كرەديتتى جىلدام جابۋدىڭ 7 ءادىسى
ق ر ۇلتتىق بانكى بولسا 5 ميلليون قازاقستاندىقتىڭ 4 تريلليون تەڭگەگە جۋىق بانكتە قارىزى بار ەكەنىن جانە پروبلەمالى قارىزى بارلاردىڭ ۇشتەن ەكىسى كرەديتورلاردان قاشىپ جۇرگەنىن مالىمدەدى. ال مۇنداي جاعدايعا تاپ بولماۋ ءۇشىن كرەديتتى تەزىرەك جاۋىپ تاستاعان ءجون. ەندەشە كرەديتتى جىلدام جابۋعا قاتىستى ءتيىمدى كەڭەستەردى ۇسىنامىز.
1. شىعىندى ەسەپتەۋ
ەڭ الدىمەن ءوزىڭىزدىڭ كىرىسىڭىز بەن شىعىنىڭىزعا ساراپتاما جاساۋ نەمەسە اي سايىنعى ناتيجەنى جازىپ وتىراتىن ەسەپ كىتاپشاسىن ارناۋ. بۇل قانداي نارسەدەن ۇنەم جاساۋعا بولاتىنىن جانە ۇنەمدەلگەن اقشانى پايدالى ىسكە، ياعني كرەديتتى جابۋعا كومەكتەسەتىنىن تۇسىنۋگە مۇمكىندىك بەرەدى. باستىسى - تولەم كەستەسىن جاساپ الىپ، سول كەستەدەن كەشىكپەي نەسيەنى تولەۋگە تالپىنۋ كەرەك.
ەستە ساقتاڭىز! اي سايىنعى شىعىنداردى قىسقارتامىن دەپ وزىڭىزگە قاجەتتى ءدارى- دارمەكتى ساتىپ الۋدان نەمەسە جەكە شوتتارعا اقشا تولەۋدەن باس تارتۋعا بولمايدى. ال شوپپينگ نەمەسە ويىن- ساۋىققا جۇمسالعان قارجى ۋاقىتشا بولسا دا ءسىزدىڭ كرەديتىڭىزدىڭ جابىلۋىنا كەدەرگى كەلتىرەدى.
2. ءبارىن كەيىنگە شەگەرىپ، ۇنەمدەڭىز
ءوزىڭىزدىڭ شىعىن جوسپارىڭىزعا ءبىر قاراپ، ونى تاعى %30 عا ازايتىڭىز. سىرتتان تاماقتانۋ نەمەسە اۆتوماتتان كوفە ساتىپ الۋ سياقتى ءتۇرلى ۇساق- تۇيەكتەردەن باس تارتىڭىز. سوندا قانشا اقشا ۇنەمدەگەنىڭىزدى ءوزىڭىز دە بايقاپ، كەيبىر نارسەلەردى كەيىنگە شەگەرىپ، كرەديتكە تولەنەتىن قارجىنى ارتىعىمەن شىعارىپ الاسىز.
3. قوسىمشا كىرىس كوزدەرىن تاۋىپ الۋ كرەديتتى جىلدام جاۋىپ تاستاۋ ءۇشىن ءوزىڭىزدى قوسىمشا جۇمىس ىستەۋدەن اياماڭىز. ءوزىڭىز جۇمىس ىستەيتىن جەردەن اقشا تولەنەتىن ارتىق جۇمىس ۋاقىتىن سۇراپ كورىڭىز نەمەسە كەيىن جاي عانا كەتىپ قالاتىن قوسىمشا ءىس ىستەڭىز (جەكە ساباقتار بەرۋ، كونسۋلتاتسيا وتكىزۋ، ماتىندەر جازۋ، الەۋمەتتىك جەلىدەگى جۇمىستار ت. ب. ). تاپقان تابىسىڭىزدى تەزدەتىپ كرەديتىڭىزدى جابۋعا جۇمساڭىز. سونداي- اق، ەسكى قارىزداردى دا قايتارۋدى ۇمىتىپ كەتپەڭىز.
4. ايىنا %10 ارتىق تولەۋ
كوپشىلىگى بەلگىلەنگەن سومانى ۋاقىتىمەن وتەپ وتىرسام ۇنەمدەيمىن دەپ ويلايدى. ءبىراق شىن مانىندە بانك كرەديتتى تومەنگى پايىزدا ەسەپتەپ، ءسىزدىڭ ۇزاق ۋاقىت بويى تولەۋىڭىزدى، ال كرەديت ۇيىمى ءسىز ارقىلى پايدا تابۋىن قامتاماسىز ەتەدى.
سوندىقتان كرەديت بويىنشا تولەمدى %10 عا ارتتىرۋ كەرەك. ال ەگەر بىرنەشە كرەديتىڭىز بولسا باسقاشا امال ارەكەت جاساۋعا تۋرا كەلەدى. مىسالى يپوتەكا، اۆتوكولىك ساتىپ الۋعا، پاتەردىڭ جوندەۋ جۇمىستارىنا الىنعان نەسيە. مۇنداي جاعدايدا بارلىق كرەديتتىڭ %10 ىن جابۋدان ەشنارسە ۇتپايسىز، ەسەسىنە كىشىدەن ۇلكەنگە قاراي ۇمتىلساڭىز، جاعداي ءبىراز جەڭىلدەيدى. الدىمەن كرەديت بويىنشا تولەم سوماسىن ارتتىرىپ جانە ونى بىرنەشە ايعا جابا تۇرىڭىز. سودان كەيىن مىسالى اۆتوكولىك ءۇشىن الىنعان كرەديتكە كەتەتىن قاراجاتتى ەكىنشى ءبىر كرەديتتى جابۋعا جۇمسايسىز جانە ونىڭ ۇستىنە %10 دى قوسامىز. وسىلايشا قارىزدى ەكى- ءۇش ەسەگە جىلدام جابۋعا بولادى.
5. الدىمەن پايىزى جوعارى كرەديتتى جابۋ
قازىرگى ۋاقىتتا باسىندا ءبىر ەمەس بىرنەشە كرەديتى بار قازاقستاندىقتار جوق ەمەس. بىرنەشە نەسيەنى جىلدام جابۋدىڭ تاعى ءبىر جولى بار. بىرىنشىدەن، پايىزدىق مولشەرلەمەسى ەڭ جوعارى قارىزدى جاۋىپ تاستاۋ. مۇنداي نەسيەنى جاۋىپ تاستاۋ ارتىق تولەم قۇنىن تومەندەتەدى، ال ۇنەمدەلگەن اقشانى ەكىنشى ءبىر قارىزدى جابۋعا جۇمساڭىز. باستىسى ەكى جاقتى تولەم جاسايمىن دەپ نەسيە مەرزىمىن وتكىزىپ الۋدان اۋلاق بولىڭىز.
ەكىنشىدەن، ەڭ قىمبات كرەديتتى جاۋىپ تاستاعان سوڭ سوماسى از قارىزداردى تولەۋگە كىرىسىڭىز. ال يپوتەكا سياقتى ۇزاق مەرزىمدى كرەديتتەرمەن سوڭىندا اينالىسىڭىز.
6. كرەديتتى قايتا قارجىلاندىرۋ
بورىشكەرلەر - بانك ءۇشىن باعالى ادامدار. سوندىقتان ولار باسقا دا قىزمەت تۇرلەرىن ۇسىناتىنى بەلگىلى. سولاردىڭ ءبىرى كرەديتتى قايتا قارجىلاندىرۋ. ءبۇل دەگەنىمىز - العاشقى كرەديتتى جابۋ ءۇشىن جاڭا كرەديت راسىمدەۋ. ءارى مۇنداي كرەديتتىڭ پايىزدىق مولشەرلەمەسى تومەن بولادى جانە ارتىق تولەم بولماۋى مۇمكىن. الايدا كىشىگىرىم نەسيەنى وتەۋ ءۇشىن ءىرى كولەمدە كرەديت الۋدىڭ قاجەتى جوق.
7. كرەديتتى تولىق جابۋ
كرەديت بويىنشا تولەم اياقتالعاننان كەيىن، بانكتەن ەشقانداي قارىزىڭىز جوق ەكەندىگى تۋرالى انىقتاما الىڭىز. كەيدە جاي عانا تيىن قالىپ قالعان جاعدايدا ونىڭ ۇستىنە پايىزى، بانكتىڭ كوميسسياسى قوسىلادى. وسىلايشا ءسىز شىعىنعا باتىپ قالۋىڭىز مۇمكىن. سوندىقتان مۇنداي ولقىلىقتار بولماس ءۇشىن، ءارى كەلەسى ءبىر نەسيە العاندادا قوسىمشا قاجەتتى قۇجات رەتىندە انىقتاما بولعانى ءجون.