الاكول جاعالاۋىندا جالپى قۇنى 800 ميلليون تەڭگە بولاتىن 3 ءىرى دەمالىس ورنى اشىلادى
وبلىس باسشىسى ساپارىن الدىمەن ەتتى باعىتتاعى اسىل تۇقىمدى ءىرى قارا وسىرۋمەن اينالىساتىن «ارقارلى ماي بۇيرەك» ج ش س- نى ارالاۋدان باستادى.
جۋىردا مۇندا اۆستراليادان 3 مىڭ باس «انگۋس»، «گەرەفورد» تۇقىمدى ءىرى قارا مال اكەلىنگەن. شەتەلدەن اكەلىنگەن مال باسىنىڭ سانى بويىنشا اتالمىش شارۋاشىلىق رەسپۋبليكادا الدىڭعى قاتاردان كورىنۋدە. بۇگىنگى كۇنى شارۋاشىلىقتا اسىل تۇقىمدى مال سانى ەسەلەپ ارتىپ، مۇندا، اسىرەسە انالىق مال باسىن كوبەيتۋگە دەن قويىلعان. شارۋاشىلىق ديرەكتورى ەرمەك مايقىنوۆتىڭ ايتۋىنشا، شارۋاشىلىق اسىل تۇقىمدى ءىرى قارا سانىن 10 مىڭعا جەتكىزۋدى ماقسات ەتىپ قويعان. جەرگىلىكتى تۇرعىندار قولدا بار مالدارىنىڭ تۇقىمىن اسىلداندىرۋدىڭ تيىمدىلىگىن ۇعىنىپ، شارۋاشىلىقتان بۇقا ساتىپ الۋعا قىزىعۋشىلىق تانىتىپ وتىر.
مۇنان سوڭ وبلىس اكىمى ا. باتالوۆ لەپسى اۋىلىنداعى ۋشينسكي اتىنداعى ورتا مەكتەپ جانىنداعى سپورتتا دارىندى بالالارعا ارنالعان وبلىستىق مەكتەپ- ينتەرنات فيليالىنىڭ جۇمىسىمەن تانىستى. مۇندا جاتتىقتىرۋشىلارمەن جانە سپورتشىلارمەن اڭگىمەلەسىپ، ولارعا زور دەنساۋلىق، ايتۋلى جەتىستىكتەر تىلەدى.
سونىمەن قاتار ايماق باسشىسى ءىرى قارا وسىرۋگە ماماندانعان «شىنجىلى» شارۋا قوجالىعىندا بولدى. جۇمىس ساپارى ودان ءارى ءۇشارال قالاسىنداعى «الاكول- كومىر» ج ش س- ءنىڭ LB1500 اسفالت بەتون زاۋىتىندا جالعاستى. وسىدان ءبىر اي بۇرىن زاۋىت اسفالتتىڭ العاشقى تونناسىن شىعارعان. كاسىپورىن ديرەكتورى ەلجان ابدراحمانوۆتىڭ مالىمدەۋىنشە، جەرگىلىكتى جانە رەسپۋبليكالىق ماڭىزداعى جولدارعا قولدانىلاتىن اسفالت بەتون - زاۋىتىڭ نەگىزگى ءونىمى. سونداي- اق، مۇندا تازا جانە ەلەنگەن قۇم، ءتۇرلى قيىرشىق تاستاردىڭ 7 ءتۇرى شىعارىلادى.
زاۋىت تەحنولوگياسىمەن تانىسقان وبلىس اكىمى ا. باتالوۆ: «زاماناۋي اسفالت بەتون زاۋىتىن اشۋ - اۋدان ءۇشىن اسا قاجەتتى ءىس. بۇل جاڭا زاۋىت ەلباسى نۇرسۇلتان ءابىش ۇلى نازاربايەۆتىڭ شاعىن جانە ورتا بيزنەستى دامىتۋ تۋرالى تاپسىرماسىنىڭ ورىندالۋىنا ءوزىنىڭ ۇلەسىن قوسادى دەپ سەنەمىن. ۇجىمنىڭ ىسىنە ساتتىلىك تىلەيمىن»، - دەدى.
سول سياقتى ءوڭىر باسشىسى وسى كۇنى ءۇشارال اسكەري اۋەجايىن ارالاپ كوردى. مۇندا الماتى- تالدىقورعان- ءۇشارال باعىتىندا جۇرەتىن جولاۋشىلار ءۇشىن 50 ادامدىق اۋەجاي بوي كوتەرەتىن بولادى.
جۇمىس ساپارىنىڭ سوڭىندا وبلىس باسشىسى ا. باتالوۆ الاكول كولى ماڭىندا تۋريزم كلاستەرىن دامىتۋعا باسا نازار اۋداردى. اقشي اۋىلى مەن وسىندا ورنالاسقان تۋريستىك نىسانداردى ەلەكتر ەنەرگياسىمەن تۇراقتى قامتاماسىز ەتۋشى «ەنەرگو قۋات» ج ش س جۇمىسىمەن تانىستى. بۇل ماقساتقا رەسپۋبليكالىق جانە وبلىستىق بيۋدجەتتەن 623 ميلليون تەڭگە بولىنگەن. 10 كيلوۆولتتىق ەلەكتر تاراتۋ جەلىسى تولىعىمەن ىسكە قوسۋعا دايىن، ال ەكى جاڭا پودستانسيانىڭ مونتاج جۇمىستارى اياقتالدى. سول سياقتى وبلىس اكىمى ماماندارمەن بىرگە الاكول اۋدانىندا تۋريزمدى دامىتۋ جوسپارىن تالقىلادى. جوسپاردا الاكول كولىنە باراتىن جولدى جوندەۋ، اقشي اۋىلىنداعى 5 كوپ قاباتتى تۇرعىن ءۇيدى رەكونسترۋكسيالاۋ، سۋ قۇبىرلارىن جوندەۋ قاراستىرىلعان. وسى جوبالاردىڭ بارلىعىنا قارجى قاراستىرىلعان، ولاردى جۇزەگە اسىرۋ ءىسى بەلسەندى جۇرگىزىلۋدە.
جالپى، بۇگىنگى كۇنى الاكول جاعالاۋىندا دەمالۋشىلارعا 93 تۋريستىك ينفراقۇرىلىم نىساندارى قىزمەت ۇسىنادى جانە تاۋلىگىنە 3500 ادام قابىلداۋعا مۇمكىندىگى بار. ولاردى دامىتۋ ءىسى ودان ءارى جالعاستىرىلماق. ماسەلەن، 2016 -جىلى جالپى قۇنى 800 ميلليون تەڭگە بولاتىن 750 ورىندى 3 ءىرى دەمالىس ايماعىن ىسكە قوسۋ جوسپارلانعان. سونىمەن قاتار SPA- سالونى مەن ينفراقۇرىلىمى دامىعان ءتورت جۇلدىزدى قوناق ءۇي قۇرىلىسى باستالادى.
- بالقاش- الاكول باسسەينىنىڭ تۋريستىك مۇمكىندىگى ايرىقشا جانە ساناتورلىق- ساۋىقتىرۋ عانا ەمەس، بالامالى تۋريزمدى دە دامىتۋدىڭ بولاشاعى زور. تەك ماقساتقا جەتۋ جولىندا ساپالى، ناتيجەلى جۇمىس جۇرگىزۋ قاجەت، - دەدى ا. باتالوۆ قورىتىندى سوزىندە.
