قاڭتار قاسىرەتى: 7 مەديتسينا قىزمەتكەرى زارداپ شەكتى
بۇل تۋرالى ق ر د س م مەديتسينالىق جانە فارماتسيەۆتيكالىق باقىلاۋ كوميتەتىنىڭ ءتوراعاسى باۋىرجان بايسەركين ايتتى، دەپ حابارلايدى قازاقپارات ءتىلشىسى.
«جالپى، اتالعان كەزەڭ ىشىندە 20 دەنساۋلىق ساقتاۋ نىسانىنا شاۋىل جاسالدى. ونىڭ ىشىندە الماتى قالاسىندا 5 ستاتسيونار، م س ا ك- تىڭ 1 نىسانى، 14 ءدارىحانا بار. وسى ارالىقتا 7 مەديتسينا قىزمەتكەرى، ونىڭ ىشىندە 5 ەۋى الماتىدا، بىرەۋى شىمكەنتتە جانە تاعى بىرەۋى الماتى وبلىسىندا زارداپ شەكتى»، - دەدى كوميتەت ءتوراعاسى ورتالىق كوممۋنيكاتسيالار قىزمەتىندەگى باسپا ءسوز ءماسليحاتى بارىسىندا.
ونىڭ اتاپ وتۋىنشە، 46 جەدەل جاردەم كولىگى زاقىمداندى. زاڭىمدانعان كولىكتەردىڭ باسىم بولىگى الماتى قالاسىندا - 32. سونىمەن قاتار 4 كولىك جارامسىز بولىپ قالدى.
«توتەنشە جاعداي كەزىندە قاننىڭ جەتكىلىكتى كولەمىن قامتاماسىز ەتۋ ءۇشىن ەلوردادان الماتى قالاسىنداعى رەسپۋبليكالىق قان ورتالىعىنا شامامەن 360 دوزا قان جەتكىزىلدى. بۇل احۋال ۋشىققان جاعدايدا قولدانۋعا ارنالعان قور جاساۋ ءۇشىن جاسالدى. سونىمەن قاتار ىشكى ىستەر مينيسترلىگىمەن «سق فارماتسيا» كومپانياسىنىڭ الماتى، شىمكەنت، نۇر-سۇلتان، اقتوبە قالالارىنداعى ءىرى قويمالاردا تۇرعان ءدارى- دارمەكتى تاۋلىك بويى قورعاۋ بويىنشا جەدەل ءىس- شارا قابىلداندى. ول جەردە تەگىن مەديتسينالىق كومەكتىڭ كەپىلدەندىرىلگەن كولەمىنە كىرەتىن بارلىق ءدارى- دارمەك ساقتالادى. سونىمەن قاتار ناركوتيكالىق جانە پسيحوتروپتى دارىلىك زاتتار دا بار»، - دەدى كوميتەت ءتوراعاسى.
باۋىرجان بايسەركيننىڭ اتاپ وتۋىنشە، اتالعان كەزەڭدە قاۋىرت جەلى ۇيىمداستىرىلدى. ولارعا 4 مىڭنان استام قوڭىراۋ ءتۇستى.
