استانادا 7 ايلىق نارەستەنىڭ باۋىرى الماستىرىلدى، دونور - اكەسى
«مەنىڭ ۇلىما باۋىر تسيرروزى دياگنوزى قويىلعان. انا مەن بالا ورتالىعىنىڭ دارىگەرلەرى ترانسپلانتاتسيانى ەمدەۋدىڭ ەڭ ءتيىمدى ءادىسى دەپ ايتتى. ارينە، مۇنى ەستىگەنىمىزدە بالامىزدان ايىرىلىپ قالامىز با دەگەن قورقىنىش بولدى. جۇبايىم دونور بولۋعا مۇمكىندىگى بار ەكەنىن بىلگەن سوڭ، دارىگەرلەرگە سەنىپ، بارلىق اناليزدەردى بىردەن تاپسىرىپ، دايىندىقتى باستاپ كەتتىك. وپەراتسيادان امان-ەسەن ءوتىپ، ءبىر جەڭىلدەپ قالدىق. قورقىنىش بولدى، ءبىراق سەنىمىمىز الدامادى. سوندىقتان، بالامىزدى امان ساقتاپ قالعان انا مەن بالا ورتالىعىنىڭ بارشا دارىگەرىنە العىس ايتامىز»، - دەيدى اناسى قارلىعاش.
بالانىڭ اعزاسىن اۋىستىرۋ ءۇشىن جاپونيا مەن نەپالدان ماماندار شاقىرتىلعان. وپەراتسيا «University Medical Center» كورپوراتيۆتىك قورىنىڭ بازاسىندا وتكىزىلدى. ترانسپلانتاتتاۋ بارىسىنا نارەستەنىڭ جاسى (7 اي) مەن سالماعىنىڭ ازدىعى (8 ك گ) اسەر ەتىپ قانا قويماي، سونىمەن قاتار جاعدايىنىڭ وتە اۋىر بولۋى، تىنىس الۋىنىڭ بۇزىلۋى مەن باسقا دا اسقىنۋلار قيىنداتتى. دەگەنمەن، وپەراتسيا ءساتتى ءوتىپ، جاعداي تۇراقتانعان سوڭ، بالا مەن اكەسى اۋرۋحانادان شىعارىلدى. قازىرگى تاڭدا ولاردىڭ جاعدايى جاقسى.
وپەراتسيا «قازاقستان حالقىنا» قوعامدىق قورىنىڭ قولداۋىمەن جاپونيانىڭ ۇلتتىق دەنساۋلىق جانە دامۋ ورتالىعىنىڭ (توكيو) ورگانداردى ترانسپلانتاتسيالاۋ ورتالىعى دارىگەرلەرىمەن بىرلەسىپ، «1 جاسقا دەيىنگى بالالاردىڭ باۋىر ترانسپلانتاتسياسى» تاقىرىبىنداعى تالىمگەرلىك شەبەرلىك سىنىبى شەڭبەرىندە جۇرگىزىلدى. شاقىرتىلعان ماماندار «University Medical Center» ق ق قىزمەتكەرلەرىنە باۋىر ترانسپلانتاتسياسىن جۇرگىزۋگە مۇقتاج ناۋقاستاردى وپەراتسيا الدىنداعى دايارلاۋ، انەستەزيولوگيالىق جاردەم، جەدەل تەحنيكا جانە وپەراتسيادان كەيىنگى باسقارۋ تاقىرىپتارى بويىنشا 3 كۇن بويى وقىتتى.
ايتا كەتسەك، ەرتە جاستاعى ناۋقاستارعا، اسىرەسە دەنە سالماعى 10 ك گ از بالالارعا باۋىر ترانسپلانتاتسياسى جەتكىلىكتى داعدى مەن تاجىريبەنىڭ بولماۋىنا بايلانىستى قازاقستان رەسپۋبليكاسىندا جۇرگىزىلمەيدى. سوندىقتان، وسىنداي وقۋ، داعدىلار مەن تەحنولوگيالاردى مەڭگەرۋ دەرتتىڭ اسقىنۋ سانىن ازايتىپ، ناۋقاستاردىڭ ءومىر ءسۇرۋ ساپاسى مەن ۇزاقتىعىن جاقسارتپاق.