ەلوردادا پاتەردى جوندەپ جاتقان جۇمىسشى سەيفتى 7-قاباتتان لاقتىرىپ جىبەرگەن
كريمينالدىق پوليتسيا قىزمەتكەرلەرى 25 جاستاعى كۇدىكتىنى ۇستادى.
«تەرگەۋ بارىسىندا انىقتالعانداي، ايەل ادام پاتەردە جوندەۋ جۇمىستارىن جۇرگىزۋ ءۇشىن جۇمىسشىنى شاقىرعان. جۇمىس ىستەپ ءجۇرىپ جاس جىگىت بالكوندا تۇرعان سەيفكە كوزى تۇسەدى. ءتۇرلى قۇرالمەن ونى بۇزىپ اشپاق بولادى، ءبىراق بۇل ارەكەتىنەن تۇك شىقپايدى. ىشىندە ءىرى كولەمدە اقشا بار دەپ ويلاپ، كۇدىكتى سەيفتى 7-قاباتتان تەرەزەدەن لاقتىرىپ جىبەرىپ، ءوزى تەز ارادا پاتەردەن شىعىپ كەتكەن. سەيف تۇسكەن جەرگە كەلىپ، ونىڭ اشىلماعانىن كورىپ، كۇدىكتى وقيعا ورنىنان قاشىپ كەتەدى»، - دەپ حابارلادى ۆەدومستۆودان. وقيعانىڭ كۋاگەرلەرى پوليتسيا شاقىرعان. انىقتالعانداي، سەيفتە قۇجاتتار مەن 4500 ا ق ش دوللارى بولعان. قازىر ۇرى ۇستالدى. قىلمىستىق ءىس قوزعالىپ، ايعاقتار تاركىلەندى. ەر ادامنىڭ بۇعان دەيىن ەلوردادا بولعان وسىنداي باسقا وقيعالارعا قاتىسى بار ما تەكسەرىلىپ جاتىر. بۇعان دەيىن ونىڭ ۇرلىق جاساعانى ءۇشىن سوتتالعانى انىقتالدى.
اۆتور: اقبوپە ءابدراسۋل