»، - دەلىنگەن حابارلامادا.
