قايىعى بۇزىلعان تەڭىزشى اشىق مۇحيتتا 7 اي قالىپ قويدى
استانا. قازاقپارات - رەيۋنون ارالىنىڭ جاعالاۋىنان بۇزىلعان قايىقپەن ءۇندى مۇحيتىندا جەتى اي جۇزگەن ەر ادام قۇتقارىلدى، دەپ جازادى Тelegraph .
56 جاستاعى زبيگنيەۆ رەكەت 20 - مامىردا كومور ارالدارىنان وڭتۇستىك افريكانىڭ دۋربان قالاسىن بەتكە الا اشىق تەڭىزگە شىققان. ۇشى- قيىرى جوق مۇحيتتا كەمەنىڭ قوزعالتقىشى ىستەن شىعىپ، جەل مەن تولقىننىڭ اعىزعان جاعىنا قاراي كەتە بارادى.
«مەن كەمەنى باسقارا المايتىن ەدىم. قۋاتتى تولقىندار الدىمەن سومالي جاعالاۋلارىنا، كەيىن مالديۆ ارالدارى جاققا، يندونەزياعا اكەتتى، ودان كەيىن ماۆريكيگە قاراي تارتتى، اقىر سوڭىندا رەيۋنونعا بارىپ تىرەلدىم. كوپ مارتە جەردى كوردىم، ءبىراق جەتە الماي ءجۇردىم»، - دەيدى تەڭىزشى.
ساياحاتشىنىڭ ەشقانداي بايلانىس قۇرالدارى بولماعان، بۇدان تىس، تەك ءبىر ايعا جەتەتىن جول ازىعى بار تەڭىزشى باعداردان اداسقان سوڭ بالىق اۋلاپ، جاڭبىر سۋىن ءىشىپ كۇن كەشۋگە ءماجبۇر بولعان.
مۇحيتتىڭ ەركىنە باعىنعان، الايدا ابدەن قالجىراپ كەتكەن تەڭىزشى 25 - جەلتوقسان كۇنى قۇتقارىلدى.
