اقمولا وبلىسىندا ساياسي قۋعىن-سۇرگىن قۇرباندارىنا تۇرعىزىلعان 7 ەسكەرتكىش بار
بۇل تۋرالى قازاقپارات تىلشىسىنە اقمولا وبلىستىق تاريحي- مادەني مۇرانى قورعاۋ جانە پايدالانۋ ورتالىعى باسشىسىنىڭ ورىنباسارى سەرىك ىسقاقوۆ ايتىپ بەردى.
ونىڭ ايتۋىنشا، بۇل ەسكەرتكىشتەردىڭ تاريحي ءمانى زور. جەلكىلدەپ ءوسىپ كەلە جاتقان كەيىنگى جاس ۇرپاققا تالايلى تاعدىردان، حالقىمىزدىڭ قاسىرەت شەككەن زۇلمات جىلدارىنان سىر شەرتۋ ماڭىزدى ءىس. قازىرگى تاڭدا اقمولا وبلىسىندا بارلىعى 1793 تاريحي ەسكەرتكىش بار. سونىڭ 7 ەۋى ساياسي قۋعىن- سۇرگىن قۇربانى بولعان جاندارعا ارنالعان.
«7 ەسكەرتكىشتىڭ ۇشەۋى استراحان اۋدانىندا، ءبىرجان سال، ەگىندىكول، ساندىقتاۋ اۋداندارىندا ءبىر- بىردەن، سونداي-اق تاعى بىرەۋى كوكشەتاۋ قالاسىنان شۋچە قالاسىنا شىعار بەتتە اۆتوجول بويىندا ورنالاسقان. بۇلاردان بولەك، «وتانىن ساتقانداردىڭ» ايەلدەرىنىڭ اقمولا لاگەرىندە مەرزىمىن وتەگەن 62 ۇلتتىڭ ايەلدەرىنىڭ رۋحىنا ارنالعان «الجير» مەموريالدى- مۇراجاي كەشەنى بار. بۇل پوستكەڭەستىك مەملەكەتتەردە عانا ەمەس، بارلىق الەمدە جالعىز بىرەگەي ەسكەرتكىش بولىپ تابىلادى. «الجير» - دە ءبىر مەزگىلدە 8 مىڭعا جۋىق ايەل وتىرعان. ولاردىڭ ىشىندە كوبى ورىستار - 4390، ەۆرەيلەر - 855, ۋكرايندار - 740 جانە 87 قازاق ايەلدەرى بولدى. سونىمەن قاتار لاگەردە نەمىس، فرانسۋز، شۆەد، جاپون، نورۆەج، اۆستريالىق، پولياك، گرۋزين، ارميان، ازەربايجان، لاتىش جانە تاعى باسقا ۇلتتىڭ ايەلدەرى جازاسىن وتەگەن»، - دەيدى سەرىك ىسقاقوۆ.
دەرەكتەرگە سۇيەنسەك، «الجير» - دە 600 گە جۋىق ايەل قايتىس بولعان. ءبىراق بۇل سان ءالى ناقتىلانۋدا.
«نەگىزىنەن تۇتقىندالعاندار وداققا تانىمال ساياسي جانە قوعام قايراتكەرلەرىنىڭ ايەلدەرى: ازيزا رىسقۇلوۆا جانە ونىڭ اناسى اريفا ەسەنعۇلوۆا، دامەش جۇرگەنوۆا، رابيعا اسفاندياروۆا، ءانشى ليديا رۋسلانوۆا، جازۋشى گالينا سەرەبرياكوۆا، اتىلىپ كەتكەن مارشال تۋحاچەۆسكيدىڭ اۋلەتىنىڭ ايەلدەرى، جازۋشى بوريس پيلنياكتىڭ ايەلى كيرا اندروننيكوشۆيلي، يۋري تريفونوۆتىڭ ايەلى ەۆگەنيا لۋرە، بۋلات وكۋدجاۆا مەن مايا پليسەتسكايانىڭ دا انالارى بولدى. بۇگىندە «الجير» مەموريالدى- مۇراجايىنىڭ قورىندا ون بەس مىڭعا جۋىق جادىگەر ساقتالعان»، - دەپ ءسوزىن تۇيىندەدى ول.
