الماتى وبلىسىندا 7 بالالى اناعا ءۇي بەرىلدى
جانسۇگىروۆ اۋىلىنىڭ وڭتۇستىك- شىعىسىندا «نۇرلى جەر» باعدارلاماسى اياسىندا سالىنعان 20 تۇرعىن ءۇي بوي كوتەرگەن. باسقان اۋىلىنىڭ تۋماسى، 7 بالانىڭ اناسى سامال قوجاحمەتوۆا جاڭا ءۇيدىڭ يەسى اتاندى.
«اۋدانىمىزدا كوپبالالى انالار از ەمەس. سولاردىڭ ءبىرى - جەتى بالانىڭ اناسىنا ءۇيدىڭ كىلتىن تابىستاپ وتىرمىن. مۇنداي جۇمىستار ءارى قاراي جالعاسىن تاۋىپ، قازاقتىڭ ءاربىر باتىر اناسىنىڭ كوڭىلى توق بولۋىنا ىقپال ەتىپ، يگى باستامامىزدى جالعاستىرا بەرەمىز»، - دەدى اۋدان اكىمى ەسىم سەيىلحان ۇلى.
قۋانىشىنا قوينىنا سىيماعان سامال تۇرسىنبەك قىزى اۋدان اكىمدىگىنە شەكسىز العىسىن جەتكىزدى.
«بۇگىنگە دەيىن باسپانا قيىنشىلىعىن كوپ كوردىم. پاتەر جالداپ كۇن كەشتىك. باسپانا بولماعاندىقتان بالالارىمدى ينتەرناتتا وقىتتىم. ەندى ءوزىمىزدىڭ جەكە ءۇيىمىز بار. اۋدان اكىمىنە، جالپى جۇرتشىلىققا راحمەت. كوپبالالى انا دەپ ەسكەرىپ، وسىنداي ءۇيدىڭ كىلتىن تابىس ەتىپ وتىر»، - دەدى باتىر انا.
باسپانانىڭ اۋماعى - 68,43 شارشى مەتر. 3 بولمەلى جاڭا ۇيدە «التىن القا» يەگەرى ەندى ماديار، دانيار، ديانا، بەيبىت، ءاليا، اقبوتا جانە جانارىس اتتى ۇل-قىزارىمەن بىرگە تۇرادى.
جالپى، اۋداندا قازىر 58 كوپبالالى جانە الەۋمەتتىك جاعدايى تومەن وتباسى ءۇي كەزەگىنە تىركەلگەن. ونىڭ ىشىندە ۇشەۋى - «التىن القا»، 12 سى - «كۇمىس القا» يەگەرلەرى.