قارۋ- جاراق ساۋداسىنىڭ ءىرى ارناسى مەن 7 زاڭسىز سەح جويىلدى

استانا. قازاقپارات - ءىرى اۋقىمدا زاڭسىز قارۋ اينالىمىمەن اينالىسقان قىلمىستىق توپ ارەكەتىنىڭ جولى كەسىلدى، دەپ حابارلايدى قازاقپارات ۇلتتىق قاۋىپسىزدىك كوميتەتىنىڭ باسپا ءسوز قىزمەتىنە سىلتەمە جاساپ.

29-ناۋرىزدا ق ر ۇ ق ك ىشكى ىستەر مينيسترلىگىمەن بىرلەسىپ، ەكى ۆەدومستۆونىڭ ارنايى ماقساتتاعى بولىمشەلەرىن تارتا وتىرىپ، ءىرى اۋقىمدا زاڭسىز قارۋ اينالىمىمەن اينالىسقان قىلمىستىق توپ ارەكەتىنىڭ جولىن كەستى.

قىلمىستىق سحەمانىڭ قاتىسۋشىلارى وقسىز اتىلاتىن، جاراقاتتايتىن، بەلگى بەرەتىن جانە وزگە دە ولىمگە الىپ كەلمەيتىن قارۋدى كەيىننەن «قارا نارىقتا» وتكىزۋ ءۇشىن قايتا جاساۋمەن اينالىسقان.

ارنايى وپەراتسيا استانا، الماتى قالالارىندا جانە اقتوبە، الماتى، باتىس قازاقستان، قاراعاندى، سولتۇستىك قازاقستان جانە تۇركىستان وبلىستارىندا ءبىر مەزگىلدە جۇرگىزىلدى.

ناتيجەسىندە قىلمىستىق سحەماعا قاتىسى بار دەگەن كۇدىكپەن 23 ادام ۇستالدى. 32 اۆتومات، 88 تاپانشا، 37 مىلتىق (بارلىعى 157 بىرلىك قارۋ)، 9 گراناتا جانە ءارتۇرلى كاليبرلى 27390 وق- ءدارى الىندى.

قارۋ مەن وق- دارىلەر جاساۋعا ارنالعان ارنايى جابدىقتارى مەن جيناقتارى بار 7 قولدان جاسالعان سەحتىڭ جاسىرىن ارەكەتى جويىلدى.

ۇستاۋ الدىندا ۇزاق جەتە تەكسەرۋ جۇرگىزىلىپ، ونىڭ بارىسىندا ءارتۇرلى كاليبرلى ۇرىس پاتروندارى مەن وق- دارىلەرگە كەلتىرىلىپ قولدان جاسالعان «كالاشنيكوۆ» اۆتوماتىن، ءۇش تاپانشانى جەدەل ساتىپ الۋ جۇزەگە اسىرىلدى.

2023 -جىلدىڭ اقپانىندا ۇ ق ك اقتوبە وبلىسىندا ۇيىمداستىرۋشىلارى اتالعان قىلمىستىق توپپەن بايلانىسى بار قارۋدى قولدان جاساۋمەن اينالىسقان شەبەرحانانىڭ جۇمىسىن توقتاتتى.

جەدەل جولمەن قىلمىستىق سحەمانىڭ بارلىق تىزبەگى اشىلدى.

قارۋدى وتكىزۋ تاسىلدەرى، سونىڭ ىشىندە «Darkshop» دەپ اتالاتىن ينتەرنەتتىڭ كولەڭكەلى سەگمەنتىندەگى ساۋدا الاڭدارى انىقتالدى.

توپ مۇشەلەرى قۇپيالىلىق پەن قاۋىپسىزدىكتىڭ قاتاڭ شارالارىن ساقتاعان، ءارقايسىسىنىڭ ءرولى مۇقيات ءبولىنىپ بەرىلگەن (جاساۋشىلار، ساتۋشىلار، دەلدالدار جانە ت. ب.).

سوتقا دەيىنگى تەرگەۋ جۇرگىزىلىپ جاتىر.

زاڭسىز قارۋ ساتۋ جانە ساتىپ الۋعا قاتىسى بار باسقا دا ادامداردى انىقتاۋ بويىنشا جۇمىس جالعاسادى.