جەتىسايدا 7 مىڭ ءتۇپ اعاش وتىرعىزىلدى
جەتىساي. قازاقپارات - تۇركىستان وبلىسى، جەتىساي اۋدانىندا وتىرعىزىلعان كوشەتتەردىڭ باسىم كوپشىلىگى جەرگىلىكتى باقتا وسىرىلگەن.
بۇگىندە وڭىردە ساياباقتار مەن گۇلزارلاردى، كوشە بويلارىن كوگالداندىرۋ جۇمىستارى جۇرگىزىلۋدە، دەپ حابارلايدى قازاقپارات ءتىلشىسى.
اۋدانداعى ەرىكتى جاستار جەتىساي قالاسى مەن ىنتىماق اۋىلىن بايلانىستىراتىن، سونان سوڭ، قازىبەك بي اۋىلىن بايلانىستىراتىن ۇلكەن جولدىڭ بويىنا شىرشا كوشەتتەرىن وتىرعىزدى.
سونداي-اق، وتكەن جىلى ەگىلگەن كوشەتتەردىڭ كوكتەمەي قالعاندارىن اۋىستىرۋ جۇمىستارىن جاساعان.
ءوڭىردىڭ باستى دەمالىس ورنى بولىپ تابىلاتىن ورتالىق ساياباقتا قازىرگى ۋاقىتقا دەيىن 1500 ءتۇپ قاراعاي، تەرەك، پاۆلونيا، شىرشا، قارا تال، اعاشتارى ەگىلگەن. الداعى اپتادا ساياباق قوسىمشا 1000 ءتۇپ كوشەتتەرمەن كوگالداندىرىلماق. ساياباقتارعا كوشەتتەردى وتىرعىزۋ جانە ونى اكتەۋ جۇمىستارى دا اتقارىلىپ كەلەدى.
قازىرگى كەزدە اۋداندا كوشەتتەر ەگىلگەن جەرلەردىڭ ارىق اتىزدارى تازالانىپ جاتسا، جاڭادان ەگىلەتىن جەرلەرگە قوسىمشا ارىقتار الىنعان. جالپى وسى كەزگە دەيىن اۋدان بويىنشا 7 مىڭ ءتۇپ اعاش وتىرعىزىلعان. جوسپار بويىنشا ءالى 3 مىڭ ءتۇپ ەگىلەتىن بولادى.
