سوڭعى 800 مىڭ جىلدا اتموسفەراداعى كومىرقىشقىل گازىنىڭ مولشەرى شارىقتاۋ شەگىنە جەتتى
استانا. قازاقپارات - اتموسفەراداعى كومىرقىشقىل گازىنىڭ مولشەرى 2016 -جىلى تاعى دا بۇكىل بۇرىنعى رەكوردتاردان اسىپ، سوڭعى 800 مىڭ جىلدىقتاعى ەڭ جوعارى كورسەتكىشكە جەتتى.
بۇل جايلى بۇكىل الەمدىك مەتەورولوگيالىق ۇيىمنىڭ جەنيەۆادا ۇسىنىلعان جاڭا بايانداماسىندا ايتىلدى،
دەپ حابارلايدى ب ۇ ۇ جاڭالىقتار ورتالىعى.
مامانداردىڭ ايتۋىنشا، СО2 گازىنىڭ مولشەرى بىلتىر ميلليونعا 403,3 بولشەك بولسا، 2015 -جىلى بۇل كورسەتكىش 400 بولشەك توڭىرەگىندە ەدى. ونىڭ كۇرت ارتۋىنا ەل- نينو تابيعات فەنومەنى مەن ادام قىزمەتىنىڭ اسەرى سەبەپ بولىپ وتىر.
«اتموسفەراعا زياندى زاتتاردى شىعارۋدى قىسقارتۋ ءۇشىن بەلسەندى شارالار قابىلداۋ قاجەت، ويتكەنى ءبىز شىعارعان ءاربىر СО2 مولەكۋلاسى اتموسفەرادا قالىپ، جينالا بەرەدى. قوقىس شىعارۋدى ازايتىپ، «ناۋالاردى» كوبەيتۋ قاجەت. ناۋا دەگەنىمىز - بيوسفەرا جانە مۇحيت. بيوسفەرا سو2 گازىنىڭ شامامەن 20 پروتسەنتىن جۇتىپ، وتتەگىگە اينالدىرادى»، - دەيدى ب م ۇ ساراپشىسى وكسانا تاراسوۆا.
ماماندار الەم ەلدەرىن كليمات جونىندەگى پاريج كەلىسىمىن ورىنداۋعا شاقىرۋدا. قۇجاتقا سايكەس، اتموسفەراداعى كومىرقىشقىل گازدىڭ كونتسەنتراتسياسىن ازايتۋ بويىنشا ءبىرقاتار شارا قابىلدانۋى ءتيىس.
