قازاقستاندا ازاماتتىعى جوق 7 مىڭ ادام تىركەلگەن
«COVID-19» ىندەتى ازاماتتىعى جوق ادامداردىڭ جاعدايىن ودان ءارى قيىنداتا ءتۇستى. سەبەبى جەكە باسىن كۋالاندىراتىن قۇجات بولماعان سوڭ، ول ازاماتقا مەديتسينالىق نەمەسە الەۋمەتتىك كومەك كورسەتىلمەيدى»، - دەدى ازاماتتىعى جوق ماسەلەلەر جونىندەگى وڭىرلىك كەڭەسشى، ب ۇ ۇ بوسقىندار ىستەرى جونىندەگى جوعارى كوميسسار باسقارماسىنىڭ ورتالىق ازيا بويىنشا وكىلى رومان مارين ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
ونىڭ ايتۋىنشا، قازاقستان اۋماعىندا وتكەن جىلدىڭ قازان ايىنان باستاپ ازاماتتىعى جانە جەكە كۋالىگى جوق ازاماتتاردى انىقتاۋعا ارنالعان بىرلەسكەن اكسيا ءوتتى.
«ءبىز قازاقستان رەسپۋبليكاسىندا ءار ادامنىڭ جەكە قۇقىعى قورعالىپ، ونىڭ ازاماتتىعىن زاڭداستىرۋدا بارلىق مۇمكىندىك قاراستىرىلعانىنا سەنىمدىمىز. وتكەن جىلدىڭ سوڭىندا قازاقستان اۋماعىندا ازاماتتىعى جوق 7 مىڭ ادام تىركەلدى.
ايتىپ وتكەن ءجون، «ازاماتتىعى جوق» مارتەبەسىن رەسمي تۇردە العان ادام، زاڭ اياسىندا ءوز قۇقىعىن قورعاپ، ازاماتتىعى بار ادامدارمەن بىردەي مۇمكىندىكتەردى قولدانا الادى. قازاقستاندا بۇل باعىتتاعى جۇمىستاردى ءى ءى م قۇزىرلى جانە ۇكىمەتتىك ەمەس ۇيىمدارمەن بىرلەسىپ اتقارىپ جاتقان ەڭبەگى ءوز جەمىسىن بەرىپ جاتىر. ءبىز دە ءوز تاراپىمىزدان ازاماتتىعى جوق ادامدارعا جان- جاقتى قولداۋ كورسەتۋگە ءازىرمىز»، - دەيدى ول.
ايتا كەتسەك، وسىعان دەيىن ق ر ءى ءى م كوشى- قون كوميتەتىنىڭ وكىلى ەلىمىزدە جەكە كۋالىگى جوق 4,6 مىڭنان استام ازامات انىقتالعانىن ايتتى.
اۆتور: ءالي يبرايەۆ
