كوكشەتاۋدا كارانتين قايتا كۇشەيتىلدى: قالا سىرتىنا 7 بلوكپوست قويىلادى
اقمولا وبلىسىنىڭ باس سانيتارلىق دارىگەرى ايناگۇل مۋسينا قالا تۇرعىندارىنا وسىنداي شۇعىل مالىمدەمە جاسادى، دەپ حابارلايدى قازاقپارات ءتىلشىسى.
«14 - ماۋسىمداعى جاعداي بويىنشا وبلىستا كوروناۆيرۋس ينفەكسياسىن جۇقتىرۋعا قاتىستى 199 جاعداي تىركەلدى، ونىڭ تورتەۋى قايعىلى اياقتالدى. وبلىس ورتالىعىندا جاعداي كۇردەلەنە ءتۇستى. مونيتورينگ توبىنىڭ جۇمىسى تۇرعىنداردىڭ ءوزى مەن تۋىستارىنىڭ دەنساۋلىعىنا نەمقۇرايدى قارايتىندىعىن كورسەتتى. جاپپاي وتباسىلىق شارالار - تۋعان كۇن، ۇيلەنۋ تويى، كىسىنىڭ جىلىن بەرۋ، جەرلەۋ راسىمدەرى ءتارىزدى شارالاردىڭ وتكىزىلەتىندىگىن كورسەتتى. سانيترالىق ەپيدەميولوگيالىق تالاپتاردى ورىندامايتىن كاسىپورىندار دا بار. بارلىق جاعداي بويىنشا اكىمشىلىك شارالار قولدانىلۋدا»، دەلىنگەن حابارلامادا.
سوڭعى اپتادا كوكشەتاۋ قالاسى بويىنشا قاۋىپتى ۆيرۋس جۇقتىرعاندار سانى 42 ادامدى قۇرادى. ونىڭ ىشىندە اۋرۋ بەلگىسى بارلار – 15، اۋرۋ بەلگىسى بىلىنبەيتىندەر - 27.
ەسكە سالا كەتەيىك، سيمپتومى جوقتار - ولاردا اۋرۋدىڭ جوتەلۋ، دەنە قىزۋىنىڭ كوتەرىلۋى سياقتى وزگە دە بەلگىلەرى بىلىنبەيدى. الايدا، زەرتتەۋ قورىتىندىسى وڭ ناتيجە بەرىپ، ولاردىڭ ۆيرۋستى بەلسەندى تاسىمالداۋشى ەكەنىن كورسەتتى.
بۇگىنگى تاڭدا اقمولا وبلىستىق تۋبەركۋلەزگە قارسى ديسپانسەرىنىڭ جۇقپالى اۋرۋلار بولىمشەسىندە 49 ادام، پروۆيزولىق ستانسيونارىندا 63 ەمدەلىپ جاتىر. ەپيدەميولوگيالىق جاعدايعا بايلانىستى شەكتەۋ شارالارىن قايتا كۇشەيتۋ تۋرالى شەشىم شىعارىلدى. ايتالىق، 15 – ماۋسىم كۇنى كەشكى ساعات 20:00 باستاپ اقمولا وبلىسىنىڭ باس سانيتارلىق دارىگەرىنىڭ قاۋلىسى كۇشىنە ەنەدى.
كوكشەتاۋ قالاسىنىڭ اينالاسىنداعى 7 بلوكپوست قالپىنا كەلتىرىلىپ، ازىق- تۇلىك جانە تۇرمىستىق حيميا، ازىق- تۇلىك ەمەس تاۋارلاردى ساتاتىن ساۋدا ورىندارىنىڭ، سپورتتىق نىساندارى، قوعامدىق تاماقتانۋ كاسىپورىندارى مەن ءدىني مەكەمەلەردىڭ جۇمىسى شەكتەلەدى. بۇل شارالار كوروناۆيرۋس ينفەكسياسىنىڭ تارالۋىن بولدىرماۋ جانە تۇرعىنداردىڭ دەنساۋلىعىن ساقتاۋ ءۇشىن قاجەت. بۇعان تۇسىنىستىكپەن قاراۋدى جانە جەكە قاۋىپسىزدىك شارالارىن ساقتاۋدى سۇرايمىز. ۇيدەن شىعۋدى شەكتەۋ، ماسكا تاعۋ، قولدى انتيسەپتيكپەن جۋۋ، قاشىقتىقتى ساقتاۋ جانە ادامدار كوپ جينالاتىن ورىندارعا بارماۋ قاجەت»، - دەلىنگەن اقمولا وبلىسىنىڭ باس سانيتارلىق دارىگەرىنىڭ شۇعىل حابارلاماسىندا.
اۆتور: اسلان وسپانوۆ
