شىعىس قازاقستاندا 8000 تەكشە مەتر قار كوشكىنى جاساندى جولمەن ءتۇسىرىلدى

«وسكەمەن- گورنايا ۋلبينكا- سيەۆەرنوە» باعىتىنداعى جولدىڭ 30-37 شاقىرىمىندا قار كوشكىنىن جاساندى جولمەن ءتۇسىرۋ شارالارى جۇرگىزىلدى. الدىن الۋ شارالارى ەكى بىردەي بولىكتە وتكەندىكتەن اتالمىش جولدا قوزعالىسقا ۋاقىتشا شەكتەۋ قويىلعان بولاتىن.

 «جاساندى جولمەن تۇسكەن قاردىڭ كولەمى 8000 تەكشە مەتردى قۇراپ، جولدى تۇتاستاي جاۋىپ قالدى. ارنايى تەحنيكالار جولدى تۇسكە دەيىن ارشىپ ۇلگەردى. ساعات 12.30-دا كولىك قوزعالىسى قايتادان قالپىنا كەلتىرىلدى» - دەلىنگەن تجد باسپا ءسوز قىزمەتى تاراتقان اقپاراتتا.

 جاساندى جارىلىس كەزىندە ەشكىم زارداپ شەككەن جوق. وبلىستىڭ تاۋلى اۋداندارىندا كوشكىن قاۋپى بار. سوندىقتان توتەنشە جاعداي ماماندارى قارلى جوتالارعا شىقپاۋعا كەڭەس بەرەدى. ال «قازسەلدەن قورعاۋ» مەكەمەسى كۇن سايىن قاردىڭ قالىڭدىعىن ولشەپ، مونيتورينگ جۇرگىزىپ وتىر.

ماماندار كوشكىننەن ساقتانۋدىڭ تومەندەگىدەي ەرەجەلەرىن ۇسىنادى:

1. تولاسسىز قار جاۋعاننان كەيىن 2-3 كۇن بويى تاۋعا شىقپاۋ قاجەت.

2. تاۋدا جۇرگەندە اينالاڭىز ايقىن كورىنەتىنىنە كوز جەتكىزىڭىز. تۇمان كوشكىن قاۋپىن ارتتىرۋى مۇمكىن.

3. كوشكىن قاۋپى بار دەگەن اۋماقتان شۋلاماي، ايقايلاماي ءوتۋ قاجەت.

4. قارى كەتپەگەن تاۋدىڭ ماڭىندا ايالداپ، شاتىر تىگۋگە بولمايدى.

5. كوشكىن قاۋپى بار اۋماقتا كولىك قاڭتارۋدان اۋلاق بولىڭىز.

اۆتور: ەسىمجان ناقتىباي