تەمەكى تۇقىلىن تاستاعان قىتايلىقتان پارا العان پوليتسەي 7 جىلعا سوتتالدى
اقتوبە. قازاقپارات - اقتوبەدەگى اۋەجايدا ءتارتىپتى باقىلايتىن كاپيتان ايدوس يگيمبەتوۆ 150 مىڭ تەڭگە پارا العان.
ول قىتايلىق ازاماتتىڭ تەمەكى تارتىپ، تۇقىلىن لاقتىرىپ جىبەرگەنىن كورە تۇرا، اكىمشىلىك ءىس قوزعاماعان، دەپ حابارلايدى قازاقپارات ءتىلشىسى.
اقتوبەدەگى №2-قالالىق سوتىندا بۇگىن پوليتسيا قىزمەتكەرىنە ۇكىم شىقتى. ارىپتەستەرى ايدوس يگيمبەتوۆتى قولداۋعا كەلگەنىمەن، ءىس دالەلىن تاپتى. وتكەن جىلدىڭ جەلتوقسان ايىندا اقتوبە حالىقارالىق اۋەجايىنداعى ءتارتىپتى باقىلاۋعا بەكىتىلگەن پوليتسيا كاپيتانى ايدوس يگيمبەتوۆ الماتىدان كەلىپ، اۋەجاي الدىندا تەمەكى تارتىپ، كەيىن تۇقىلىن لاقتىرىپ جىبەرگەن قىتايلىق ازاماتتى ۇستادى. اكىمشىلىك ءىس قوزعاۋى ءتيىس پوليتسيا قىزمەتكەرى بارىنە كوز جۇمىپ، ولاردان 150 مىڭ تەڭگە تالاپ ەتكەن.
القاشقى كۇنى سۇراعان اقشاسىنىڭ 50 مىڭ تەڭگەسىن العان. كەيىن قىتايلىق ازاماتتىڭ وكىلى تاعى 50 مىڭ تەڭگە جەتكىزىپ بەرگەن. وسىدان سوڭ كولىكتەگى ءى ءى د اقتوبە ستانسياسىنداعى ىشكى ىستەر جەلىلىك باسقارماسى، قاۋىپسىزدىك قىزمەتىنىڭ ەلەكتروندى پوشتاسىنا ارىز تۇسىرگەن. كولىك پروكۋراتۋراسىنىڭ پروكۋرورى باۋىرجان قورجىمبايەۆتىڭ ايتۋىنشا، قىتايلىق ازاماتتىڭ وكىلىنەن سوڭعى 50 مىڭ تەڭگەنى العان كەزدە پوليتسيا قىزمەتكەرى قولعا ءتۇستى.
سۋديا گۇلنار تلەپوۆا پوليتسيا قىزمەتكەرى ايدوس يگيمبەتوۆتى 7 جىلعا باس بوستاندىعىنان، كاپيتان شەنىنەن ايىرۋعا ۇكىم شىعاردى. سونىمەن قاتار، بۇعان دەيىن كەپىلمەن جۇرگەن سوتتالۋشى سوت زالىنان قاماۋعا الىندى. ءارى قىتايلىق ازاماتتىڭ وكىلىنەن العان 150 مىڭ تەڭگەنى كەرى قايتارادى. 32 جاستاعى پوليتسيا قىزمەتكەرىنىڭ جەكە مۇلكى تاركىلەنەدى.
سوت ۇكىمى زاڭدى كۇشىنە ەنگەن جوق.
