بيىل قازاقستاننىڭ 7 وڭىرىندە اۆتوجولدار جوندەلىپ، پايدالانۋعا بەرىلدى

ق ر يندۋستريا جانە ينفراقۇرىلىمدىق دامۋ مينيسترلىگىنىڭ مالىمەتىنشە، بۇگىنگە دەيىن جالپى ۇزىندىعى 399 شاقىرىم بولاتىن رەسپۋبليكالىق ماڭىزى بار اۆتوموبيل جولىنىڭ 8 ۋچاسكەسى قولدانىسقا بەرىلدى.

قۇرىلىس ەلىمىزدىڭ 7 وڭىرىندە اياقتالدى. ماسەلەن، پاۆلودار وبلىسىندا «نۇر-سۇلتان-پاۆلودار» تاسجولىنىڭ 91 شاقىرىمى پايدالانۋعا بەرىلدى. سولتۇستىك قازاقستان وبلىسىندا جولشىلار ۇزىندىعى 36 شاقىرىم بولاتىن «پەتروپاۆل-ر ف شەكاراسى، كوكشەتاۋ قالاسىنا كىرەبەرىس» ۋچاسكەسىن قايتا جاڭارتتى. ال ماڭعىستاۋ وبلىسىندا «بەينەۋ-اقجىگىت» جولىنىڭ 0-85 شاقىرىمى جانە «جەتىباي- جاڭاوزەن» جولىنىڭ 73 شاقىرىمى تاپسىرىلدى.

اقتوبە وبلىسىندا رەسپۋبليكالىق ماڭىزى بار «اقتوبە-قاندىاعاش-اتىراۋ» اۆتوجولىنىڭ ۇزىندىعى 17 شاقىرىمدىق ۋچاسكەسى رەكونسترۋكتسيادان ءوتىپ، قولدانىسقا بەرىلدى. بۇدان بولەك، اتىراۋ وبلىسىندا «اتىراۋ-استراحان» تاسجولىنىڭ 20 شاقىرىمدىق اۋماعى مەن الماتى وبلىسىندا «ءۇشارال - دوستىق» جولىنىڭ 30-60 ك م ۋچاسكەسى دە جاڭارتىلدى. سونداي-اق، جول كومپانيالارى ورتالىق-وڭتۇستىك ءدالىزىنىڭ ەكى اۋماعىن پايدالانۋعا بەردى. ول - 47 شاقىرىمدى قۇرايتىن قاراعاندى قالاسىنىڭ سولتۇستىك جانە شىعىس اينالما جولى.

ايتا كەتەيىك، بيىل ەلىمىزدە جاڭارتۋ جۇمىسىمەن رەسپۋبليكالىق ماڭىزى بار اۆتوجولداردىڭ 4 مىڭ شاقىرىمى قامتىلعان.