ورتالىق سايلاۋ كوميسسياسى ق ر پرەزيدەنتتىگىنە 7 كانديداتتى تىركەدى
ق ر ورتالىق سايلاۋ كوميسسياسى ءۇش ۇمىتكەرگە، اتاپ ايتقاندا تولەۋتاي راحىمبەكوۆكە، جامبىل احمەتبەكوۆكە جانە ءامىرجان قوسانوۆقا ق ر پرەزيدەنتتىگىنە كانديدات كۋالىگىن تابىس ەتتى. ال بۇعان دەيىن رەسپۋبليكانىڭ جوعارى مەملەكەتتىك لاۋازىمىنا ۇمىتكەر رەتىندە قاسىم-جومارت توقايەۆ، سادىبەك تۇگەل، امانگەلدى تاسپيحوۆ جانە دانيا ەسپايەۆا تىركەلگەن بولاتىن.
ەستەرىڭىزدە بولسا، وسى جىلدىڭ 9- ساۋىرىندە مەملەكەت باسشىسى قاسىم-جومارت توقايەۆ رەسپۋبليكالىق تەلەارنالاردان قازاقستان حالقىنا ۇندەۋ جاريالاپ، وندا بيىلعى 9- ماۋسىمدا ەلىمىزدە كەزەكتەن تىس پرەزيدەنتتىك سايلاۋ وتەتىندىگىن مالىمدەدى.
ق ر ورتالىق سايلاۋ كوميسسياسى ۇسىنعان پرەزيدەنت سايلاۋىن ۇيىمداستىرۋ مەن وتكىزۋ جونىندەگى شارالاردىڭ كۇنتىزبەلىك جوسپارىنا سايكەس قازاقستان رەسپۋبليكاسىنىڭ پرەزيدەنتتىگىنە كانديداتتاردى ۇسىنۋ سايلاۋ تاعايىندالعان كۇننەن كەيىنگى كۇنى، ياعني 2019-جىلعى 10- ساۋىردە باستالىپ، 28- ساۋىردە جەرگىلىكتى ۋاقىت بويىنشا ساعات 18.00 دە اياقتالادى.
«قازاقستان رەسپۋبليكاسىنداعى سايلاۋ تۋرالى ق ر كونستيتۋتسيالىق زاڭىنىڭ 55-بابى 1-تارماعىنا سايكەس پرەزيدەنتتىككە كانديداتتاردى ۇسىنۋ قۇقىعى بەلگىلەنگەن تارتىپپەن تىركەلگەن رەسپۋبليكالىق قوعامدىق بىرلەستىكتەرگە تيەسىلى. پرەزيدەنتتىككە كانديداتتاردى قوعامدىق بىرلەستىكتەر اتىنان ولاردىڭ جوعارى ورگاندارى ۇسىنادى. 28- ساۋىردە ق ر ورتالىق سايلاۋ كوميسسياسى ق ر پرەزيدەنتىنىڭ كەزەكتەن تىس سايلاۋىنا كانديداتتاردى ۇسىنۋ قورىتىندىسىن جاريا ەتتى. وعان سايكەس 9 رەسپۋبليكالىق قوعامدىق بىرلەستىكتىڭ، ونىڭ ىشىندە 4 ساياسي پارتيانىڭ كانديداتى قۇجاتتارىن تاپسىردى.
وسىلايشا، ق ر پرەزيدەنتتىگىنە 9 ۇمىتكەر ۇسىنىلدى:
1. سادىبەك تۇگەل: «ۇلى دالا قىراندارى» رەسپۋبليكالىق قوعامدىق مادەني-الەۋمەتتىك بىرلەستىگى 2019-جىلدىڭ 17- ساۋىرىندە ۇسىنىپ، ق ر و س ك- گە قۇجاتتارىن 22- ساۋىردە تاپسىرعان؛
2. توقايەۆ قاسىم-جومارت كەمەل ۇلى: «Nur Otan» پارتياسى قوعامدىق بىرلەستىگى 2019-جىلدىڭ 23- ساۋىرىندە ۇسىنىپ، ق ر و س ك- گە قۇجاتتارىن 23- ساۋىردە تاپسىرعان؛
3. تاسپيحوۆ امانگەلدى ساتىبالدى ۇلى: «ق ر كاسىپوداقتار فەدەراتسياسى» رەسپۋبليكالىق كاسىپوداقتار بىرلەستىگى 2019-جىلدىڭ 24- ساۋىرىندە ۇسىنىپ، ق ر و س ك- گە قۇجاتتارىن 25- ساۋىردە تاپسىرعان؛
4. ەسپايەۆا دانيا ءمادي قىزى: «اق جول» قازاقستاننىڭ دەموكراتيالىق پارتياسى» قوعامدىق بىرلەستىگى 2019-جىلدىڭ 25- ساۋىرىندە ۇسىنىپ، ق ر و س ك- گە 25- ساۋىردە تاپسىرعان؛
5. راحىمبەكوۆ تولەۋتاي ساتاي ۇلى: «اۋىل» حالىقتىق-دەموكراتيالىق پاتريوتتىق پارتياسى» قوعامدىق بىرلەستىگى 2019-جىلدىڭ 25- ساۋىرىندە ۇسىنىپ، ق ر و س ك- گە قۇجاتتارىن 26- ساۋىردە تاپسىرعان؛
6. احمەتبەكوۆ جامبىل اۋجان ۇلى: «قازاقستاننىڭ كوممۋنيستىك حالىق پارتياسى» قوعامدىق بىرلەستىگى 2019-جىلدىڭ 26- ساۋىرىندە ۇسىنىپ، ق ر و س ك- گە قۇجاتتارىن 26- ساۋىردە تاپسىرعان؛
7. قوسانوۆ ءامىرجان ساعيدراحمان ۇلى: «ۇلت تاعدىرى» رەسپۋبليكالىق قوعامدىق بىرلەستىگى 2019-جىلدىڭ 26- ساۋىرىندە ۇسىنىپ، ق ر و س ك- گە قۇجاتتارىن 27- ساۋىردە تاپسىرعان؛
8. ەرعاليەۆ تالعات فايزۋللا ۇلى: «قازاقستان قۇرىلىسشىلار وداعى» رەسپۋبليكالىق زاڭدى تۇلعالار بىرلەستىگى 2019-جىلدىڭ 26- ساۋىرىندە ۇسىنىپ، ق ر و س ك- گە قۇجاتتارىن 27- ساۋىردە تاپسىرعان؛
9. جۇماتاي اليەۆ: «حالىق دەموگرافياسى» قوعامدىق بىرلەستىگى 2019-جىلدىڭ 26- ساۋىرىندە ۇسىنىپ، ق ر و س ك- گە قۇجاتتارىن 28- ساۋىردە تاپسىرعان.
الايدا، 29- ساۋىردە «قازاقستان قۇرىلىسشىلار وداعى» رەسپۋبليكالىق زاڭدى تۇلعالار بىرلەستىگى اتىنان كانديدات رەتىندە ۇسىنىلعان تالعات ەرعاليەۆ ساياسي دوداعا قاتىسپايتىندىعىن مالىمدەدى.
2- مامىردا ق ر ورتالىق سايلاۋ كوميسسياسى «حالىق دەموگرافياسى» قوعامدىق بىرلەستىگىنەن پرەزيدەنتتىككە ۇمىتكەر رەتىندە ۇسىنىلعان جۇماتاي اليەۆتى كانديدات رەتىندە تىركەۋدەن باس تارتتى. سەبەبى لينگۆيستيكالىق كوميسسيا جۇماتاي اليەۆتىڭ مەملەكەتتىك ءتىلدى ەركىن مەڭگەرمەگەندىگى جونىندە شەشىم قابىلداعان ەدى.
وسىلايشا، بۇگىن ەلىمىزدىڭ ورتالىق سايلاۋ كوميسسياسى ق ر پرەزيدەنتتىگىنە كانديدات رەتىندە ۇسىنىلعان 9 ۇمىتكەردىڭ 7 ەۋىن سايلاۋ زاڭناماسى تالاپتارىنا ساي دەپ تانىدى.
سونىمەن 3- مامىر كۇنى ق ر ورتالىق سايلاۋ كوميسسياسى قاسىم-جومارت توقايەۆ پەن سادىبەك تۇگەلدى ق ر پرەزيدەنتتىگىنە كانديدات رەتىندە تىركەدى.
4- مامىردا امانگەلدى تاسپيحوۆ پەن دانيا ەسپايەۆا.
ال ، 6- مامىردا تولەۋتاي راحىمبەكوۆ، جامبىل احمەتبەكوۆ جانە ءامىرجان قوسانوۆ كانديدات رەتىندە تىركەلدى.
ق ر پرەزيدەنتىگىنە ۇمىتكەرلەردىڭ بارلىعىنا ارنايى كۋالىكتەر بەرىلدى.
ورتالىق سايلاۋ كوميسسياسىنىڭ دەرەگىنشە، ق ر پرەزيدەنتتىگىنە تىركەلگەن بارلىق كانديداتتار ق ر كونستيتۋتسياسىنداعى جانە «ق ر- داعى سايلاۋ تۋرالى» كونستيتۋتسيالىق زاڭداعى تالاپتارعا تولىقتاي ساي كەلەدى. قولدانىستاعى زاڭناماعا سايكە، كانديداتقا ءبىرقاتار تالاپ قويىلادى. اتاپ ايتقاندا: تۋمىسىنان رەسپۋبليكا ازاماتى بولۋى، قىرىق جاسقا تولۋى، مەملەكەتتىك ءتىلدى ەركىن مەڭگەرۋى، قازاقستاندا سوڭعى ون بەس جىل بويى تۇرۋى، كەمىندە 5 جىل مەملەكەتتىك قىزمەتتە نەمەسە سايلانبالى لاۋازىمدا بولۋى.
پرەزيدەنتتىككە كانديداتتى وبلىستاردىڭ، رەسپۋبليكالىق ماڭىزى بار قالالار مەن رەسپۋبليكا استاناسىنىڭ كەم دەگەندە ۇشتەن ەكىسىنىڭ اتىنان تەڭدەي وكىلدىك ەتەتىن سايلاۋشىلاردىڭ جالپى سانىنىڭ كەم دەگەندە بىر پروتسەنتى قولداۋى تيىس. پرەزيدەنتتىككە كانديدات رەتىندە تىركەلۋ ءۇشىن ۇسىنىلۋشىلار ۇسىنىلاتىن ايدىڭ ءبىرىنشى كۇنىندەگى، ياعني 2019-جىلعى 1- ساۋىردەگى جاعداي بويىنشا ءوزىنىڭ جانە جۇبايىنىڭ (زايىبىنىڭ) كىرىستەرى مەن مۇلكى تۋرالى دەكلاراتسيالار تاپسىرعانى جونىندە مەملەكەتتىك كىرىس ورگانىنىڭ انىقتاماسىن، سونداي-اق ءوزىنىڭ دەنساۋلىق جاعدايى تۋرالى مەديتسينالىق قورىتىندىنى تاپسىرۋى قاجەت.
كانديداتتاردى تىركەۋ كەزەڭى 2019-جىلدىڭ 11- مامىرى كۇنى ساعات 11.00 دە اياقتالادى. ايتا كەتەرلىگى، دەكلاراتسيانى بەرۋ كەزىندە كانديدات نەمەسە ونىڭ زايىبى (جۇبايى) دەكلاراتسيالاعان كىرىستەرى مەن مۇلكى تۋرالى مالىمەتتەردىڭ دۇرىس ەمەستىگى انىقتالعان جاعدايدا ورتالىق سايلاۋ كوميسسياسى تىركەۋ تۋرالى شەشىمنىڭ كۇشىن جويادى.
سايلاۋ الدىنداعى ۇگىت-ناسيحات تىركەۋ كەزەڭى اياقتالعاننان كەيىن دەرەۋ باستالادى جانە داۋىس بەرۋ كۇنى الدىنداعى كۇنگى ساعات 00.00 گە دەيىن، ياعني 8-ماۋسىم كۇنگى ساعات 00.00 گە دەيىن جالعاسادى.
داۋىس بەرۋ 9- ماۋسىمدا جەرگىلىكتى ۋاقىت بويىنشا 07.00-20.00 ارالىعىندا وتەدى. سايلاۋ اياقتالعان كەزدەن باستاپ 12 ساعاتتان كەشىكتىرمەي سايلاۋ ۋچاسكەلەرىندە داۋىستاردى ساناۋ جۇرگىزىلەدى.
اكىمشىلىك-اۋماقتىق بىرلىكتەر بويىنشا داۋىستاردى ساناۋ ناتيجەلەرى اۋماقتىق كوميسسيالاردىڭ وتىرىستارىندا بەلگىلەنەدى جانە و س ك- عا ەكى كۇن مەرزىم ىشىندە (11- ماۋسىمنان كەشىكتىرمەي) جەتكىزىلەدى.
ورتالىق سايلاۋ كوميسسياسىنىڭ سايلاۋ ناتيجەلەرىن بەلگىلەۋىنە جانە جاريالاۋىنا، سايلانعان پرەزيدەنتتى تىركەۋىنە 7 كۇن كوزدەلگەن.