الەمدەگى ەڭ باي ادام دجەفف بەزوستىڭ 7 قۇپياسى

None
None
  استانا. قازاقپارات - CNN تەلەارناسىنىڭ مالىمدەمەسى بويىنشا دجەفف بەزوس الەمدەگى ەڭ باي ادام اتاندى. Bloomberg Billioners Index يندەكسىنە سۇيەنسەك، ونىڭ قاڭتارداعى تابىسى 106 ميلليارد دوللاردى قۇرايدى.

 ول Amazon سايتىنان بولەك The Washington Post جۋرنالىن جانە Blue Origin اتتى اەروعارىشتىق كومپانياسىن باسقارادى. دارىندى كاسىپكەر جەتىستىككە وڭاي جەتكەن جوق. نازارلارىڭىزعا دجەفف بەزوستى جەتىستىككە جەتەلەگەن 7 قۇپيانى ۇسىنامىز.

1. جار تاڭداۋدان جاڭىلىسپاڭىز

دجەفف جانە ماككەنزي بەزوستىڭ شاڭىراق كوتەرگەندەرىنە 24 جىل. ماككەنزي بەزوستى كەزدەستىرگەنگە دەيىن دجەففتىڭ جەكە ءومىرى ساتسىزدىكتەرگە تولى بولعان ەكەن. دجەففتىڭ سوزىنشە، ول ءتىپتى دوستارىنىڭ كەڭەسىمەن ءتۇرلى كەزدەسۋلەرگە بارعان. الايدا كەزدەسۋلەردىڭ بارلىعى ءساتسىز اياقتالعان. كەيىننەن دجەفف نازىك جاندى ارۋلاردان مۋزا ىزدەگەنىن مويىندايدى.

- مەن وزىمە يدەيا بەرەتىن، ونى جۇزەگە اسىرۋعا كومەكتەسەتىن، كوپشىلىكتىڭ اراسىنان ەرەكشەلەنۋگە مۇمكىندىك بەرەتىن ايەلدى ىزدەدىم. ماككەنزيدى ءبىر كورگەننەن- اق ونىڭ تاپقىر جان ەكەنىن جانە مەن ءومىر بويى ىزدەگەن اسىل جان ەكەنىن ءتۇسىندىم، - دەيدى ميللياردەر.

2. جۇمىسىڭىزدى رەتكە كەلتىرىڭىز

- مەن ءار ءىسىمدى ءوز كەزەگىمەن جۇزەگە اسىرۋعا تىرىسامىن. ەگەر مەن دوستارىممەن نەمەسە وتباسىممەن تاماقتانسام، باسقا دۇنيەگە كوڭىلىمدى بولمەيمىن. ەگەر ەلەكتروندى پوشتامدى وقىسام، باسقا نارسەگە مازالانبايمىن. مەن كەدەرگى كەلتىرەتىن دۇنيەلەرگە كوڭىل بولگىم كەلمەيدى، - دەيدى ميللياردەر. دەمەك، ءسىز دە ءار ءىسىڭىزدى دجەفف بەزوس سەكىلدى رەتىمەن ورىندايتىن بولساڭىز، ۋاقىتتى دا ۇقىپتى پايدالانىپ ۇيرەنەسىز.

3. دۇرىس تاڭداۋ تابىستى ومىرگە جەتەلەيدى

ءار ادامنىڭ ەكى تاڭداۋى بار. ءبىرىنشى تاڭداۋ: تاۋەكەلگە بارماي، كۇندەلىكتى جۇمىسىڭدى ىستەپ، قاراپايىم عانا ءومىر ءسۇرۋ. ەكىنشى تاڭداۋ: سىناقتاردان سۇرىنبەي، جەڭىس پەن جەڭىلىستەردە باتىلدىق تانىتىپ، ومىردەن ءوز ورنىڭدى تابۋ. دجەفف بەزوستىڭ ءومىرى ءتۇرلى سىناقتاردان تۇرعان.

ول 1994 -جىلى ۋولل- ستريتتە قارجىلىق كومپانيادا باعدارلامالىق جاساقتامانى جاساۋمەن اينالىسقان. دجەففتىڭ بۇل جۇمىستا تاپقان اقشاسى «نان مەن مايعا» جەتەتىن. ءبىراق ءبىر كۇنى ول باستىعىنا جەكە ينتەرنەت- دۇكەنىن اشۋ ءۇشىن جۇمىستان شىعاتىنىن ايتقاندا باستىعى: «بۇل شىنىمەن دە جاقسى يدەيا ەكەن. ءبىراق سەن سياقتى بەدەلدى دارەجەسى، جۇمىسى بار ادام ءۇشىن ەمەس. سەن بار جۇمىسىڭدى تاستاپ كەتۋگە دايىنسىڭ با؟ » . دجەفف ماقساتىنا جەتۋ ءۇشىن تاۋەكەلگە بارۋعا دايىن ەدى.

بۇگىندە ميللياردەر دجەفف بەزوس Amazon سايتىن قۇرۋعا جۇمساعان جىلدارىن ەسىنە الىپ: «مەن 80 گە كەلگەندە تاۋەكەلگە بارعانىم ءۇشىن وكىنبەيتىنىمدى ءبىلدىم. ينتەرنەتتىڭ نە ەكەنىن تۇسىنگەننەن كەيىن ءومىرىمدى جاڭادان باستاۋعا ۇمتىلدىم. مەن جەڭىلىس تاپقان كۇننىڭ وزىندە دە، ءوزىمدى جەككورمەس ەدىم. سەبەبى مەن بار مۇمكىندىكتى پايدالاندىم» ، - دەيدى.

ءومىرىڭىزدى وزگەرتكىڭىز كەلسە، ميلليوردەردەن ۇلگى الىڭىز. تاۋەكەلگە بەل بۋىپ، ويىڭىزدا جۇرگەن، ءبىراق ورىنداۋعا باتىلىڭىز جەتپەي جۇرگەن ىزگى امالدارىڭىزدى جۇزەگە اسىرىڭىز.

4. باستى جانە قوسىمشا جوسپارىڭىز بولسىن

ەگەر Amazon سايتى جارىق كورمەگەندە، قانداي كاسىپپەن اينالىساتىن ەدىڭىز دەگەن سۇراققا ميللياردەردىڭ ەكى جاۋابى بار. ءبىرىنشى: «مەن باقىتتى باعدارلاماشى بولار ەدىم. ءبارىن باسىنان باستاۋ - مەن ءۇشىن قيىن ەمەس» . ەكىنشى: «كەيدە ءوزىمدى وتە جاقسى، ءبىراق ءوز جۇمىسىن باياۋ ورىندايتىن بارمەن بولاتىن ەدىم دەپ ويلايمىن. ماعان كوكتەيلدى دايىنداعان ۇنايدى. ءدامدى كوكتەيل دايىنداي ءبىلۋدىڭ ءوزى ونەر دەپ سانايمىن. ءوزىم كوكتەيلدى اسىقپاي، جاسايمىن. باياۋ قيمىلداسام دا ءدامدى كوكتەيل دايىنداۋ قولىمنان كەلەدى. مەنىڭ بارىمدا «كوكتەيل ءدامدى بولسىن با، الدە تەز دايىندالسىن با؟ » دەگەن جازۋ بولاتىن ەدى» .

وسىدان دجەفف بەزوستىڭ تەك ءبىر جوسپارعا سەنبەگەنىن، قوسىمشا جوسپارى بولعاندىعىن بايقاۋعا بولادى. الدىڭىزعا ماقسات قويعان كەزدە تەك قانا جەڭىستى ەمەس، جەڭىلىستى دە ويلاڭىز. ءسىزدىڭ باستى جوسپارىڭىز جۇزەگە اسپاعان جاعدايدا دا، جاقسى ءومىر سۇرۋگە مۇمكىندىك بەرەتىن قوسىمشا جوسپارىڭىزدىڭ بولعانى ابزال.

5. جەڭىمپاز بولۋ ءۇشىن جەڭىلۋ كەرەك

دجەفف بەزوس جانە ونىڭ ايەلى بالا تاربيەسىنە كەلگەندە ستاندارتتى ەمەس ادىستەردى قولدانادى. كوبىنەسە اتا- انا كىشكەنتاي بالاسى جاراقاتتانىپ قالماۋى ءۇشىن ۇشى ۇشكىر، كەسكىش زاتتاردى بالانىڭ قولى جەتپەيتىن جەرلەردە ساقتايدى. قايشى، پىشاق سىندى زاتتاردى ۇستاتپايدى. ال بەزوستەردىڭ وتباسىندا ءبارى وزگەشە. ولار بالالارىنا 4 جاستان باستاپ وتكىر قايشىلاردى قولدانۋعا رۇقسات بەرگەن. كەيىننەن بالالارىنىڭ ەلەكتر قۇرالدارىن قولدانۋىنا دا قارسى بولماعان. بۇل جايىندا دجەفف: «قاتەلىك جاسامايتىن ادام، ءوز قاتەسىنە وكىنىپ، ءوزىن- ءوزى دامىتۋعا، قاتەلىگىن تۇزەۋگە ۇمتىلمايتىن بولادى. مەن شىنايى ءومىردى تانۋعا تالاپتانبايتىن بالانىڭ اكەسى بولعانىمشا، توعىز ساۋساعى بار بالانىڭ اكەسى بولۋدى قالار ەدىم» .

6. جۇمىس پەن جەكە ءومىردىڭ اراسىنداعى بايلانىستى ساقتاڭىز

دجەفف بەزوس ءار ىسىندە تەڭگەرىمنىڭ بولۋىن قاداعالايتىن ادام. ونىڭ پىكىرىنشە، جۇمىس پەن جەكە ءومىر ءاردايىم ءبىر- بىرىنەن تاۋەلسىز، ين جانە يان سەكىلدى ءبىر- ءبىرىن تولىقتىرىپ تۇرعانى دۇرىس. ەگەر ۇيدە باقىتتى بولساڭىز، جۇمىستا دا ۇزدىك قىزمەتكەر اتاناسىز دەگەن ءسوز. ەگەر جۇمىستا مىقتى مامان بولساڭىز، ۇيدە بالاڭىز ءۇشىن كەرەمەت اتا- اناسىز. Amazon كومپانياسىنىڭ باسشىسى تانىمال بۇقارالىق اقپارات قۇرالدارىنا بەرگەن سۇحباتتارىندا بالالارعا، ءۇي ىشىنە ارنالعان بوس ۋاقىتتى جۇمىسقا ارناۋ بۇرىس ەكەندىگىن ايتقان.

7. بالالاردان ۇلگى الىڭىز

مىقتى مامان بولۋدىڭ كەمشىل تۇستارى بار. ءسىز ءوز ءىسىڭىزدى جەتىك بىلگەننەن كەيىن، زەرتتەلمەگەن، تەك سەنىمگە عانا سۇيەنگەن قاعيدالارمەن جۇمىس ىستەگەندە قيىندىققا تاپ بولۋىڭىز مۇمكىن. سەبەبى ءسىز كەز كەلگەن تىعىرىقتان قالاي شىعۋ كەرەكتىگىن ناقتى بىلەسىز، ال سول تىعىرىقتان شىعۋعا كومەكتەسەتىن مۇمكىندىكتەردى بىلمەيسىز. كەلەشەكتە وسىنداي قيىندىققا تاپ بولماۋ ءۇشىن بالالاردان ۇلگى الىڭىز. بالالار اينالانى زەرتتەۋدەن شارشامايدى. بىلمەگەن نارسەسىن سۇراۋعا ۇيالمايدى. بالالار كوپ سۇراق قويسا دا، سۇراعىنا جاۋاپ تابادى. قانداي جاعداي بولماسىن، بالا سياقتى ءوز- وزىڭىزگە بىرنەشە سۇراق قويىڭىز. «وسىلاي ىستەسەم قالاي بولار ەكەن؟ » ، «ەگەر وسى ويىمدى جۇزەگە اسىرسام شە؟ » . الەمنىڭ بارلىق دانىشپاندار ءاردايىم ىزدەنىستە ءجۇرىپ، سۇراقتان تۋعان سۇراققا جاۋاپ ىزدەۋمەن جەتىستىككە جەتكەنىن ۇمىتپاڭىز.

ايارۋ وتەنبايەۆا

سوڭعى جاڭالىقتار