كوكشەتاۋلىق كاسىپكەرلەر مەشىتتىڭ ەدەنىن جۋىپ جۇرگەن 7 بالانىڭ اناسىنا ءۇي سىيلاماقشى
بۇعان دەيىن باس يمام اتالعان جۇمىسشىعا قىمبات شەتەلدىك كولىكتى سىيعا تارتقان بولاتىن دەپ حابارلايدى Skifnews.kz.
جەرگىلىكتى ب ا ق وكىلدەرى حابارلاعانداي، كوكشەتاۋ ورتالىق مەشىتىنىڭ باس يمامى قانات قىدىرمين استاناعا قىزمەتىن اۋىستىرۋىنا بايلانىستى وعان كاسىپكەرلەر Toyota Camry كولىگىن سىيعا تارتقان ەكەن.
الايدا، يمام كولىكتى وزىنە الماي، سول مەشىتتىڭ ەدەن جۋۋشى ايەلىنە بەرۋدى ۇيعارىپتى. قىدىرمين كوپبالالى اناعا اۆتوكولىكتى ساتىپ، اقشاسىنا جاڭا ءۇي الۋعا دا كەڭەس بەرگەن.
مەشىتتىڭ باسپا ءسوز حاتشىسى باقىت سماعۇلدىڭ ايتۋىنشا، يمامنىڭ وسىناۋ ساۋاپتى ىسىنەن ساباق العان كاسىپكەرلەر جۇمىسشى ايەلدىڭ ۇيىنە اقشانى ەندى وزدەرى جيناپ بەرمەكشى ەكەن.
«ول ايەل جەتى بالانى جالعىز ءوزى اسىراپ وتىر. كۇيەۋى بىرنەشە جىل بۇرىن قايتىس بولىپ كەتكەن. ول دا كوزى تىرىسىندە كاسىپكەر بولعان. الايدا، قايتىس بولعاننان كەيىن ونىڭ وتباسى دىمسىز دالادا قالدى. ءبىز ولاردىڭ قالا ىرگەسىندە جەر تەلىمى بار ەكەنىن بىلدىك. ەندى قازىر ايەلگە پاتەر ساتىپ الۋ كەرەك پە، الدە سول جەرگە جاڭا ءۇي تۇرعىزىپ بەرۋ كەرەك پە دەپ سۇراپ وتىرمىز. جاۋابىن ايتقان سوڭ شەشىم قابىلدايمىز»، - دەيدى ب. سماعۇل.
