قىسقى ۋنيۆەرسيادا قورىتىندىسى: قازاقستاندىقتاردىڭ ەنشىسىندە 7 مەدال

بايراقتى دودا كراسنويارسك قالاسىندا 2-12- ناۋرىز ارالىعىندا ءوتتى. ەل نامىسىن بارلىعى 95 سپورتشى (5 مانەرلەپ سىرعاناۋشى، 13 شاڭعىشى، سپورتتىق باعدارلاۋ مەن شورت-ترەكتەن - 10، تاۋ شاڭعىشىسىنان 2 سپورتشى) قورعادى.

ون كۇندىك جارىستىڭ ناتيجەسىندە قازاقستان قورجىنىنا 4 كۇمىس، 3 قولا مەدال ءتۇستى. ۋنيۆەرسيادانىڭ رەسمي سايتىنداعى مالىمەتكە سايكەس، ەلىمىز جالپى ەسەپتە 17-ورىنعا تۇراقتاعان. ءبىرىنشى ورىندا - رەسەي (بارلىعى 111 مەدال)، ەكىنشى ورىندا - كورەيا (14)، ءۇشىنشى ورىندا جاپونيا (13) ستۋدەنتتەرى.

«سايىسقا ەلىمىزدىڭ جوعارى وقۋ ورىندارىنىڭ 17-25 جاس ارالىعىنداعى ستۋدەنتتەرى مەن اكادەميالىق دارەجەسى بار تۇلەكتەرى قاتىستى. جۇلدەلى ورىندار يەلەنگەن جاس سپورتشىلارعا قازاقستان رەسپۋبليكاسى ءبىلىم جانە عىلىم ءمينيسترى كۇلاش شامشيدينوۆا قۇتتىقتاۋ حات جولداپ، لايىقتى جەڭىستەرىمەن قۇتتىقتادى»، - دەلىنگەن مينيسترلىك اقپاراتىندا.

2019-جىلعى قىسقى ۋنيۆەرسيادادا مەدال يەلەنگەن سپورتشىلار: جانبوتا الدابەرگەنوۆا (فريستايل-اكروباتيكا، 3-ورىن، ءال فارابي اتىنداعى قاز ۇ ۋ)، اسەت دۇيسەنوۆ (شاڭعى جارىسى، 2-ورىن، قازاق سپورت جانە تۋريزم اكادەمياسى)، حان يانا، ۆولكوۆيتسكايا الەنا (شورت-ترەك، 3-ورىن، قازاق سپورت جانە تۋريزم اكادەمياسى)، امىرعاليەۆا ءاليا، باقىتگەرەيەۆا قاديشا (شورت-ترەك، 3-ورىن، قوستاناي مەملەكەتتىك پەداگوگيكالىق ۋنيۆەرسيتەتى)، نيكيشا دەنيس، قاجعالي نۇرتىلەك (شورت-ترەك، 3-ورىن، قازاق سپورت جانە تۋريزم اكادەمياسى)، جاقسىبايەۆ مەرسايد، شامۋحانوۆ ەركەبۇلان (شورت-ترەك، 3-ورىن، قوستاناي مەملەكەتتىك پەداگوگيكالىق ۋنيۆەرسيتەتى)، گريدين نيكيتا، كليمين ولجاس (شاڭعى، 2-ورىن، ا. مىرزاحمەتوۆ اتىنداعى كوكشەتاۋ ۋنيۆەرسيتەتى)، اسەت دۇيسەنوۆ، ليۋفت يۆان (2-ورىن، شاڭعى جارىسى، قازاق سپورت جانە تۋريزم اكادەمياسى)، تۇرسىنبايەۆا ەليزابەت (2-ورىن، مانەرلەپ سىرعاناۋ، قازاق سپورت جانە تۋريزم اكادەمياسى).