كەلەر جىلى مۇنايدىڭ الەمدىك باعاسى باررەلىنە 80 دوللارعا، 2016 - جىلعا قاراي 90 دوللارعا بولجاندى - ە. دوسايەۆ
بۇگىن پارلامەنت ءماجىلىسىنىڭ جالپى وتىرىسىندا «2015-2017 - جىلدارعا ارنالعان رەسپۋبليكالىق بيۋدجەت تۋرالى» زاڭ جوباسى بويىنشا بايانداعان ۇلتتىق ەكونوميكا ءمينيسترى ەربولات دوسايەۆ وسىلاي مالىمدەدى.
«دۇنيەجۇزىلىك بانكتىڭ دەرەكتەرىنە سايكەس، كەلەسى جىلى الەمدىك ەكونوميكانىڭ ءوسىمى ءوسۋدىڭ ۇزاقمەرزىمدى ورتا قارقىنىنىڭ ءتورت پايىزىنا جاقىندايدى. قالىپتاسىپ جاتقان سىرتقى جانە ىشكى فاكتورلاردى ەسكەرە وتىرىپ، 2015-2019 - جىلدارعا ارنالعان ەلدىڭ الەۋمەتتىك ەكونوميكالىق دامۋ بولجامىنىڭ بازالىق سسەناريىنىڭ پارامەترلەرى قايتا قارالدى. بۇل رەتتە 2015 - جىلعا ارنالعان مۇناي باعاسىنىڭ بولجامدى دەڭگەيى باررەلىنە 90 دوللاردان 80 دوللارعا دەيىن تومەندەتىلدى. 2016-2019 - جىلدارعا ارنالعان مۇناي باعاسى باررەلىنە 90 دوللار دەڭگەيىندە ساقتالادى»، - دەدى مينيستر ەربولات دوسايەۆ.
ونىڭ ايتۋىنشا، مەتال باعاسى كەلەسى جىلى بيىلعى دەڭگەيدە ساقتالادى، ال 2019 - جىلعا قاراي 5,4 پايىزعا ءوسۋى بولجانادى.
«مۇناي ءوندىرۋ دەڭگەيى ەلىمىزدە بۇعان دەيىن ماقۇلدانعان كولەمدە ساقتالادى. 2015 - جىلى 81 ميلليون 800 مىڭ توننانى قۇراسا، 2019 - جىلى 96 ميلليون تونناعا دەيىن ودان ءارى ۇلعايتىلادى»، - دەدى مينيستر ە. دوسايەۆ.
اۆتور: قانات مامەتقازى ۇلى
