الماتىدا ءبىر مەزەتتە 7 مىڭ ادام قۇلشىلىق ەتە الاتىن مەشىت سالىنىپ جاتىر - فوتو

الماتى. قازاقپارات - قازاقستان مۇسىلماندارى ءدىني باسقارماسىنىڭ ءتوراعاسى ناۋرىزباي قاجى تاعان ۇلى الماتى قالاسىنا جاساعان رەسمي ساپارىندا الاتاۋ اۋدانىندا سالىنىپ جاتقان جاڭا ءزاۋلىم مەشىتتىڭ قۇرىلىسىمەن تانىستى، دەپ حابارلايدى قازاقپارات ءتىلشىسى ق م د ب باسپا ءسوز قىزمەتىنە سىلتەمە جاساپ.

باس ءمۇفتي جاڭا مەشىتتىڭ قازاقى ناقىشتا سالىنۋىنا نازار اۋداردى. سونىمەن قاتار جاماعاتقا قولايلى كولىك تۇراعىنىڭ بولۋىنا كوڭىل ءبولدى. ايتا كەتسەك، الاتاۋ اۋدانىندا بوي كوتەرىپ جاتقان قۇلشىلىق ۇيىندە ءبىر مەزەتتە 7 مىڭ ادام ناماز وقي الادى. مەشىتتىڭ قۇرىلىس جۇمىسىن وسى جىلدىڭ جەلتوقسان ايىندا ءبىتىرۋ جوسپارلانعان. عيماراتتىڭ جالپى الاڭى - 16 مىڭ شارشى مەتر. ارحيتەكتۋرالىق جوباعا سايكەس، مەشىتتە بيىكتىگى 75 مەترلىك بىرنەشە مۇنارا بولادى. كەشەننىڭ ورتالىق بولىگىندە 9 كۇمبەزدى نەگىزگى عيمارات ورنالاسادى.

سونداي-اق ونىڭ قۇرامىنا يسلام كىتاپحاناسى، اكىمشىلىك بولىك، ناماز وقيتىن زالى بار ايەلدەر كورپۋسى، ءدىني راسىمدەر وتكىزۋگە ارنالعان زال، وقۋ- اعارتۋ توپتارىنا ارنالعان جانە مەدرەسە سىنىپتارى بار ەرلەر بولىگى، سونداي- اق، شەبەرحانا مەن دۇكەندەر كىرەدى. قمدب ءتوراعاسى ناۋرىزباي قاجى تاعان ۇلى مەشىتتىڭ قۇرىلىسىمەن تانىسقان سوڭ الماتى قالاسىنىڭ جاڭادان تاعايىندالعان باس يمامى تولەبي وسپانعا ناقتى تاپسىرمالار بەردى.

اۆتور: الما مۇقانوۆا