ەرەيمەنتاۋ اۋدانىنا نەگىزگى كاپيتالعا سالىنعان ينۆەستيتسيا كولەمى 7 ميلليارد تەڭگەدەن استى
بۇل تۋرالى جۋرناليستەرمەن «ەرەيمەنتاۋ اۋدانىنىڭ الەۋمەتتىك- ەكونوميكالىق دامۋىنىڭ 2021 -جىلعى توعىز ايداعى قورقىتىندىسى» تاقىرىبىمەن وتكەن بريفينگتە اۋدان اكىمى اباي ءالجانوۆ ءمالىم ەتتى، دەپ حابارلايدى قازاقپارات ءتىلشىسى.
«بۇگىن ءبىز مەملەكەت باسشىسىنىڭ حالىقتىڭ ءال- اۋقاتىن كوتەرۋدى قامتاماسىز ەتۋ تۋرالى العان قويعان مىندەتتەمەسىن ورىنداۋعا بار كۇش- جىگەرىمىزدى سالۋدامىز»، - دەپ اتاپ ءوتتى اۋدان اكىمى.
بريفينگتە ايتىلعانداي، اۋداننىڭ ونەركاسىپ ءونىمىنىڭ نەگىزگى ۇلەسى - 42,8 پايىزدى قۇرايدى، ياعني قايتا وندەۋ ونەركاسىبىنە تيەسىلى. «اۋداندا «Nur Otan» پارتياسىنىڭ «وزگەرىستەر جولى: ءار ازاماتقا لايىقتى ءومىر!» جول كارتاسىن جۇزەگە اسىرۋ اياسىندا «سارى ادىر كومىر رازرەزى»، «كىرپىش زاۋىتى» جۇمىسىنا قايتا جانداندى.
ءوندىرىستىڭ وسۋىنە «ءبىرىنشى جەل ەلەكتر ستانسياسى» جاۋاپكەرشىلىگى شەكتەۋلى سەرىكتەستىگى نەگىزگى ۇلەس قوستى. وندا شامامەن 3,3 ميلليارد تەڭگە سوماسىنا 97,3 ميلليون مەگاۆات ەلەكتر ەنەرگياسى ءوندىرىلدى. ەلەكترمەن جابدىقتاۋ، بۋ، گاز بەرۋ جانە اۋانى باپتاۋ ۇلەسى-38,2 پايىزدى قۇرادى. «قازاقستان ينجينيرينگ اۆتوجوندەۋ زاۋىتى» اكسيونەرلىك قوعامىنىڭ جىل سوڭىنداعى ءوندىرىس كولەمى 1,6 ميلليارد تەڭگە بولادى»، - دەپ تولىقتىردى اۋدان اكىمى.
اۋدان اكىمى اتاپ وتكەندەي، 2021 -جىلدىڭ 3 توقسانىنىڭ قورىتىندىسى بويىنشا اۋداننىڭ ونەركاسىپ كاسىپورىندارى قولدانىستاعى باعامەن 10,4 ميلليارد تەڭگەگە (شاعىن كاسىپورىنداردى، قوسالقى وندىرىستەردى قوسا العاندا) نەمەسە 2020 -جىلدىڭ ءتيىستى كەزەڭىنە 98,9 پايىز (9,6 ميلليارد تەڭگە) ءونىم ءوندىردى.
«توعىز ايدىڭ قورىتىندىسى بويىنشا نەگىزگى كاپيتالعا سالىنعان ينۆەستيتسيالار كولەمى 7 ميلليارد 356,6 ميلليون تەڭگەنى - 111,1 پايىزدى قۇرادى. ونەركاسىپ سالاسىندا ينۆەستيتسيالار «ەرەيمەنتاۋ ۆيند پاۋەر» ج ش س، «ەلەكتروسەستروي» ج ش س، «گولدەن ەنەردجي كورپ» ج ش س، «قىزىلتۋ» ج ش س سياقتى كاسىپورىندار ەسەبىنەن 5 ميلليارد تەڭگەدەن استام سومانى قۇرادى. 2022 -جىلى قۋاتتىلىعى 100 م گ ۆ بولاتىن تاعى ءبىر جەل پاركىن اشۋ جوسپارلانۋدا»، - دەپ تۇيىندەدى اۋدان اكىمى.
اۆتور: اسلان وسپانوۆ
