اقمولا پوليتسەيلەرى 7 ميلليون تەڭگەنىڭ مالىن ۇرلاعان كۇدىكتىلەردى ۇستادى
جاقسى اۋدانىنىڭ بەلاعاش اۋىلىنىڭ تۇرعىنى 12-تامىزدا ۇساق مالدىڭ ۇرلانعانى تۋرالى وتىنىشپەن جۇگىندى.
جەرگىلىكتى كاسىپكەردىڭ ايتۋىنشا، بەلگىسىز بىرەۋلەر شالعاي ۋچاسكەنىڭ اۋماعىنان 123 قويدى ۇرلاپ كەتكەن. پوليتسەيلەر ءمان-جايلاردى تەكسەرە كەلە، قاسكۇنەمنىڭ جازعى شارباعىنان مالداردى الىپ، اۋىل تۇرعىنىنا 7 ميلليون تەڭگەدەن استام زالال كەلتىرگەنىن انىقتادى.
وسى فاكتىگە قاتىستى پوليتسيا قىزمەتكەرلەرى ق ر ق ك-نىڭ 188-1-بابى 4-بولىگى (مال ۇرلىعى) بويىنشا سوتقا دەيىنگى تەرگەپ-تەكسەرۋدى باستادى جانە جەدەل-ىزدەستىرۋ ءىس-شارالارىنىڭ كەشەنىن جۇرگىزدى.
قابىلدانعان شارالاردىڭ ناتيجەسىندە جاقسى اۋدانىنىڭ پوليتسيا ءبولىمىنىڭ قىزمەتكەرلەرى قىسقا مەرزىمدە ءىرى ۇرلىق جاسادى دەگەن كۇدىككە ىلىنگەن توپتىڭ 4 مۇشەسىن اشكەرەلەپ، ۇستادى. ءبىر قىزىعى، ۇستالعانداردىڭ ءبىرى جابىرلەنۋشىنىڭ تۋعان جيەنى بولىپ شىقتى جانە ول مال باسىنىڭ سانى مەن ورنالاسقان جەرى تۋرالى ناقتى اقپاراتتى بىلگەن.
تەرگەۋ ارەكەتتەرىن جۇرگىزۋ كەزىندە ۇستالعانداردىڭ تورتەۋى دە اتباسار قالاسىنىڭ تۇرعىندارى جانە ەت ونىمدەرىن ساتىپ الۋشىلار ەكەنى انىقتالدى. ولار ۇرلانعان قويلاردىڭ ەتىن جەرگىلىكتى ءدامحانالارعا، ەت ساتۋ دۇكەندەرىنە جانە جەكە ادامدارعا ساتقان. بارلىق ايعاقتار ارنايى تەرگەۋ ءىس- شارالارى بارىسىندا راستالدى. قازىرگى ۋاقىتتا قىلمىستىق ءىستى تەرگەۋ جالعاسىپ جاتىر. پوليتسەيلەر ۇستالعانداردىڭ ايماق اۋماعىنداعى باسقا دا وسىنداي قىلمىسقا قاتىسى بار-جوعىن تەكسەرىپ جاتىر.
