الماتىلىق 800 بوزبالا اسكەر قاتارىنا قابىلداندى
رەسمي شاراعا قالا اكىمى احمەتجان ەسىموۆ، ۇ و س جانە تىل ارداگەرلەرى، قازاقستان قارۋلى كۇشتەرىنىڭ وكىلدەرى قاتىستى.
«قۇرمەتتى ارداگەرلەر، ساربازدار، جينالعان قاۋىم. سىزدەردى بۇگىنگى وتان قورعاۋشى كۇنى مەرەكەسىمەن جانە جەڭىستىڭ 70 جىلدىعىمەن قۇتتىقتايمىن. وتان قورعاۋ - ەلىمىزدىڭ ءار ازاماتىنىڭ قاسيەتتى بورىشى، ءار ەر جىگىتتىڭ ازاماتتىق پارىزى. وتان قورعاۋدىڭ بيىك ۇلگىسىن قان مايداندا ءوز كەۋدەسىن وققا توسىپ، ءوز جانىن قۇربان ەتىپ ۇ و س ارداگەرلەرى كورسەتتى. بۇگىنگى كۇنى سۇراپىل سوعىستا جەڭىس تۋىنىڭ جەلبىرەۋىنە ۇلەس قوسقان ارداگەرلەر، باسقا دا قاقتىعىستا ازاماتتىق بورىشىن وتەگەن ازاماتتار ورتامىزدا. بۇگىنگى ساپتاعى اسكەرلەرگە قۇرمەت كورسەتۋ - ەل پارىزى. سوندىقتان ەلباسى باستاماسىمەن وتان قورعاۋشى كۇنى بەكىتىلىپ، مەملەكەتتىك مەرەكە رەتىندە ءۇشىنشى رەت اتالىپ وتىر. قارۋلى كۇشتەر جاساعى تويتارىسقا توتەپ بەرۋگە قاجەتتى زاماناۋي اسكەري تەحنيكامەن جابدىقتالعان. بۇگىندە ەلىمىزدىڭ قارۋلى كۇشتەرىنىڭ شەبەرلىگى مەن تەحنيكالىق دايىندىعىن كورسەتە تۇسەتىن استاناداعى اسكەري پارادتى تاماشالايتىن بولامىز. ق ر پرەزيدەنتى اتاپ وتكەندەي، ارميا - ءبىزدىڭ ەگەمەندى مەملەكەتىمىزدىڭ بەرىك قالقانى. ەندەشە، اسكەرىمىز قاشاندا ايبىندى بولسىن!»، - دەدى قالا اكىمى احمەتجان ەسىموۆ.
«ارداگەرلەردىڭ اتىنان سىزدەردى بۇگىنگى مەرەكەمەن قۇتتىقتايمىن. ءارقاشان مەنىڭ بۋىنىم ءوز ەلىن، جۇرتىن قورعاي ءبىلدى. قانداي قيىن ۋاقىتتا بولسىن. مەن سوعىستى باسىنان اياعىنا دەيىن وتكەن اداممىن. بۇدان بىلاي دا قازاقستان قارۋلى كۇشتەرىنىڭ جوعارى دارەجەدە بولۋىن تىلەيمىن»، - دەپ اق تىلەگىن جەتكىزدى ۇ و س ارداگەرى عابباس جۇماتوۆ.
رەسمي بولىمنەن سوڭ «28 پانفيلوۆشىلار» ساياباعىنا جينالعان مىڭداعان قالا تۇرعىندارى وتان قورعاۋشى مەيرامىنا وراي استانادا ءوتىپ جاتقان قازاقستان قارۋلى كۇشتەرىنىڭ اسكەري پارادىنىڭ بەينە ترانسلياتسياسىن تاماشالادى.
اۆتور: گۇلميرا عوسمانالي
