ءۇيىڭىزدى بەرەكەتكە تولتىرۋدىڭ 7 جولى

1. قۇران. ەگەر ءبىز قۇراندى باسشىلىققا الىپ، ونىڭ بۇيرىقتارى بويىنشا جۇرەتىن بولساق، اللا قۇراندى بۇكىل بەرەكەتتىڭ قاينار كوزى ەتتى. اللا ەلشىسى (س. ا. ۋ. ) : «قۇران وقىلماعان ءۇي ولىكپەن تەڭ» ، - ەكەندىگىن بايانداعان. قۇرانعا كوپ كوڭىل بولىنگەن ءۇيدىڭ ءىشى نۇرعا تولىپ، شايتان ودان قاشادى ءارى وتباسىنداعى باقىت پەن بەرەكەتى ارتا تۇسەدى.

2. بيسميللا مەن زىكىر. پايعامبارىمىزدىڭ (س. ا. ۋ. ) حاديسىندە بىلاي دەلىنگەن: «ەگەر ادام ءوزىنىڭ ۇيىنە كەلىپ، كىرگەن ساتتە جانە تاماق ىشكەن كەزدە اللانى ەسكە السا، شايتان ءوز جاقتاستارىنا: «بۇل جەردە تۇنەۋگە ءارى تاماقتانۋعا بىزگە ورىن جوق» ، - دەيدى» . ەگەر ول ادام كىرگەن كەزدە ۇلى جاراتۋشىنى ەسكە الماسا، شايتان ءوز سىبايلاستارىنا: «سەندەرگە وسى جەردە تۇنەۋگە جانە تاماق ىشۋگە ابدەن بولادى» ، - دەيدى. اللانى ەسكە الۋ - جۇرەكتىڭ ءىسى ءارى ءاربىر مۇسىلماننىڭ ايتاتىن ەڭ جاقسى سوزدەرى. اللانى ەسكە الاتىن ءاربىر ءۇي مەن جاراتۋشىنى ەسكە الۋمەن باستالعان كەز- كەلگەن ءىس مول بەرەكەتكە قاۋىشادى.

3. ساداقا. ساداقا ءاربىر جانۇيانىڭ كۇندەلىكتى تىرلىكتەگى ادەتتەگى ارەكەتى بولۋى قاجەت. بەرۋشى قول كەدەيلەنبەيدى، كەرىسىنشە، ونداي ادام اللانىڭ رازىلىعىنا بولەنىپ، تابىسى ارتا تۇسەدى. باسقالارعا قامقورلىق پەن قايىرىمدىلىققا باعىتتالعاندىقتان، بۇل ساداقا اللانىڭ ريزاشىلىعىن تۋدىرادى، سوندىقتان ساداقا بەرۋشى ءۇيدىڭ بەرەكەتى ەسەلەنەدى.

4.تۋىسقاندىق بايلانىس. تۋىسقاندىق بايلانىستى جالعاماعان ءارى اللانىڭ بۇيرىعى ەكەندىگىن ەسكەرمەگەن ءۇيدىڭ بەرەكەتى جوعالادى. اللا ەلشىسى (س. ا. ۋ. ) : «ەڭ جاقسى ادام- ول ءوز وتباسىنا جاقسى قاراعان ادام ءارى ەڭ جاقسى ساداقا- ءوز وتباسىڭا بەرگەن ساداقا» ، - دەگەن. يسلامدا وتباسىلىق جانە تۋىستىق بايلانىستى ساقتاۋعا تەرەڭ ءمان بەرىلەدى. اتالمىش قاتىناستار ۇزىلگەن جاعدايدا اللانىڭ مەيىرىمىنەن ۇزاق بولادى، ال كەرىسىنشە، وسى بايلانىستى بەكىتكەن سايىن جاراتۋشىنىڭ راقىمى مەن بەرەكەتىنە بولەنەدى.

5. ەرتە تۇرۋ. پايعامبارىمىز (س. ا. ۋ. ) ءوزىنىڭ ومىرشەڭ حاديستەرىنىڭ بىرىندە قىزىنا بىلاي دەگەن: «و، مەنىڭ قىزىم، تۇر، جاراتۋشى ءوزىنىڭ ريزىعىن بۇكىل جاراتىلىسقا بولگەن ساتتە قالىس قالماي، تۇرەگەل، بەيقامداردىڭ قاتارىندا بولما! شىنىندا دا، قۇدىرەتى شەكسىز اللا تاعالا دۇنيەلىك نىعمەتتەرىن ءوزىنىڭ پەندەلەرىنە تاڭ ءسارى مەن كۇن شىققانعا دەيىنگى ارالىقتا بولەدى» .

6. ناماز. ءوز ۋاقىتىندا وقىلعان ناماز - مەيىرىمى شەكسىز اللانىڭ جاقسى كورەتىن ىستەرىنىڭ ءبىرى. ءۇيدىڭ ءاربىر مۇشەسى ءوز ۋاقىتىندا باستى عيبادات - نامازدى وقىسا، اللانىڭ راقىمى مەن رازىلىعىنا بولەنەدى.

7. العىس ايتۋ، شۇكىرشىلىك ەتۋ. العىس ايتۋ، شۇكىرشىلىك ەتۋ - اللانىڭ تاراپىنان بەرىلگەن كۇللى نىعمەتتى مويىنداپ، شىنايى جۇرەكپەن رازىلىعىن بىلدىرەتىن عيبادات. اللادان بەرىلگەن ءاربىر ۇزدىكسىز نىعمەتتىڭ قادىرىن تۇسىنەتىن ءارى باعالايتىن ءۇي تىنىشتىق پەن ىزگىلىككە كەنەلەدى. اللاعا العىس بىلدىرگەن ادام ءبىر- بىرىنە دە العىس بىلدىرەدى، كىشىگىرىم شىنايى قۋانىشقا شۇكىرشىلىك ەتەتىن وسىنداي ءۇي ءوزارا تۇسىنۋشىلىك پەن بەرەكەگە تولى.

8. تاۋبە ەتۋ. دۇنيە تىرشىلىگىندەگى ءاربىر تەرىس ىسىنە شىنايى وكىنىپ، تاۋبە ەتكەن ادامنىڭ ءۇيى دە اللانىڭ كەشىرىمى مەن بەرەكەتىنە قاۋىشادى. اللا ەلشىسى (س. ا. ۋ. ) : «اللادان شىنايى تۇردە كەشىرىم سۇراپ، تاۋبە ەتكەن، يستيعفار ايتقان ادامعا اللا تاعالا قيىندىقتان شىعاتىن جول كورسەتەتىنىن، قايعى، مۇڭىن جەڭىلدەتىپ، ريزىعىن ارتتىراتىندىعىن» ، - تۇسىندىرگەن. اللا ءسىزدىڭ ءۇيىڭىزدىڭ دە بەرەكەتىن ارتتىرسىن!

دەرەككوز: islam.kz