قىزىلوردادا قىز الىپ قاشقان جىگىتتەر 7 جىلعا سوتتالدى
اتالمىش وقيعا 2018 -جىلدىڭ شىلدە ايىندا ورىن العان. جىگىتتەردىڭ ءبىرى ەكى اۋىلداسىمەن كەزدەسىپ، ءوزىنىڭ ۇيلەنۋ جونىندە ويى بار ەكەنىن ايتادى. ۇشەۋى ءوزارا كەلىسىپ، قىزىلوردا قالاسىنا كەلەدى.
ۇيلەنۋگە بەكىنگەن جىگىت ءوزىنىڭ بۇرىن جۇرگەن قىزىنىڭ ءۇيىنىڭ ماڭىن تورۋىلدايدى. تاڭەرتەڭگىلىك ۋاقىتتا جۇمىسىنا جاياۋ بارا جاتقان بويجەتكەنگە كەزىگىپ ونى كولىكپەن الىپ باراتىنىن ايتىپ، ءمىنۋىن سۇرايدى. وعان قارسىلىق بىلدىرگەن بويجەتكەندى ەكى قولىنان قىسىپ ۇستاپ، كولىككە وتىرعىزادى.
بۇدان كەيىن ۇشەۋى بويجەتكەنمەن بىرگە وزدەرى تۇراتىن اۋدانعا قاراي بەت الادى. دەگەنمەن جول بويىندا جىلدامدىعىن اسىرعان كولىك جۇرگىزۋشىسىن جەرگىلىكتى پوليتسيا قىزمەتكەرلەرى توقتاتادى. سول ساتتە جابىرلەنۋشى پوليتسيا قىزمەتكەرلەرىنەن كومەك سۇرايدى. بويجەتكەندى ەركىنەن تىس الىپ قاشقان ءۇش جىگىت اۋداندىق پوليتسيا بولىمىنە جەتكىزىلگەن.
«اتالمىش قىلمىستىق ءىس قىزىلوردا قالاسىنىڭ №2 -سوتىندا قارالدى. ولاردىڭ ۇستىنەن ق ر قىلمىستىق كودەكسىنىڭ 125-بابىنىڭ 2-بولىگى 1-تارماعىمەن ءىس قوزعالدى. سول بويىنشا كىنالى دەپ تانىلعان سوتتالۋشىلارعا 7 جىلعا شارتتى جازا تاعايىندالدى»، - دەپ ءمالىم ەتتى قىزىلوردا قالاسىنىڭ № 2 -سوتىنىڭ باسپا ءسوز قىزمەتى.