الماتىدا اۆتوبۋس تەجەگىشى ىستەمەي قالدى: 7 ادام اۋرۋحاناعا ءتۇستى - فوتو

     الماتى. قازاقپارات - الماتىدا №15 -مارشرۋت اۆتوبۋسى اپاتقا ۇشىراپ، 7 ادام زارداپ شەكتى، دەپ حابارلايدى قازاقپارات ءتىلشىسى.

جۇرگىزۋشىنىڭ ايتۋىنشا، جاقىندا عانا مارشرۋتقا شىققان جاڭا اۆتوبۋستىڭ تەجەگىشى ىستەمەي قالعان.

شالياپين كوشەسىمەن باتىسقا باعىت العان اۆتوبۋستىڭ جۇرگىزۋشىسى تەجەگىشتىڭ ىستەمەي قالعانىن اڭعارىپ، كوشەنىڭ شەتىمەن جۇرمەككە ارەكەتتەنگەن.

الايدا، جىلدامدىقتى ازايتۋ مۇمكىن بولماعاندىقتان، اۆتوبۋس جول بويىنداعى اۋلا سىپىرۋشىنى قاعىپ كەتىپ، جول شەتىندەگى بەتون قورشاۋعا سوعىلدى.

جول اپاتىنان 6 جولاۋشى، 1 اۋلا سىپىرۋشى زارداپ شەكتى.

قازىر 7 ادام دا اۋرۋحاناعا جەتكىزىلدى. قالالىق پوليتسيا اپات سەبەبىن انىقتاپ جاتىر.