ا ق ش- تاعى سايلاۋ: 7 ميلليون ادام مەرزىمىنەن بۇرىن داۋىس بەردى

استانا. قازاقپارات - ا ق ش- تاعى ارالىق سايلاۋ الدىندا 7 ميلليون ادام مەرزىمىنەن بۇرىن داۋىس بەردى، دەپ حابارلايدى «قازاقپارات» ح ا ا The New York Times گازەتىنە سىلتەمە جاساپ.

الدىن الا مالىمەتتەرگە قاراعاندا، ا ق ش- تاعى بۇل جولعى ارالىق سايلاۋعا رەسپۋبليكاشىلدار پارتياسىن جاقتايتىندار ەرەكشە قىزىعۋشىلىق تانىتىپ وتىر.

ا ق ش- تا الدىن الا داۋىس بەرۋ جەكە جانە پوشتا ارقىلى جۇرگىزىلەدى. ءبىرىنشى نۇسقانى تاڭدايتىن سايلاۋشىلار، ستاتيستيكاعا قاراعاندا، ادەتتە دەموكراتتاردى قولدايدى. پوشتا ارقىلى نەگىزىنەن ەگدە جاستاعى امەريكالىقتار داۋىس بەرەدى.

ايتا كەتەيىك، 6- قاراشادا وتەتىن سايلاۋدا 100 سەناتوردىڭ 35 ءى، كونگرەسس وكىلدەر پالاتاسىنىڭ 435 مۇشەسىنىڭ بارلىعى، سونداي-اق شتاتتار مەن اۋماقتاردىڭ 39 گۋبەرناتورى قايتا سايلانادى.

وكىلدەر پالاتاسىنداعى رەسپۋبليكاشىلدار مەن دەموكراتتاردىڭ قاتىناسى 236 عا 193 بولىپ وتىر. تاعى التى ورىن بوس تۇر. كونگرەستىڭ تومەنگى پالاتاسىن باقىلاۋعا قول جەتكىزۋ ءۇشىن دەموكراتتار قوسىمشا 23 ماندات الۋى ءتيىس.