مەكتەپ بىتىرمەگەن 7 ميللياردەر - فوتو

استانا. قازاقپارات - ميللياردەرلەردىڭ جوعارى ءبىلىمى جوق ەكەنىنە بۇگىندە ەشكىم تاڭ قالمايدى

بيلل گەيتس، ستيۆ دجوبس، مارك تسۋكەربەرگ - بۇلاردىڭ ءبارى بيزنەس ءۇشىن الەمنىڭ ۇزدىك ۋنيۆەرسيتەتتەرىن تاستاپ كەتكەن. ءتىپتى مەكتەپتى اياقتاماعاندارى دا بار. نازارلارىڭىزعا اتتەستاتسىز بايلىقتىڭ تىزگىنىن ۇستاعان جەتەۋدى ۇسىنامىز.

امانسيو ورتەگا - Inditex نەگىزىن قۇرۋشى

داۋلەتى: $57 ميلليارد

Forbes ميللياردەرلەر تىزىمىندەگى ورنى: 3

يسپان كاسىپكەرى امانسيو ورتەگا - Forbes ۆەرسياسى بويىنشا الەمنىڭ ەڭ باي ادامدارىنىڭ قاتارىندا. 2013-جىلى تابىسى 19,5 ميلليارد دوللارعا اسقاننان كەيىن، پلانەتانىڭ ەڭ باي ۇشتىگىنە ەندى. Zara, Mussimo Dutti, Oysho سەكىلدى برەندتەردىڭ يەگەرى مەكتەپتى 13 جاسىندا وقۋىن تاستاپ كەتىپتى.

ونىڭ اكەسى تەمىر جولدا قىزمەت ىستەگەن، ال شەشەسى ءۇي كومەكشىسى بولعان. سوندىقتان وتباسىندا ءاردايىم اقشا تاپشىلىعى بولعان. تۇرمىسىن جاقسارتۋ ءۇشىن جۇبايى ەكەۋى جايمالار، ايەلدەر كيىمىن تىگىپ ساتادى. ناتيجەسىندە قازىر بارشا الەمگە تانىمال ايەلدەر برەندىنىڭ نەگىزىن قالايدى.

لي كاشين - Cheung Kong Group كومپانياسىنىڭ باسشىسى

داۋلەتى: $31 ميلليارد

Forbes ميللياردەرلەر تىزىمىندەگى ورنى: 8

ازيانىڭ ەڭ داۋلەتتى ادامدارىنىڭ ءبىرى كەدەي وقىتۋشى وتباسىندا دۇنيەگە كەلگەن. لي كاشين 14 جاسقا كەلگەندە ونىڭ اكەسى تۋبەركۋلەزدەن كوز جۇمادى. سونىڭ سالدارىنان مەكتەپتەن كەتىپ، وزىنە جۇمىس تابۋعا ءماجبۇر بولعان. العاشىندا ساعات باۋىن ساتىپ، ال كەيىنىرەك پلاستماسسادان جاسالعان گۇلدەر جاسايتىن فابريكاعا جۇمىسقا ورنالاسادى.

لي كاشين كۇنىنە 16 ساعاتتان ەڭبەكتەنگەن، 7 جىل ىشىندە جەكە ىسىمەن اينالىسۋعا قاجەتتى اقشا جيناپ ۇلگەرەدى.

ونىڭ جيناعان اقشاسى پلاستيك وندىرۋمەن اينالىساتىن شاعىن زاۋىت اشۋعا جەتەدى. ال تاپقان تابىسىنا گونكونگتە ارزان جىلجىمايتىن مۇلىكتەردى ساتىپ الا باستايدى. ايتا كەتەرلىك ءبىر جايت، لي كاشين جۇيەلى ءبىلىمنىڭ ارقاسىندا ميللياردەر اتانباسا دا، جوعارى وقۋ ورىندارىنىڭ قايىرىمدىلىق قورىنا كومەك رەتىندە ميلليونداعان دوللار ءبولىپ وتىرادى ەكەن.

فرانسۋا پينو - Kering كومپانياسىنىڭ باسشىسى

داۋلەتى: $15 ميلليارد

Forbes ميللياردەرلەر تىزىمىندەگى ورنى: 53

ءبىر جولى فرانسۋا پينو وزىندە بار وقۋ جايلى جالعىز كۋالىك -  ول جۇرگىزۋ كۋالىگى ەكەنىن ايتىپتى. فرانسۋز ميللياردەررى 16 جاسىندا مەكتەپتى تاستاپ كەتكەن جانە وسىدان سوڭ ءبىلىمىن جەتىلدىرۋ جايلى ەش ويلانباعان.

ونىڭ العاشقى كومپانياسى Pinault group اعاش ساتۋ بويىنشا جۇمىس ىستەگەن. كەيىنىرەك سپورتتىق كيىم مەن ءيىسسۋ ءوندىرىسىن، قانت پەن ديزاينەرلىك سومكەلەر ساتۋمەن دە اينالىسقان.

بۇگىندە ول Gucci ماركاسىنىڭ، Christiە's اۋكتسيون ءۇيىنىڭ، Chateau-Latour ءجۇزىم باعىنىڭ جانە پاريجدەگى Marigny تەاترىنىڭ يەسى.

ريچارد برەنسون - Virgin Group كورپوراتسياسىنىڭ يەگەرى

داۋلەتى: $4,6 ميلليارد

Forbes ميللياردەرلەر تىزىمىندەگى ورنى: 272

ريچارد برەنسوندى 16 جاسىندا وقۋ ۇلگەرىمى تومەن بولعاندىقتان وقۋدان شىعارعان. ءبىر قىزىعى، مەكتەپ ديرەكتورىنىڭ ريچاردقا ايتقان سوڭعى سوزدەرىنىڭ ءبىرى «قوش بول، ريچارد. سەن نە تۇرمەگە تۇسەسىڭ، نە بايىپ كەتەرسىڭ» بولعان ەكەن. ال ءبىر جىلدان كەيىن 17 جاسىندا Student Advisory Centre اتتى قايىرىمدىلىق ۇيىمىن اشتى. قازىر ول باسقاراتىن Virgin Group كورپوراتسياسىنىڭ قۇرامىندا ءتۇرلى پروفيلدە جۇمىس ىستەيتىن 400 كومپانيا بار.

دجو ليۋيس - Tavistock Group نەگىزىن سالۋشى

داۋلەتى: $4,2 ميلليارد

Forbes ميللياردەرلەر تىزىمىندەگى ورنى: 308

بريتاندىق دجو ليۋيس لوندوننىڭ شىعىسىندا وسكەن. ونىڭ اكەسى شاعىن فيرمانىڭ يەگەرى بولعان جانە ۇلى 15 جاسقا كەلگەندە ونى ءوز ىسىنە ارالاستىرۋدى شەشىپتى. وسىلايشا دجو مەكتەپ وقۋلىقتارىن شەتكە ىعىستىرىپ، اكەسىنىڭ ىسىنە ارالاسىپ كەتىپتى.

بۇگىندە ليۋيستە 150 دەن استام كومپانيادان ۇلەسى بار جانە 135 رەستوران مەن «توتتەنحەم حوتسپۋر» فۋتبول كلۋبىنىڭ يەگەرى.

كيرك كەركوريان - Tracinda Corporation پرەزيدەنتى

داۋلەتى: $3,3 ميلليارد

Forbes ميللياردەرلەر تىزىمىندەگى ورنى: 412

امەريكاندىق ازامات كيرك كەركوريان سەگىزىنشى سىنىپتا وقىپ جۇرگەن كەزىندە مەكتەپتى تاستاپ كەتكەن. اعاسىنىڭ كومەگىمەن ول بوكسپەن بەلسەندى تۇردە اينالىسا باستايدى جانە سپورتشى بولۋدى ارماندايدى. دەگەنمەن، كيرككە كاسىبي سپورتپەن اينالىسۋ سول كۇيى بۇيىرمايدى.

ەكىنشى دۇنيەجۇزىلىك سوعىس كەزىندە ول اۆياتسياعا قىزىعۋشىلىق تانىتىپ، كورولدىك اۋە كۇشتەرى قىزمەتىنە تۇسەدى. بولاشاق ميللياردەر شاعىن اۋەجەلىسىن ساتىپ الىپ، وسى سالا بويىنشا كاسىپكەرلىكپەن اينالىسۋعا بەل بۋادى. وسى سالاداعى ءىرى كومپانيالارمەن كەلىسىم-شارتتار جاساپ، 5 جىل ىشىندە 37 ميلليون دوللار تابادى.

دەۆيد مەردوك - Dole Food Company باسشىسى

داۋلەتى: $2,4 ميلليارد

Forbes ميللياردەرلەر تىزىمىندەگى ورنى: 613

دەۆيد مەردوك جەمىس پەن كوكونىس ءوندىرۋ بويىنشا الەمدەگى ەڭ ءىرى كومپانيانى باسقارعانىنا قاراماستان، ونىڭ ءبىرىنشى جۇمىسى ازىق-تۇلىككە مۇلدەم قاتىسى بولماعان.

توعىزىنشى سىنىپتا مەكتەپتى تاستاعاننان سوڭ ول جانارماي قۇيۋشى بولىپ قىزمەت اتقارادى، ال 1943-جىلى ا ق ش اسكەرىنە جازىلادى. سوعىستان سوڭ مەردوك دەترويتتە تۇراقتاۋدى شەشەدى جانە سول كەزدە ونىڭ باسىندا باسپاناسى، قالتاسىندا اقشاسى دا بولماعان ەكەن.

جازيرا ساميدينوۆا

kun.kz7