مەترو ءىسى: تالعات اردان مەن قانات سۇلتانبەكوۆ 7 جىلعا سوتتالدى
«قانات سۇلتانبەكوۆ قىلمىستىق كودەكستىڭ 189-بابىنىڭ 2-تارماعى جانە 28-باپتىڭ 3-بولىگىنە سايكەس كىنالى دەپ تانىلسىن. مەملەكەتتىك سالادا قىزمەت اتقارۋ قۇقىعىنان ءومىر بويىنا ايىرا وتىرىپ، 7 جىلعا باس بوستاندىعىنان ايىرۋ جازاسى تاعايىندالسىن. جازاسىن قاۋىپسىزدىك دەڭگەيى ورتاشا دەڭگەيدەگى قىلمىستىق-اتقارۋ جۇيەسى مەكەمەسىندە وتەسىن»، - دەدى سۋديا ۆيكتوريا سەمەنوۆا ۇكىمدى وقي وتىرىپ.
ايتا كەتسەك، ت. اردان مەن ق. سۇلتانبەكوۆكە قاتىستى ۇكىم سىرتتاي شىعارىلدى.
سۋديا ونىڭ سەبەبىن ەكى سوتتالۋشىنىڭ دا قازاقستاننان تىس جەردە ەكەنىن جانە سوتقا كەلۋدەن جالتارۋىمەن بايلانىستىردى.
«تالعات اردان قىلمىستىق كودەكستىڭ 189-بابى 4-بولىگىنىڭ 2-تارماعى بويىنشا كىنالى دەپ تانىلسىن. ايىپتىنى مەملەكەتتىك سالادا قىزمەت اتقارۋ قۇقىعىنان ءومىر بويىنا ايىرا وتىرىپ، 7 جىلعا باس بوستاندىعىنان ايىرۋ جازاسى تاعايىندالسىن. جازاسىن قاۋىپسىزدىك دەڭگەيى ورتاشا قىلمىستىق-اتقارۋ جۇيەسى مەكەمەسىندە وتەسىن»، - دەدى سۋديا.
ەسكە سالا كەتسەك، وتكەن جىلى سىبايلاس جەمقورلىققا قارسى ءىس-قيمىل اگەنتتىگىنىڭ 1- دەپارتامەنتىنىڭ اسا ماڭىزدى ىستەر جونىندەگى تەرگەۋشىسى دانيار بەكايداروۆ «استانا LRT» كومپانياسى بويىنشا ءىس سوتقا جولدانعانىن حابارلاعان ەدى.
كەيىنىرەك وسى ءىس بويىنشا العاشقى سوت وتىرىسى قاشان وتەتىنى بەلگىلى بولدى.
ايتا كەتسەك، مەملەكەت باسشىسى قاسىم-جومارت توقايەۆ LRT ءىسى بويىنشا جاۋاپتى ادامدار باقىلاۋشى ورگانداردىڭ سۇراعىنا جاۋاپ بەرۋى كەرەكتىگىن ەسكەرتكەن بولاتىن.
سونداي-اق پرەزيدەنت بىلتىر كۇزدە LRT قۇرىلىسىن جەدەلدەتۋدى جانە وعان قاتىستى ءىستى تەرگەۋدى تاپسىرعان بولاتىن.
ارتىنشا وتكەن جىلدىڭ قاڭتار ايىندا سىبايلاس جەمقورلىققا قارسى ءىس-قيمىل اگەنتىگىنىڭ ەكىنشى دەپارتامەنتىنىڭ باسشىسى سەرگەي پەروۆ ەلوردادا LRT قۇرىلىسىن سالۋ بارىسىندا قاراجات ۇرلاۋ قىلمىستىق ءىسىن تەرگەۋ شارالارى اياقتالعانىن ءمالىم ەتكەن ەدى.