كاسىپكەرلەرگە بەرىلەتىن نەسيە 7 ميلليارد تەڭگەگە دەيىن ۇلعايتىلدى

«كاسىپكەرلەرگە «بيزنەستىڭ جول كارتاسى-2025» جانە «قاراپايىم زاتتار ەكونوميكاسى» باعدارلامالارى بويىنشا قارىزعا قاراجات تۇپكىلىكتى %6 بەن بەرىلەدى. «بيزنەستىڭ جول كارتاسى-2025» باعدارلاماسى بويىنشا بەرىلەتىن نەسيە سوماسى 7 ميلليارد تەڭگەگە دەيىن ۇلعايتىلدى.

سۋبسيديالاۋ مەرزىمى - 5 جىل.

«قاراپايىم زاتتار ەكونوميكاسى» باعدارلاماسى بويىنشا نەسيە سوماسى شەكتەلمەيدى. ال سۋبسيديالاۋ مەرزىمى - 10 جىل. كەپىلدىك قۇرالدارى دا جاقسارتىلعان.

«بيزنەستىڭ جول كارتاسى-2025» بويىنشا كەپىلدىك - نەسيە سوماسىنىڭ %85 ىن قۇراۋى مۇمكىن.

«قاراپايىم زاتتار ەكونوميكاسى» بويىنشا كەپىلدىك نەسيە سوماسىنىڭ %50 ىن قۇرايدى. «بيزنەستىڭ جول كارتاسى 2025» باعدارلاماسىنان سالالىق شەكتەۋلەر الىنىپ تاستالدى. بۇل شاعىن جانە ورتا بيزنەسكە، قىزمەت تۇرىنە قاراماستان، باعدارلامانىڭ قاتىسۋشىسى بولۋعا جانە جەڭىلدەتىلگەن قارجىلاندىرۋعا مۇمكىندىك بەرەدى.

تاۋارلار مەن قىزمەتتەردىڭ ءتىزىمى «قاراپايىم زاتتار ەكونوميكاسى» باعدارلاماسى اياسىندا ايتارلىقتاي كەڭەيتىلدى»، - دەلىنگەن ءاليحان سمايىلوۆ دەپۋتاتتاردىڭ ساۋالىنا بەرگەن جاۋابىندا.

ول وسى باعدارلاما بويىنشا نەسيەلەندىرۋدىڭ جالپى كولەمى 1 تريلليون تەڭگەگە دەيىن ۇلعايتىلعانىن ەسكە سالدى.

«سونىمەن قاتار، ۇلتتىق بانك سالالىق شەكتەۋسىز، ونىڭ ىشىندە جەكە كاسىپكەرلەر ءۇشىن شاعىن جانە ورتا بيزنەستى جەڭىلدەتىلگەن نەسيەلەۋ باعدارلاماسىن ىسكە قوستى. نەسيەلەر اينالىم قاراجاتىن تولىقتىرۋ ءۇشىن 1 جىلعا %8 بەن بەرىلەدى. بۇل باعدارلاماعا 600 ميلليارد تەڭگە بولىنگەن.

جالپى، نەسيە بەرۋ شارالارىن ارتتىرۋ ءۇشىن كوپتەگەن شەكتەۋ الىنىپ تاستالدى، تەتىكتەر جەڭىلدەتىلدى.

«بيزنەستىڭ جول كارتاسى-2025» باعدارلاماسى اياسىندا مەملەكەت باسشىسىنىڭ تاپسىرماسى بويىنشا جاڭا باعىت - ميكرو جانە شاعىن بيزنەسكە شاعىن نەسيە بەرىلە باستادى. بيزنەستىڭ وسى ساناتى ءۇشىن سۋبسيديالار ارقىلى نەسيەلەر %6 مولشەرلەمەمەن بەرىلەدى. نەسيەلەر اينالىم قاراجاتىن تولىقتىرۋعا 5 ميلليون تەڭگەگە دەيىن، وندىرىستىك قاجەتتىلىككە 20 ميلليون تەڭگەگە دەيىن بولىنەدى»، - دەدى ۆيتسە-پرەمەر.

سونىمەن قاتار، ول قىزمەت تۇرلەرىنە ەشقانداي شەكتەۋدىڭ جوقتىعىن باسا ايتتى.