مۇعالىمدەرگە اۋىلداردا 7 مىڭ جۇمىس ورنى اشىلادى
بۇل تۋرالى بۇگىن ۇكىمەت وتىرىسىندا ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ايتتى، دەپ حابارلايدى قازاقپارات ءتىلشىسى.
«كوروناۆيرۋس ىندەتى ەكونوميكاعا جانە ەڭبەك نارىعىنا اسەرىن تيگىزۋدە. وسى تۇرعىدا ۇكىمەت تاراپىنان قولدانىلىپ جاتقان ماڭىزدى شارالاردىڭ ءبىرى - جاڭا «جۇمىسپەن قامتۋ» جول كارتاسى. بەكىتىلگەن جول كارتاسىنىڭ نەگىزگى شارتتارىن ەسكە سالىپ كەتسەك، ول قىزمەت كورسەتۋلەر جانە پايدالاناتىن قۇرىلىس ماتەريالدارىنىڭ 90 پايىزدان كەم ەمەسى وتاندىق وندىرۋشىلەر مەن مەردىگەر بولۋى ءتيىس. قۇرىلىپ جاتقان جۇمىس ورىندارىنىڭ 50 پايىزدان كەم ەمەسىنە جۇمىسپەن قامتۋ ورتالىقتارى ارقىلى جۇمىسسىز جۇرگەن، اسىرەسە جۇمىسسىز جاستار تارتىلۋى ءتيىس. مەملەكەت باسشىسىنىڭ سوڭعى بەرگەن تاپسىرمالارى بويىنشا سىرتتا جۇرگەن جاستارعا جول كارتاسىنا قاتىسقان جاعدايدا الدىن الا ەڭ تومەنگى جالاقى كولەمىندە 2 كوتەرمە جالاقى بەرىپ، ءار جوبادا جۇمىسشىنىڭ قاۋىپسىزدىگىن ساقتاۋ ماقساتىندا سانيتارلىق- ەپيدەمولوگيالىق شارالاردى قابىلداۋى شارت»، - دەدى مينيستر.
ونىڭ دەرەگىنشە، اكىمدەر تاراپىنان جول كارتاسىنا 6506 جوبا ۇسىنىلدى. ونىڭ ىشىندە 2703 جوبا الەۋمەتتىك ينفراقۇرىلىمعا، 1039 تۇرعىن ءۇي شارۋاشىلىعى نىساندارىنا، 1799 جوبا ينجەنەرلىك- كولىك ينفراقۇرىلىمىن قامتۋعا جانە 695 جوبا ەلدى مەكەندەردى اباتتاندىرۋعا قاتىستى بولىپ وتىر. اتالعان جوبالاردا بارلىعى 255 مىڭ جۇمىس ورنى قۇرىلادى جانە ىسكە اسىرىلعان جوبالار الداعى ۋاقىتتا ەكونوميكانىڭ ءارتۇرلى سالالارىندا 100 مىڭنان استام تۇراقتى جۇمىس ورنىن اشۋعا نەگىز قالايدى.
«جول كارتادا ىرىكتەلگەن جوبالار ۋاقىتشا جۇمىسپەن قامتۋمەن بىرگە الەۋمەتتىك ماڭىزى بار ماسەلەلەردى شەشۋگە، الداعى ۋاقىتتا ەكونوميكالىق اسەرى بار مەجەلىك سالالاردىڭ دامۋىنا، تۇراقتى جۇمىس ورىندارىن قۇرۋعا ىقپال ەتەدى. ماسەلەن، جول كارتاسى اياسىندا بولاشاقتا الەۋمەتتىك اكتيۆ بولىپ قالاتىن قۇرىلىستار - جاڭا 80 ءبىلىم بەرۋ وشاعى سالىنباق. ول ءوز كەزەگىندە اپاتتى جانە ءۇش اۋىسىمدىق مەكتەپتەر ماسەلەسىن شەشۋگە، اۋىلداعى بالالار ءۇشىن ءبىلىم الۋعا قولجەتىمدىلىكتى ارتتىرۋعا، مۇعالىمدەرگە 7 مىڭ جاڭا جۇمىس ورنىن اشۋعا مۇمكىندىك بەرەدى»، - دەدى ءبىرجان نۇرىمبەتوۆ.
