اتىراۋلىق جاستار 80-90 مىڭ تەڭگە جالاقىعا ەڭبەك ەتۋدەن باس تارتۋدا

اتىراۋ. قازاقپارات - اتىراۋلىق جاستار تابىسى 80-90 مىڭ تەڭگە بولاتىن جۇمىستاردان باس تارتىپ وتىر.

بۇل تۋرالى جاستار ىستەرى جونىندەگى كەڭەس وتىرىسىندا ايتىلدى، دەپ حابارلايدى قازاقپارات اگەنتتىگى.

وبلىستىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى ەركىن شپانوۆتىڭ ايتۋىنشا، جۇمىسسىز جاستاردىڭ ءبىرىن جالاقىنىڭ مولشەرى قاناعاتتاندىرماسا، ءبىرى ناقتى مۇناي- كەن ورىندارىندا ەڭبەك ەتكەندى قالايدى. بۇگىندە ولار تابىسى 80-90 مىڭ بولاتىن جۇمىستاردان باس تارتىپ وتىر.

قازىر اتىراۋ وبلىسىندا ەكى مىڭنان استام جاس - جۇمىسسىز.

«جۇمىسقا الىنعان كەزدە وزدەرىن كورسەتە الماي، ەنجارلىق تانىتاتىن نەمەسە جۇمىسقا قابىلدانار الدىندا شاقىرىلعان تەستىلەۋگە ءارتۇرلى سىلتاۋمەن كەلمەي قالاتىن جاستار دا كەزدەسەدى. مىسالى، 2016 -جىلى جۇمىس بەرۋشىلەردەن 21 مىڭنان استام ۆاكانسيا (بوس ورىن) تۋرالى مالىمەت ءتۇستى. ولاردىڭ 60 پايىزى جاستار ءۇشىن قاراستىرىلدى. «سەنىمدى قۇرىلىس»، «سينوپەك» مەكەمەلەرىنە تەستكە شاقىرىلعان 814 ادامنىڭ ىشىنەن 263 ى كەلمەي قالدى. 197 سى تەلەفونعا جاۋاپ بەرمەدى»، - دەيدى ەركىن شپانوۆ.

ونىڭ ايتۋىنشا، اتىراۋلىق كاسىپكەرلەر جۇمىسشى ماماندىعىنا ادام تابا الماي جاتادى. جاستاردىڭ قۇرىلىس سالاسىنا دا قۇلشىنىس تانىتپاۋى، جۇمىس بەرۋشىلەردى ەڭبەك ميگرانتتارىن جۇمىلدىرۋعا ماجبۇرلەپ وتىر. جاستارىمىز ەڭبەك ءوتىلى مەن تاجىريبەلەرىنىڭ جوقتىعىنا قاراماستان، «قارا جۇمىستان» گورى كەڭسەدە وتىراتىن نەمەسە مول تابىستى مۇناي- گاز كومپانيالارىندا قىزمەت ەتكەندى قالايدى.

دەگەنمەن، رەسپۋبليكادا جاستار اراسىنداعى جۇمىسسىزدىقتىڭ جالپى دەڭگەيى 3,9 پايىز بولسا، اتىراۋدا بۇل كورسەتكىش 0,7 پايىزدى قۇراپ وتىر. ياعني، جاستاردى جۇمىسپەن قامتۋ جاعىنان اتىراۋ وبلىسى الدىڭعى ورىندا. جىل قورىتىندىسى بويىنشا، جۇمىسپەن قامتۋ ورتالىعىنا حابارلاسقان 8400 جاستىڭ 5660 ى ەڭبەككە ورنالاستى.

ەردوس قاسىم