اقمولادا بالامالى ەنەرگيا كوزىن ءوندىرۋ بويىنشا 7 جوبا جۇزەگە اسىرىلۋدا

كوكشەتاۋ. قازاقپارات - ەلىمىزدىڭ «جاسىل ەكونوميكاعا» كوشۋ جونىندەگى تۇجىرىمداماسىنا سايكەس اقمولا وبلىسىندا دا كۇن جانە جەل قۋاتىنان ەنەرگيا وندىرەتىن ەلەكتر ستانساسىن سالۋ بويىنشا ءبىرقاتار جوبا جۇزەگە اسىرىلۋدا، دەپ حابارلايدى قازاقپارات ءتىلشىسى.

ەلىمىزدە 2023-جىلعا قاراي بالامالى كوزدەردەن وندىرىلگەن ەنەرگيا ۇلەسىنىڭ كولەمى 45 پايىزعا كەم بولمايتىندىعى بولجانىپ وتىر.

اقمولا وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنىڭ باسپا ءسوز قىزمەتىنىڭ مالىمەتىنشە، وڭىردە بالامالى ەنەرگيا كوزدەرىن دامىتۋعا ەلباسى ن. نازاربايەۆ بەكىتكەن قازاقستاننىڭ «جاسىل» ەكونوميكا كوشۋ تۋرالى تۇجىرىمداماسى ارقاۋ بولعان. بۇگىنگى كۇنى بۇل باعىتتا قولعا الىنعان شارالار ءوز جەمىسىن بەرۋدە.

«وبلىستا جالپى قۇنى 60 ميلليارد تەڭگە بولاتىن ءۇش ينۆەستيتسيالىق جوبا جۇزەگە اسىرىلىپ، تابيعي رەسۋرستاردى پايدالانۋ ارقىلى ەلەكتر ەنەرگياسى وندىرىلۋدە. يندۋستريالاندىرۋ كارتاسى شەڭبەرىندە قۋاتى 45 مۆت العاشقى جەل ەلەكتر ستانساسى ەرەيمەنتاۋ اۋدانىندا ىسكە قوسىلدى. ءتورت جىلدىڭ ىشىندە ستانسا شامامەن 600 ميلليون كۆت/س ەلەكتر ەنەرگياسىن ءوندىردى.

بالامالى ەنەرگيا كوزدەرىن ءوندىرۋدىڭ تيىمدىلىگىن تۇسىنگەن «رودينا» اگروفيرماسى» ج ش س ءوز كاسىپورىندارنىڭ قاجەتتىلىگى ءۇشىن قۋاتى 750 مىڭ كۆت جەل ەلەكتر ستانساسىن ىسكە قوستى.

ارشالى اۋدانىندا «تساتەك Green Energy»  ج ش س قۋاتى 100 مۆت بولاتىن جەل ەلەكتر ستانساسىنىڭ قۇرىلىسى جۇرگىزىلۋدە. بيىلعى جىلدىڭ تامىز ايىندا جوبانىڭ العاشقى كەزەڭى (قۋاتى 50 مۆت) جۇزەگە اسىرىلدى. ەكىنشى كەزەڭدە قۋاتتىلىقتى 100 مۆت دەيىن ارتتىرۋ قاراستىرىلعان. سونىمەن بىرگە، كومپانيانىڭ ءۇشىنشى كەزەڭدە قۋاتتىلىقتى ەكى ەسەگە ارتتىرۋ جوسپارىندا بار. بۇل - ءوڭىر ءۇشىن ءىرى جوبا. يننوۆاتسيالىق جاعىنان عانا ەمەس، ەكونوميكالىق جاعىنان دا ءتيىمدى جوبانىڭ قۇنى 40,7 ميلليارد تەڭگەنى قۇرايدى»، دەيدى اقمولا وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنىڭ باسپا ءسوز قىزمەتىندەگىلەر.

ۆەدومستۆونىڭ دەرەگىنە سۇيەنسەك، سونىمەن بىرگە، 2020-جىلى سەلينوگراد اۋدانىندا «KB Enterprises» ج ش س (قۋاتى 100 مۆت) كۇن ەلەكتر ستانساسىن ىسكە قوسۋدى جوسپارلاپ وتىر. جوباعا قۇيىلاتىن ينۆەستيتسيا كولەمى 53,3 ميلليارد تەڭگە جانە ول شەتەلدىك كاپيتالدىڭ قاتىسۋىمەن جۇزەگە اسىرىلادى.

قازىر اقمولا وبلىسى اكىمدىگى مەن جوبا جەتەكشىسىمەن جاسالعان كەلىسىمشارت نەگىزىندە جوبا جۇزەگە اسىرىلا باستادى.

كوكشەتاۋدىڭ ىرگەسىندەگى كراسنويار كەنتىندە «ۆيچي» ج ش س قۋاتى 3,75 مۆت جەل ەلەكتر ستاناسى سالۋدا. بارلىعى 5 جەل گەنەراتورى ورناتىلدى. قازىرگى كەزدە ىسكە قوسۋ الدىنداعى دايىندىق جۇمىستارى ءجۇرىپ جاتىر.

بۇدان بولەك، ەرەيمەنتاۋ اۋدانىندا ەكى جەل ستانسا سالىنادى. ونىڭ ءبىرى - قۋاتى 50 مۆت «Ereimentau Wind Power» ج ش س قولعا الاتىن بولسا، ەكىنشىسىن «Golden Energy Corp» ج ش س 2021-جىلى ىسكە قوسۋدى جوسپارلاپ وتىر.